މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕިއާރުސީ) ގެ ހިޔާނާތް ހިންގި ކުރީގެ ރައީސް އަބްދުﷲ ޔާމީނަށް އެނގިވަޑައިގެން ނޫންކަމަށް ގަބޫލުކުރައްވަން ދަތިކަމަށް މަރަދޫ ދާއިރާގެ އިބްރާހިމް ޝަރީފް ވިދާޅުވެއްޖެއެވެ.

ރާއްޖެޓީވީގެ ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން ޝަރީފް ވިދާޅުވީ ކުރީގެ ނައިބް ރައީސް އަހުމަދު އަދީބަކީ ރައީސުލްޖުމްހޫރިއްޔާގެ ހައިސިއްޔަތުން ރައީސް ޔާމީންގެ އިތުބާރާއެކު އައްޔަން ކުރެއްވި ބޭފުޅެއް ކަމަށެވެ. އެމަނިކުފާނުގެ ވެރިކަމުގައި އަދީބު އެ ހިންގެވި ވަރުގެ ބޮޑު ހިޔާނާތެއް ހިންގިކަމުގައިވާ ނަމަ، ރައީސުލްޖުމްހޫރިއްޔާގެ ހައިސިއްޔަތުން އެކިއެކި އިންޓެލިޖެންސް ރިޕޯޓްތަކާއި، މީހުން ދައްކާ ވާހަކަތަކުން ކޮންމެވެސް ވަރެއްގެ މައުލޫމާތެއް ޔާމީނަށް ލިބިވަޑައިގަންނަވާނެކަމާއި މެދު ޝައްކެއް ނުކުރައްވާ ކަމަށެވެ. އަދި ލިބިވަޑައިނުގަންނަވާނަމަ އެއީ އިންޓެލިޖެންސްގެ ފެއިލިއަރއެއް ކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ ކެމްޕެއިނަށް ފައިސާ ލިބިވަޑައިގަންނަވާ ވާހަކަ އަބަދުވެސް ރައީސް ޔާމީން ދައްކަވާ ކަމަށާއި، ކެމްޕެއިނަށް އެކި ގޮތްގޮތުން އަދި ބޭރުގައުމުތަކުން ވެސް ފައިސާ ލިބިވަޑައިގަންނަވާނެކަން ގަބޫލުކުރައްވާ ކަމަށެވެ. އެކަމަކު މިކަމުގައި ވިސްނާލަންޖެހޭ ކަމަކީ އަދި ޖަވާބުދާރީވާންޖެހޭ ކަމަކީ ވަކިވަކި ފަރުދުންނަށް ކެމްޕެއިން ކޮންޓްރިބިއުޝަންގެ ގޮތުގައި ލެވޭނެ އަދަދު ކަމަށެވެ.

ޝަރީފް ވިދާޅުވީ އަދީބު ހިންގި ބޮޑު ހިޔާނާތުގެ ޒިންމާ ޔާމީން ނަންގަވަން ޖެހިވަޑައިގަންނަވާ ކަމަށެވެ. އެއީ ރައީސް ޔާމީންގެ މަގާމުގައި ހުންނެވުމާއި، ދައުލަތާއި ރައީސްގެ އެންމެ އިސްވެރިއަކީ އެމަނިކުފާނުކަމުގައި ވާތީ ކަމަށެވެ.

އެމްއެމްޕީއާރުސީގެ ހިޔާނާތަކީ އެމަނިކުފާނަށް އެނގިވަޑައިގެން ހިނގިކަމެއް ނޫން ކަމަށް ރައީސް ޔާމީން މީގެ ކުރިން ވިދާޅުވެފައިވެއެވެ. ނަމަވެސް އެމަނިކުފާނުގެ ވެރިކަމުގައި ކެބިނެޓްގައި ހިމެނިވަޑައިގެންނެވި ބޭފުޅުންނާއި މުއައްސަސާތަކަށް އެމަނިކުފާނު އައްޔަންކުރެއްވި ބޭފުޅުން ގެންދަވަނީ އެއީ އެމަނިކުފާނުގެ ބައިވެރިވުމާ އެކު މުޅި ދައުލަތް ބޭނުންކުރައްވައިގެން ކުރެއްވިކަމެއްގެ ގޮތުގައި ވިދާޅުވަމުންނެވެ.

އެމްއެމްޕީއާރުސީގެ ހިޔާނާތާއި، މަނީ ލޯންޑަރިންގެ މައްސަލައިގައި މިހާރު ވެސް އެމަނިކުފާނުގެ މައްޗަށް ދައުވާ އުފުލާ، ކޯޓުގައި ޝަރީއަތްތައް ވެސް ކުރިއަށް އެބަދެއެވެ.