ޗެމްޕިއަން ރެއާލްގެ ފެށުން އުނދަގޫ މޮޅަކުން

ލަލީގާގެ ޗެމްޕިއަން ރެއާލް މެޑްރިޑް އުނދަގޫ މޮޅަކުން އާ ސީޒަންގެ ލީގު ފަށައިފިއެވެ.

ލީގުގައި ރެއާލް މެޑްރިޑްގެ ފުރަތަމަ ފުޓުބޯޅަ މެޗު އަލްމީރިޔާއާ ވާދަކޮށް ކުރި ހޯދީ 2-1 ނެވެ. މެޗުގެ ފުރަތަމަ ލަނޑު ޖަހާ ރެއާލް ސިއްސުވާލީ އަލްމީރިޔާއިންނެވެ. ހަވަނަ މިނެޓުގައި އެޓީމަށް ކުރިހޯދައިދިނީ ކުރިން މެންޗެސްޓަރ ޔުނައިޓެޑަށް ކުޅުނު ރަމަޒާނީއެވެ. ރެއާލްއިން ނަތީޖާ ހަމަހަމަކުރީ ދެވަނަ ހާފްގައި ލުކަސް ވަޒުކުއޭޒް ޖެހި ލަނޑުންނެވެ. ރެއާލްއިން މެޗު ކާމިޔާބުކުރީ ހިލޭޖެހުމަކުން ޑޭވިޑް އަލަބާ ކާމިޔާބުކުރި ލަނޑުންނެވެ. މިއީ ބެންޗުން އަރާ އަލަބާ ފައިގަ ޖައްސާލި ފުރަތަމަ ބޯޅައެވެ. މެންޑީގެ ބަދަލުގައި އަލަބާ ކުޅެން ނުކުތީ 74 ވަނަ މިނިޓްގައެވެ. ލަނޑު ޖެހީ 75 ވަނަ މިނެޓުގައެވެ.

މެޗު ނިމުމުހެ ކުރިން ނަތީޖާ ހަމަހަމަކުރަން އަލްމީރިޔާއަށް ވެސް ފުރުޞަތު ލިބުނެވެ. މިމޮޅާއެކު ރެއާލް މެޑްރިޑް ވަނީ ސީޒަންގެ ފުރަތަމަ ރަސްމީ ދެ މެޗުވެސް ކާމިޔާބުކޮށްފައެވެ. ރެއާލް ވަނީ ޔުއެފާ ސުޕަރ ކަޕްގެ މެޗު ކާމިޔާބުކޮށް ޗެމްޕިއަންކަން ހޯދާފައެވެ.