އާގިލްގެ މަރުގެ މައްސަލައިގެ އަޑުއެހުމެއް އާދިއްތަ ދުވަހު
13 އޯގަސްޓު 2022 | ހޮނިހިރު 08:27އެންމެ ފަހުން އަޑުއެހުމެއް ބާއްވާފައިވަނީ 7 ޖޫން 2022 ގައި
އާގިލްގެ މަރުގެ މައްސަލައިގަ ދައުވާ ލިބޭ ތިން މީހުން
ގދ. ފަރެސްމާތޮޑާ، ކޮކާ، އިބްރާހިމް އާގިލް (18އ) މަރާލި މައްސަލައިގައި ދައުލަތުން ދައުވާ އުފުލާފައިވާ މީހުންގެ ޝަރީއަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.
މި އަޑުއެހުން ތާވަލުކޮށްފައިވަނީ އާދިއްތަ ދުވަހުގެ ހެނދުނު 09:00 އަށެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 7 ޖޫން 2022 ގައެވެ. އެ ދުވަހުގެ ދުވަހުގެ އަޑުއެހުމަށް ބަލާއިރު، މި މައްސަލައިގައި ދައުވާލިބޭ ހަމްދޫން ހަމްޒަތާއި މިޖުވާދު މާލިކުގެ ވަކީލުން ވަނީ ތަނާޒުލު ވެވަޑައިގެންފައެވެ. ވުމާއެކު، ދިފާއީ ވަކީލުން އައްޔަނު ކުރުމަށް މައްސަލަ ބައްލަވާ ގާޒީ ވަނީ 10 ދުވަހުގެ މުއްދަތެއް ދެއްވާފައެވެ.
އެ ދުވަހުގެ އަޑުއެހުމުގައި ދައުލަތުގެ ވަކީލު ވަނީ ދައުލަތުން ހުށައަޅާފައިވާ ސިއްރު ހެކިން، ޗިޓް ރައްދު ކޮށްގެން ހާޒިރު ކޮށްދިނުމަށް ޝަރީއަތުގައި އެދިލައްވާފައެވެ. ޝަރީއަތުން ވަނީ އެގޮތަށް ސިއްރު ހެކިން ހާޒިރުކުރާ ޙާލަތުގައި ހެކިންގެ ސިއްރުކަން ކަށަވަރު ނުވެދާނެކަން ބަޔާން ކުރައްވާފައެވެ.
އެހެންނަމަވެސް ދައުލަތުން ވަނީ ދައުލަތުގެ އިއުތިރާޒެއް ނެތްކަން ފާހަގަކުރައްވައި، އެ ހެކިން ހާޒިރުކޮށް، ދައުވާ ލިބޭ ފަރާތްތަކާ ވަކި މަޖިލީހެއްގައި އެ ހެކިންގެ އަޑުބަދަލުކޮށްގެން ހެކިބަސް ނެގުމަށް ބޭނުންވާކަން ފާހަގަކުރައްވާފައެވެ.
މި މައްސަލައިގައި ހަމްދޫން ހަމްޒަތުގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ.
ހަމްދޫނުގެ އިތުރުން މިޖުވާދު މާލިކުގެ މައްޗަށްވެސް އުފުލާފައިވަނީ ހަމަ އެ ދައުވާއެވެ. މީގެ އިތުރުން، މި މައްސަލައިގައި އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.
އާގިލް މަރާލާފައިވަނީ 2018 ވަނަ އަހަރުގެ އޮގަސްޓްމަހުގެ 31 ވަނަ ދުވަހުގެ ރޭ އެމް.އެމް.އޭ ސަރަޙައްދަށް އާގިލް ދަތުރުކުރި ލޯންޗް ކައިރިކުރި ތަނުންނެވެ. އާގިލް އަށް ފަރުވާދިނުމަށް ގެންދިޔަ އޭޑީކޭ ހޮސްޕިޓަލުން އޭރު ބުނެފައިވާ ގޮތުގައި އާގިލް އެހޮސްޕިޓަލަށް ގެންދިޔައީ އެ ރޭގެ 7:30 ހާއިރުއެވެ.
