އޮލިމްޕަސް ޒަމާނީ ފެންވަރަށް ތަރައްގީކުރުމަށް ކުރަމުންދާ މަސައްކަތް ނިންމައި، މިއަހަރު ނިމުމުގެ ކުރިން އޮލިމްޕަސް ހުޅުވޭނެ ކަމަށް ހެރިޓޭޖް މިނިސްޓްރީގެ ޑެޕިއުޓީ މިނިސްޓަރު މުހައްމަދު އިކުރާމް ވިދާޅުވެއްޖެއެވެ.

ނެޝަނަލް ސެންޓަރ ފޮރ ދި އާޓްސް (އެންސީއޭ) އިން މީގެ ކުރިން ބުނެފައިވަނީ މިއަހަރުގެ ސެޕްޓެމްބަރު މަހުގެ ފަހުކޮޅު އޮލިމްޕަސް ހުޅުވުމުގެ މަސައްކަތް ކުރަމުން އަންނަ ކަމަށެވެ. އެހެންނަމަވެސް އެ މުއްދަތު ފަހަނައަޅާ ދިޔުމުން ރާއްޖެއެމްވީން ކުރި ސުވާލަށް ޖަވާބުދެއްވަމުން އިކްރާމް ވިދާޅުވީ ލަސްތަކެއް އައިސްފައިވަނީ ޝިފިންގ ޑިލޭތަކުގެ ސަބަބުން ކަމަށެވެ. އަދި މިހާރު ކުރިއަށްދަނީ އޮލިމްޕަސް އެތެރޭގެ މަސައްކަތްތައް ކަމަށް ވެސް ވިދާޅުވިއެވެ.

އޮލިމްޕަސް އިމާރާތުގެ އާބާތުރަ ފިލުވައި، ވަސީލަތްތައް ތަރައްގީކުރުމުގެ މަސައްކަތުގެ ދެވަނަ ފިޔަވަހީގެ މަސައްކަތް ފަށާފައިވަނީ މިއަހަރުގެ މާރޗް 8 ވަނަ ދުވަހުއެވެ.

އެންސީއޭ އިން ބުނީ އޮލިމްޕަސް އިމާރާތުގެ ބޭރު ފާރުތަކާއި، ހުޅަނގު ފަރާތު ކޮރިޑޯގެ ފާރުތައް މަރާމާތުކޮށް ކުލަލުމުގެ މަސައްކަތް ނިމިފައިވާކަމަށެވެ. އަދި އޮލިމްޕަހުގެ ހުޅަނގު ފަރާތުގައި ކުރިން ބޭނުންކުރި އޭޓީއެމް ހުރިބައި އޮލިމްޕަހުގެ ކެންޓީނެއްގެ ގޮތުގައި ބޭނުންކުރުމަށް އެތެރޭގެ ފާރުތަކަށް ގެންނަންޖެހޭ ބަދަލުތައް ގެނެސް ތަރައްގީކުރަމުންދާކަމަށެވެ.

އެންސީއޭ އިން ބުނީ އޮލިމްޕަސް ހޯލްގެ ސަވައިލަންސް ކޮންޓްރޯލް އާއި މެނޭޖްމެންޓް ރޫމްގެ މަސައްކަތް މިހާރު ނިމިފައިވާކަމަށެވެ. އަދި ޕްރޮޖެކްޓަރާއި ހޯލްގެ ސަރައުންޑް ސައުންޑް އިންސްޓޯލް ކުރުމަށް ސިންގަލްސޯސް ބިޑެއްގެ ގޮތުގައި ކުރިއަށްގެންދިއުމަށް ބަޔަކު ހޯދައި އޭޕްރިލް 18 ވަނަ ދުވަހު އެ ފަރާތުން ހުށަހެޅި ޕްރޮޕޯސަލާއި ގުޅިގެން ގާނޫނާއި ގަވާއިދުގެ ތެރެއިން ބިޑް ކޮމިޓީން ކުރަންޖެހޭ މަސައްކަތްތައް ދަނީ ކުރަމުން ކަމަށް އެންސީއޭ އިން ބުނެއެވެ.

މީގެއިތުރުން ރިހާސަލް ރޫމްތަކާއި، ކަރަންޓު ވައިރިންގެ މަސައްކަތް ކުރެވެމުންދާކަމަށް އެންސީއޭ އިން ބުނެއެވެ. ރީހާސަލް ރޫމްތަކާއި ހޯލުގެ އެކޯސްޓިކް މެޓީރިއަލް ހޯދުމަށް ބަޔަކާ ހަވާލުކޮށް އެފަރާތައް މަސައްކަތް ކުރިއަށްނުގެންދެވުމުން އެ ފަރާތާ އެކު ވެފައިވާ އެއްބަސްވުން ބާތިލުކޮށްފައިވާކަމަށް އެންސީއޭ އިން ބުނެއެވެ. އަދި މިހާރު އެ މަސައްކަތް އެސްޓީއޯ އާ ހަވާލުކޮށްގެން ކުރިއަށްގެންދާކަމަށް ބުނެފައިވެއެވެ.

އޮލިމްޕަހުގައި ހިންގާ އެކި ހަރަކާތްތައް އިޝްތިހާރުކުރުމަށް އޮލިމްޕަހުގެ މައި ގޭޓް މަތީގައި ލެޑް ޕެނަލެއް ބެހެއްޓުމަށް އިއުލާނުކޮށް، އެ މަސައްކަތް ބަޔަކާ ހަވާލުކޮށްފައިވާކަމަށް ވެސް އެންސީއޭ އިން ބުނެއެވެ.

އެންސީއޭއިން ބުނީ އޮލިމްޕަހުގެ މަސައްކަތްތައް އެކި ފަރާތްތަކާ ހަވާލުކޮށްގެން ބައެއް ފަރާތްތަކުގެ މަސައްކަތް ލަސްވެފައިވަނީ ކޮވިޑް-19 އާއި ރަޝިއާ-ޔޫކްރެއިން ހަނގުރާމައިގެ ސަބަބުން ބޭރުން ގެންނަންޖެހޭ ތަކެތި ނުގެނެވި ލަސްވަމުންދާތީ ކަމަށެވެ.

އޮލިމްޕަސް ހޯލް އަޕްގްރޭޑިން ޕްރޮޖެކްޓަކީ އިންޑިއާގެ ހިލޭ އެހީގެ ދަށުން ހިންގަމުންދާ މަޝްރޫއެކެވެ.