ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމާ ދެކޮޅަށް ކޮށްފައިވާ ތުހުމަތުތަކުގައި، އެމަނިކުފާނާ ދެކޮޅަށް ހެކިބަސް ދީފި ނަމަ އެ މީހަކަށް ލުއި ދޭނެ ކަމަށް ފުލުހުން ބުނެފައި އެބަ ހުރި ކަމަށް، ރައީސް ޔާމީންގެ ޤާނޫނީ ވަކީލު ޑޮކްޓަރު މުޙައްމަދު ޖަމީލް އަޙުމަދު ވިދާޅުވެއްޖެ އެވެ.

ހޯމަ ދުވަހު ކްރިމިނަލް ކޯޓުގައި އޮތް ރައީސް ޔާމީންގެ ޝަރީއަތަށް ފަހު ދެއްވި އިންޓަވިޔުގައި ޖަމީލް ވިދާޅުވީ، ދައުލަތުގެ ފަރާތުން އަމަލު ކޮށްފައިވާ ގޮތުން މުޅި މައްސަލަ ތަގައްޔަރުވާ ފަދަ ހެއްކެއް އުފަން ވެފައިވާ ކަމަށެވެ.

އެގޮތުން މި މައްސަލައިގައި ހިމެނޭ ފަރާތަކާއި، މައްސަލަ ތަހުގީގު ކުރި ފުލުހުންގެ ބޭފުޅަކާ ދެމެދު ދެކެވިފައިވާ ވާހަކަތައް ޖަމީލް ވަނީ ފާހަގަ ކުރައްވައިފަ އެވެ. އެގޮތުން ވަކި ގޮތަކަށް ރައީސް ޔާމީނާ ދެކޮޅަށް ހެކިބަސް ދީފި ނަމަ، އެ ފަރާތައް ލުއި ތަކެއް ލިބޭނެ ކަމަށް ބުނެފައިވާ ކަމުގައި ޖަމީލް ވިދާޅުވި އެވެ.

މައްސަލައިގައި އެ ހެކި އޮތްކަން އެނގުނީ ވެސް ވަރަށް ފަހުން ކަމަށާއި، އެ މައްސަލަ ރިވިއު ކުރުމަށް ޕްރޮސެކިއުޓަރ ޖެނަރަލްގައި އެދިފައިވާ ކަމަށް ވެސް ޖަމީލް ވިދާޅުވި އެވެ. އެގޮތަށް ހުށަހެޅޭ މައްސަލަތައް ރިވިއު ކުރާނެ ކަމުގައި ޕީޖީ އައްބާސް ޝަރީފް ވިދާޅުވި ނަމަވެސް، ރައީސް ޔާމީންގެ ފަރާތްޕުޅުން ހުށަހެޅި ހުށަހެޅުއްވުމަށް ޖަވާބު ނުދެއްވާ ކަމުގައި ވެސް ޖަމީލް ވިދާޅުވި އެވެ.

އަދި މައްސަލަ ކުރިއަށް ގެންދަން ނިންމާފައި ވަނީ، އެ މައްސަލައިގައި ހިމެނޭ އެހެން ފަރާތްތަކުގެ މައްސަލަ އަނބުރާ ގެންދެވުމަށްފަހު ކަމަށް ވިދާޅުވި އެވެ. އަދި އެކަމުގެ ހުއްޖަތެއްގެ ގޮތުގައި ކޯޓުގައި ޕީޖީ އިން ބުނެފައި ވަނީ، އެ ފަރާތްތަކުގެ މައްސަލަ އަނބުރާ ގެންދިޔައީ އެއީ ޕީޖީން ޤަބޫލު ކުރާ ގޮތުގައި އެކަމުގައި ލަސްތަކެއް އައިސްފައިވާތީ ކަަމަށެވެ.

އެހެން ނަމަވެސް، ރައީސް ޔާމީންގެ މައްސަލަ އަކީ ވެސް އޭރުގައި އުފަން ވެގެން އުޅޭ މައްސަލައެއް ކަމަށާއި، ރައީސް ޔާމީންގެ މައްސަލައިގައި ނުވާ ލަސް ވުމެއް، އެހެން މައްސަލައެއްގައި ވެސް ވެފައި ނޯންނާނެ ކަމަށް ޖަމީލް ފާހަގަ ކުރައްވާފައިވެ އެވެ.

އިތުރަށް ޖަމީލް ވިދާޅުވީ ހޯމަ ދުވަހު އޮތް ޝަރީއަތުގެ އަޑު އެހުމުގައި ވެސް އަދި މުޅި މައްސަަލައިގެ ތެރޭގައި ވެސް ހާމަވާން އޮތީ، ކުރީގެ ޕީޖީ ވެސް އަމަލު ކުރެއްވި ގޮތަށް، މިހާރުގެ ޕީޖީ ވެސް މިސްރާބު ހިފާފައި ހުރީ ބޭއިންސާފުން ކަމަށް ވީ ނަމަވެސް، "ސެލެކްޓިވް ޕްރޮސެކިއުޝަންގެ" ތެރެއިން، ރައީސް ޔާމީންގެ މައްޗަށް ޝަރީއަތް ދިވެހި ރާއްޖޭގެ ކޯޓުތަކުގައި ގެންދަން ކަމަށެވެ.

ޖަމީލް ވިދާޅުވީ އެއްބާވަތުގެ މައްސަލައެއްގެ ތެރޭގައި ހިމެނުނު އެހެން ފަރާްތްތަކަށް ދިން ލުއި، ނުވަތަ މައްސަލަތައް އަނބުރާ ގެންދިޔައިރު ވެސް، ރައީސް ޔާމީންގެ މައްސަލަ އަނބުރާ ނުގެންދަވާތީ، އެއީ "ސެލެކްޓިވް ޕްރޮސެކިއުޝަން" ކަމަށެވެ.

މީގެ އިތުރުން ޖަމީލް ވަނީ އެ މައްސަލައިގައި ދައުލަތުން ނުވަތަ ޕީޖީން ތަފާތު ގޮތްތަކަށް އަމަލު ކުރަމުންދާ ކަމަށް ވިދާޅުވެފަ އެވެ. އަދި މިއަދުގެ ޕީޖީން މިސްރާބު ހިފާފައި ހުރީ ރައީސް ޑޮކްޓަރު މުޙައްމަދު މުޢިއްޒު އަންގަވާފައިވާ ގޮތަށް ރައީސް ޔާމީންގެ މައްސަލަ ނަހަމަ ގޮތުގައި ދިވެހި ރާއްޖޭގެ ޝަރުއީ ނިޒާމުގެ ތެރެއިން ކުރިއަށް ގެންދަވަން ކަމަށެވެ.