ކަނޑައެޅިފައިވާ ތާރީޚަށް އޮލިމްޕަސް ގެ މަސައްކަތް ނިމޭނެކަމުގެ ޔަގީންކަން އެބައޮތް: ތޯރިގް
އޮލިމްޕަސް ނިންމަން ސަރުކާރުން ބޮޑު އިސްކަމެއްދޭ: ތޯރިގް
ފިލްމް އެސޯސިއޭޝަންގެ އަހަރީދުވަސް ފާހަގަކުރުމުގެ ހަފްލާގެ ތެރެއިން
އޮލިމްޕަސް ސިނަމާ މަރާމާތުކޮށް ތަރައްގީ ކުރުމުގެ މަސައްކަތް ނިންމާ، ކުރިން ކަނޑައަޅާފައިވާ ގޮތަށް އަންނަ ސެޕްޓެމްބަރު މަހުގެ ތެރޭގައި އެތަން ހުޅުވޭނެ ކަމުގެ ޔަގީންކަން އެބަ އޮތް ކަމަށް ކަލްޗަރ އެންޑް ހެރިޓޭޖް މިނިސްޓްރީގެ ސްޓޭޓް މިނިސްޓަރ މުހައްމަދު ތޯރިގް ވިދާޅުވެއްޖެއެވެ.
ފިލްމް އެސޯސިއޭޝަންގެ 16 ވަނަ އަހަރީ ދުވަހާއި ގުޅިގެން ބޭއްވި ހަފްލާއެއްގައި ވާހަކަދައްކަވަމުން ތޯރިގް ވަނީ އޮލިމްޕަސް ބަންދުކޮށްފައި ހުރުމުން ފިލްމީ ދާއިރާގެ މަސައްކަތް ތަކަށް ވަރަށް ބޮޑަށް ބުރޫ އަރާފައިވާކަން ފާހަގަކުރައްވާފައެވެ. އެހެންނަމަވެސް އެތަނުގެ މަސައްކަތް އަވަސް ކުރުމަކީ ސަރުކާރުން ވަރަށް ބޮޑު އިސްކަމެއް ދޭ ކަމެއް ކަމަށާއި، އެކަމަށް ބޭނުންވާ ބަޖެޓް ވެސް ހަމަޖެއްސީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ އިސްނެންގެވުމުގެ މަތިން ކަމަށް އޭނާ ވަނީ ފާހަގަކުރައްވާފައެވެ.
ކޯވިޑް-19އާއި ގުޅިގެން އޮލިމްޕަސް ބަންދުކުރުމަށްފަހު އެތަނުގައި ބޮޑެތި މަރާމާތުތަކެއް ކުރުމުގެ މަސައްކަތް ސަރުކާރުން ފަށާފައި ވަނީ 2021 ވަނަ އަހަރުއެވެ. މި މަސައްކަތުގެ ތެރެއިން އޮލިމްޕަސް އިމާރާތަށް ބޮޑެތި ބަދަލުތަކެއް ގެނައުމަށްވެސް ވަނީ ހަމަޖެހިފައެވެ. އޮލިމްޕަހުގެ މަސައްކަތް އަންނަ ސެޕްޓެމްބަރު މަހު ނިންމުމަށް ކަނޑައަޅާފައިވީ ނަމަވެސް އޮލިމްޕަހުގެ މަސައްކަތް ނިންމާ ހުޅުވާނެ ވަކި ތާރީހެއް މިހާތަނަށް އަދި އިއުލާންކޮށްފައެއް ނުވެއެވެ.
ރާއްޖޭގައި މިވަގުތު ހުރި އެންމެ ޒަމާންވީ އަދި އެންމެ ބޮޑު ސިނަމާ ކަމަށްވާ އޮލިމްޕަސް ހުޅުވާފައި ވަނީ 1959 އަހަރެވެ.
