މެންޗެސްޓަރ ޔުނައިޓެޑްގެ އިނގިރޭސި ފޯވާޑް މާކަސް ރަޝްފޯޑް ކްލަބްގައި މަޑުކުރުން އެދޭކަމަށް ކޯޗު އެރިކް ޓެން ހާގު ބުނެފިއެވެ.

ކުޅުންތެރިން ހޯދުމުގައި އުނދަގޫތައް ކުރިމަތިވެފައިވާ މެންޗެސްޓަރ ޔުނައިޓެޑްގެ ކޯޗު ބުނީ އޭނާ ރަޝްފޯޑަށް ގަޔާވާ ކަމަށެވެ. އަދި އޭނާގެ ޕްލޭންގައި ރަޝްފޯޑް ހިމެނޭކަމަށާއި, އެކަން ފުރަތަމަ ދުވަހުން ފެށިގެންވެސް ރަޝްފޯޑް އަށް އިނގޭނެކަމަށް ބުންޏެވެ. ޓެން ހާގު ރަޝްފޯޑްގެ ވާހަކަތައް މިދެއްކީ ފްރާންސްގެ ޕީއެސްޖީ 24 އަހަރުގެ ފޯވާޑަށް ދިގު މުއްދަތުގެ އެއްބަސްވުމެއް ހުށަހަޅާ ވާހަކަތައް ދެކެވެމުން ދަނިކޮށެވެ.

މިދިޔަ ސީޒަންވީ ރަޝްފޯޑަށް އުނދަގޫ ސީޒަން އަކަށެވެ. އަނިޔާގެ ސަބަބުން މެޗުތަކެއް ގެއްލުނެވެ. ޕްރިމިއަރ ލީގުގައި ކުޅުނު 25 މެޗުން ޖެހުނީ 4 ގޯލެވެ. ޤައުމީ ސްކޮޑްގެ ޖާގަ ގެއްލުނެވެ. މިސީޒަންގައި ލީގުގައި ޔުނައިޓެޑް ކުޅުނު ފުރަތަމަ މެޗުގެ ފުރަތަމަ އެގާރައިން ފުރުޞަތު ދިނެވެ. އެކަމަކު ބްރައިޓަން އަތުން 2-1 ން ބަލިވި މެޗުގައިވެސް ހުސް ފުރުޞަތެއް ބޭނުން ނުކުރެވި ދިޔައެވެ. އެކަމަކު ކޯޗު ޓެން ހާގު ބުނީ ރަޝްފޯޑަށް އިތުބާރު އެބައޮތް ކަމަށެވެ.