34 ކަރުދާހާއި އެކު، މޯލްޑިވްސް މެރިން ސައިންސް ސިމްޕޯޒިއަމް ފަށައިފި
13 އޯގަސްޓު 2022 | ހޮނިހިރު 09:55މި ސިމްޕޯޒިއަމްއަކީ މެރިން ރިސަރޗް ދާއިރާގައި ޙަރަކާތްތެރިވާ ސައިންސްވެރިންގެ މެދުގައި މަޤުބޫލު ސިމްޕޯޒިއަމް އެއް
4 ވަނަ މެރިން ސައިންސް ސިމްޕޯޒިއަމް
ޖުމުލަ 34 ކަރުދާހާއި އެކު 4 ވަނަ މޯލްޑިވްސް މެރިން ސައިންސް ސިމްޕޯޒިއަމް ފަށައިފިއެވެ.
2016 ވަނަ އަހަރުން ފެށިގެން މޯލްޑިވްސް މެރިން ރިސާރޗް އިންސްޓިޓިއުޓުން އިންތިޒާމުކޮށްގެން ބާއްވަމުން އަންނަ މޯލްޑިވްސް މެރިން ސައިންސް ސިމްޕޯޒިއަމް އަކީ ކޮންމެ ދެ އަހަރުން އެއް އަހަރު ބާއްވަމުން އަންނަ ސިމްޕޯޒިއަމްއެއް ކަން ފާހަގަކޮށްލެވެއެވެ.
މޯލްޑިވްސް މެރިން ސައިންސް ސިމްޕޯޒިއަމް އަކީ މި ދާއިރާއިން ރާއްޖޭގައި ބާއްވާ މިފަދަ ހަމައެކަނި ބައްދަލުވުން ކަމަށް ވާއިރު މިއީ ރާއްޖޭގައި މެރިން ސައިންސުގެ ދާއިރާއިން ކުރެވޭ މަސައްކަތްތަކާއި ގުޅޭ މުހިންމު މައުލޫމާތުތައް ހިއްސާކުރުމަށް ލިބޭ ރަނގަޅު ފުރުސަތެކެވެ. މޯލްޑިވްސް މެރިން ރިސާރޗް އިންސްޓިޓިއުޓް އިން ބުނީ މި ސިމްޕޯޒިއަމްގެ މަގުސަދަކީ ދިވެހި ރާއްޖޭގެ ކަނޑުގެ މާހައުލާއި ވަސީލަތްތަކާއި ދިރުންތަކާއި ގުޅޭގޮތުން ކުރެވެމުންދާ ދިރާސަތަކުގެ މައުލޫމާތު ބަދަލުކުރުމާއި، އެ ދިރާސާތަކުގެ ނަތީޖާ އާއްމުންނާއި ހިއްސާކުރުމުގެ ޒަރީއާއިން ރާއްޖޭގައި މެރިން ސައިންސްގެ ދާއިރާ ކުރިއެރުވުން ކަމަށެވެ.
އެހެން އަހަރުތަކުގައި މި ސިމްޕޯޒިއަމް ކުރިއަށް ދަނީ އެއް ދުވަހުގެ މުއްދަތަށެވެ. އެހެންނަމަވެސް މި ފަހަރުގެ ސިމްޕޯޒިއަމް 2 ދުވަހަށް ކުރިއަށް ގެންދިއުމަށް ވަނީ ހަމަޖެހިފައެވެ.
މި ސިމްޕޯޒިއަމް އަށް މި އަހަރު 40 ކަރުދާސް ވަނީ ހުށަހަޅާފައެވެ. އޭގެ ތެރެއިން ސިމްޕޯޒިއަމްގައި ހިއްސާކުރުމަށް ހަމަޖެހިފައި ވަނީ 34 ކަރުދާހެވެ. 6 ދާއިރާ އަކުން މި ފަހަރުގެ ސިމްޕޯޒިއަމް އަށް ކަރުދާސް ހުށަހަޅާފައިވެއެވެެ. އެގޮތުން މިއަހަރުގެ ސިމްޕޯޒިއަމްގައި ކަރުދާސް ހުށައަޅާފައިވަނީ ވަށައިގެންވާ ގުދުރަތީ ވެއްޓާއި، މަސްވެރިކަމާއި،ކަނޑުފަޅުގެ ދިރުންތަކާއި، މޫސުމީ ބަދަލްތަކާއި، ފަރުތަކުގެ ދިރާސާއާއި ކަނޑުފަޅުގެ ބޭނުން މެހެއްޓެނިވިގޮތުގައިކުރުމާއި، ކަނޑުގެ ދިރުންތަކުގެ ބޭނުންހިފުމާއި، ކަނޑުފަޅުގެ އެކި ސަރަޙައްދުތައް ޙިމާޔަތްކުރުމާއި ގުޅޭގޮތުންނެވެ.
މެރިން ސިމްޕޯޒިއަމްގައި ރާއްޖެއާއި ރާއްޖެއިން ބޭރުގެ އެކި ފަރާތްތަކުން ބައިވެރިވެއެވެ. މި ސިމްޕޯޒިއަމްއަކީ މެރިން ރިސަރޗް ދާއިރާގައި ޙަރަކާތްތެރިވާ ސައިންސްވެރިންގެ މެދުގައި މަޤުބޫލު ސިމްޕޯޒިއަމް އެއްކަން ފާހަގަކޮށްލެވެއެވެ.
