ބްރޯޑްކާސްޓިން ކޮމިޝަން މިނިވަން މުއައްސަސާއެއްގެ ގޮތުގައި އޮތް އޮތުން އެއީ ބޭކާރުކަމެއް: ހަސީން

ބްރޯޑްކާސްޓިންގ ކޮމިޝަން މިނިވަން މުއައްސަސާއެއްގެ ގޮތުގައި އޮތް އޮތުން އެއީ ބޭކާރު ކަމެއް ކަމަށް ގާނޫނީ ވަކީލު އަބްދުﷲ ހަސީން ވިދާޅުވެއްޖެއެވެ.

ރާއްޖެޓީވީގެ 60 މިނިޓް ޕްރޮގްރާމުގައި ހަސީން ވިދާޅުވީ، ބްރޯޑްކާސްޓިންގ ކޮމިޝަން މިނިވަން މުއައްސަސާއެއްގެ ގޮތުގައި އޮތް އޮތުން އެއީ ބޭކާރު ކަމެއް ކަމަށާ، ދައުލަތުން ހޭދަކުރާ ބޭކާރު ފައިސާ ތައްކަމަށެވެ.

ހަސީން ވިދާޅުވީ ބްރޮޑްކާސްޓިން ކޮމިޝަނެއް އުފައްދާފައި އޮތް އޮތުމުގެ މަގުސަދަކީ ބްރޯޑްކާސްޓަރުންނަށް ފެސިލިޓޭޓް ކުރުމާއި، ބްރޯޑްކާސްޓަރުން ކުރިއަރުވާ، ބްރޮޑްކާސްޓަރުންނަށް މަގުފަހިކޮށްދިނުން ކަމަށްވާއިރު އެ ކޮމިޝަނުން އެކަންތައްތައް ނުފެންނަ ކަމަށެވެ.

އޭގެ ބަދަލުގައި މިހާރު ފެންނަމުންދަނީ ބްރޯޑްކާސްޓަރުންނަށް އަދަބުދީ، އެމީހުންނަށް ދުއްތުރާކޮށް ޖޫރިމަނާ ކުރަމުންދާތަންކަމަށް އޭނާ ވިދާޅުވިއެވެ.

ބްރޯޑްކާސްޓިންގ ކޮމިޝަނުން ގާނޫނާއި އެއްގޮތަށް އަމަލުކުރަމުންދާކަން ގަބޫލު ނުކުރެއްވޭ ކަމަށާއި އެއީ ބްރޯޑްކާސްޓް ކުރާ ފަރާތްތަކާމެދު އަދަބު ކަނޑައެޅުމުގައި ހަމަ ހަމަ އުސޫލު ނުގެންގުޅޭތީކަމަށް ހަސީން ވިދާޅުވިއެވެ. އެގޮތުން ބައެއް ފަރާތްތަކަށް އަދަބުތައް ދެވޭއިރު ހަމަ އެބާވަތުގެ ކަންތައްތައްކުރާ އެހެން ފަރާތްތަކަށް އަދަބު ނުދެވޭ ކަމަށް ހަސީން ވިދާޅުވިއެވެ.

ރާއްޖޭގައި ބޭރުގެ އެކި ފަރާތްތައްކަށް ފެސިލިޓޭޓް ކުރާ ފަރާތަކީ މީޑިއާނެޓް ކަމަށްވާއިރު، މީޑިއާނެޓް 5 ލައްކަ ރުފިޔާއިން ޖޫރިމަނާ ކުރުމަކީ ގަބޫލުކުރެވޭނެ ކަމެއްނޫންކަމަށް ހަސީން ވިދާޅުވިއެވެ.

ސަބަބަކީ އަލްޖަޒީރާ ޗެނަލަކީ ދުނިޔޭގެ ނަންމަޝްހޫރު ބެސްޓް ޕްރެކްޓިސްއަށް ފެތޭ ޗެނަލަކަށްވާއިރު މީޑިއާނެޓް ޖޫރިމަނާ ކުރީ ބްރޯޑްކާސްޓިންގެ ކޮން މިންގަނޑަކުންތޯ އާއި ޖޫރިމަނާކުރުން ފެތެނީ ގާނޫނުގެ ކޮން މާއްދާއަކަށްކަން ސާފުނުވާކަމަށެވެ.

"ގާނޫނުގެ ކޮންމެވެސް އެއްޗެއްގެ ތެރެއަށް ވައްދައިގެން އަދަބެއް ދެވިދާނެ. އެހެންނަމަވެސް ގާނޫނުގެ މިންގަޑުތަކަކަށް މި އެޅި ފިޔަވަޅު ހަގީގަތުގައި ނުވޭ" ހަސީން ވދާޅުވިއެވެ.

