ސަރުކާރުން މި ގައުމުގައި ޓާޝަރީ ފެންވަރުގައި ދަނީ ކޮރަޕްޝަން ހިންގަމުން: ޔާމީން
ރައީސް މުއިއްޒު ވެރިކަމުގެ ހުވާ ކުރެއްވުމުގެ ރަސްމިއްޔާތު ފެށިގެން ދިޔައީ ވެސް ކޮރަޕްޝަނުން
ޕީއެންއެޗް ޖަލްސާގައި ކުރީގެ ރައީސް އަބްދުﷲ ޔާމީން ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން މި ގައުމުގައި ޓާޝަރީ ފެންވަރުގައި ކޮރަޕްޝަން ކުރިއަށް ގެންދާ ކަމަށް ކުރީގެ ރައީސްގެ އަބްދުﷲ ޔާމީން ވިދާޅުވެއްޖެއެވެ.
މިދިޔަ ބުރާސްފަތި ދުވަހުގެ ރޭ ޕީއެންއެފުން ކުރިއަށް ގެންދިޔަ ޖަލްސާގެ އޯޑިއަންސްގައި އިންނަވައި ޔާމީން ވިދާޅުވީ ރައީސް މުއިއްޒު ވެރިކަމުގެ ހުވާ ކުރެއްވުމުގެ ރަސްމިއްޔާތު ފެށިގެން ދިޔައީ ވެސް ކޮރަޕްޝަނުން ކަމަށާއި، އޮނަވިހި މިލިއަން ރުފިޔާ ހޭދަކޮށްފައިވާ ކަމަށެވެ.
ޔާމީން ވިދާޅުވީ ހުވާ ކުރެއްވުމުގެ ރަސްމިއްޔާތަށް އެވަރު ހަރަދު ކުރަން ނުޖެހޭ ކަމަށާއި، ރައްޔިތުންގެ މަޖިލީހުގައި ނުވަތަ ދަރުބާރުގޭގައި ކުރިއަށް ގެންދެވޭނެ ކަމަށެވެ. އަދި އިދާރީ ގޮތުން ހަރަދުކޮށް، 2 މިލިއަން ނުވަތަ 1.5 މިލިއަން ރުފިޔާއިން ރަސްމިއްޔާތު ބޭއްވޭނެ ކަމަށް ޔާމީން ވިދާޅުވިއެވެ.
މިސަރުކާރުގެ ކޮރަޕްޝަނަށް އިޝާރާތް ކުރައްވައި ޔާމީން ވިދާޅުވީ ކޮރަޕްޝަން ގައުމުގައި ހިންގަމުންދަނީ ޓާޝަރީ ފެންވަރަށް ކަމަށާއި، ރައީސް މުއިއްޒުގެ ލަގަަސީގައި އެނޫން ކަމެއް ނެތް ކަމަށެވެ.
މީގެ އިތުރުން ޔާމީން ވަނީ މިސަރުކާރުން ސަމާއޯ އެގްރީމެންޓްގައި ސޮއިކޮށްފައިވާތީ އެކަމަށް ވެސް ފާޑު ވިދާޅުވެފައެވެ.
މިއީ ދެއްކުންތެރިކަން ހުންނަވަރު ރައްޔިތުންގެ ހައްގުތަކަށް އެއަމާނާތާއި ހަވާލުވާއިރު ފުރަތަމަ ފެށީ މިދެންނެވީ ފެށީ ކޮރަޕްޝަންގެ ބޮޑު އަމަލަކުން. މިހާރު ކުރިއަށް އެގެންދަނީ ހަމަ ޓާޝަރީ ފެންވަރުގައި ގެންދަނީ ކޮރަޕްޝަން. އެހެންވީމަ ލެގަސީގެ ތެރޭގައި ހުންނަންޖެހޭނީ ހަމައެކަނި ފާލަން ރޫޅާލާފައި ނޭޅުމެއް ނޫން އެނގޭތޯ. ލެގަސީއެއް ފަށަންވާނީ ރައްޔިތުންނަށް އެންމެ ދަތިވަނީ މިއަދު އެމީހުންނަށް ހަގީގަތުގައި ވެސް އެމީހުންނަށް އާމްދަނީ ލިބޭނެ ވަސީލަތެއް ނެތީމަ. ދެން އޮތް ލެގަސީއަކީ ކޮބައިތޯ. ދީނީ ބޭފުޅުން ގައިހިރުވާތީ އެއުޅެނީ ކޮންކަމެއްތޯ. އެލްޖީބީޓީގެ ލެގަސީ ވެސް އޮތީ މުއިއްޒުގެ. ދެން އަންނަ މީހަކު ޔަގީން ކަށަވަރު މީތި އުވާލާނެ.ކުރީގެ ރައީސްގެ އަބްދުﷲ ޔާމީން
ޔާމީން ވިދާޅުވީ މި ސަރުކާރުން ދަނީ ޒުވާނުންނަށް ވެސް ދުއްތުރާ ކުރަމުން ކަމަށާއި، ވިޔަފާރިތައް ހަލާކު ކުރަމުން ކަމަށެވެ. އަދި ސަރުކާރުގެ ނިންމުންތަކުގައި ރައްޔިތުންނަށް ދެކޮޅުޖެހޭ ޖަސްޓިފިކޭޝަނެއް ސަރުކާރަށް ނުދެވޭ ކަމަށް ޔާމީން ވިދާޅުވިއެވެ.
ސިނގިރޭޓް ކޮންޓްރޯލް ކުރުމަށް ކުރަމުންދާ މަސައްކަތްތަކަށް އިޝާރާތް ކުރައްވައި ޔާމީން ވިދާޅުވީ ދުންފަތަކީ ސިއްހަތަށް ގެއްލުންވާ އެއްޗެެއް ކަމަށާއި، ނަމަވެސް ސަރުކާރުން މި މަސައްކަތް ކުރަނީ ސިއްހަތަށް ގެއްލުންވާތީ އެކަމުން ޒުވާނުން ސަލާމަތް ކުރުމަށް ނޫން ކަމަށެވެ. ވަކިވަކި ކުންފުނިތަކަށް ސިނގިރޭޓް ގެނައުމުގެ ހުއްދަދީގެން ސަރުކާރުން ކުރާ ބޮޑު ވިޔަފާރިއެއް ކަމަށް ޔާމީން ވިދާޅުވިއެވެ.