ހަސީން ވިދާޅުވީ ބްރޯޑްކާސްޓިންގ ކޮމިޝަނުން ފެންނަމުންދަނީ ގާނޫނު އަސާސީއާއި ގާނޫނުގެ ނަންބޭނުކޮށްގެން މުޅި މަފްހޫމު އޮޅުވާލަތަން ކަމަށެވެ.

އެގޮތުން ރާއްޖެޓީވީ ޖޫރިމަނާކުރުމަށްފަހު، ރާއްޖެޓީވީގައި މަސައްކަތްކުރައްވާ އިސްވެރިން ބްރޯޑްކާސްޓިންގ ކޮމިޝަނަށް ގެންދިޔަކަމަށާއި އޭނާއަށް ފާހަގަކުރެވިގެން ދިޔައީ އެކަމުގައި ބައިވެރިވި ފަރާތްތަކަށް ޖަވާބުދާރީވުމަށް އެކަށީގެންވާ ފުރުސަތުތައް ދީފައިނުވާކަން ކަމަށެވެ.

"ދޭތެރެއަކުން ފިޔަވަޅުއަޅާފައި ފަހުން އެ އެޅުނީ ގޯސްކޮށްކަމަށް ނިންމެވޭފަދަ ހާލަތްތައް އެބައާދޭ. އެހެންވީމަ އެއްވެސް ވަރަކަށް ބަލާ މިންގަނޑުތަކަށް ރަނގަޅު ބެސްޓް ޕްރެކްޓިސް އުސޫލްތަކެއް ބައިނަލް އަގުވާމީ މިންގަނޑަށް ފެތޭ މިކަހަލަ ޕްރޮފެޝަނަލް އުސޫލްތަށް ގެންގުޅޭ ބައެއްކަމަށް އަޅުގަނޑަކަށް ގަބޫލެއް ނުކުރެވޭ ބްރޮޑްކާސްޓިން ކަމިޝަން މެމްބަރުންނަކީ" ހަސީން ވިދާޅުވިއެވެ.

މީގެ އިތުރުން ހަސީން ވިދާޅުވީ، ބްރޯޑްކާސްޓިންގ ކޮމިޝަނަށް ރާއްޖޭގެ ބްރޯޑްކާސްޓަރުންނަށް ބިރު ދެއްކިދާނެ ކަމަށާއި އެހެން ނަމަވެސް ބައިނަލް އަގުވާމީ މީޑިއާތަކަކީ ބިރު ދެއްކޭވަރަށްވުރެ ފުންނާބު އުސް މިނިވަން މީޑިއާތައް ކަމަށެވެ. އެހެން ކަމުން ބައިނަލްއަގުވާމީ މީޑިއާތައް ކުރާ ކަންތައްތަކަށް ދިވެހިސަރުކާރުން ކިތަންމެ ކަންބޮޑުވި ކަމުގައިވިއަސް އެކަން ނުހުއްޓުވޭނެ ކަމަށެވެ. އަދި އެކަންތައްތައް ހުއްޓުވަން އުޅުމުން ސަރުކާރަށް އެކި ގޮންޖެހުންތަކާއި ކުރިމަތިވާނެކަމަށް ހަސީން ވިދާޅުވިއެވެ.

ހަސީން މިހެން ވިދާޅުވިއިރު އަލްޖަޒީއާއިން މިދިޔަ އަހަރުގެ ސެޕްޓެމްބަރުމަހުގެ 7 ވަނަ ދުވަހުގައި ދެއްކި" ސްޓީލިން ޕެރަޑައިސް" ދެއްކުމަށް ހުރަސް އެޅުމަށް އިނގިރޭސި ވިލާތުގެ ޕަބްލިކް ރިލޭޝަންސް ކުންފުންޏެއް ދިވެހި ސަރުކާރުން ކުއްޔަށް ހިފި ކަމަށް އަލްޖަޒީރާއިން ބުނެފައިވެއެވެ. އަދި މި ޑޮކިއުމެންޓަރީ އާ އެއްވެސް ގޮތަކުން ގުޅުން ހުރި ކޮންމެ މީހަކާ މެދު ހަރުކަށި ފިޔަވަޅު އަޅާނެ ކަމަށް ބުނެ ދިވެހި ސަރުކާރުން އިންޒާރު ދިން ކަމަށްވެސް އަލްޖަޒީރާއިން ބުނެފައިވެއެވެ.