ޓިމާއި އަލަށް ގުޅުމަށް ނިންމާފައިވާ ސާޖިއޯ ގޮމޭޒް އެޓީމުގައި މުހިންމު ދައުރެއް އަދާކުރާނެ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ ބުނީ މި ސީޒަންގައި ގޮމޭޒް ސިޓީއަށް ކުޅޭނެ ކަމަށެވެ. އަދި ޓިމުގައި މުހިންމު ދައުރެއް ގޮމޭޒް އަދާކުރާނެކަން ފާހަގަ ކުރަމުން ގާޑިއޯލާ ބުނީ ސިޓީގެ ވާއަތު ފަޅިން ފަހަތަށް ކުޅޭނީ ގޮމޭޒްކަމަށެވެ. އަދި ޓީމުގެ ފުރަތަމަ 11ގައި ގޮމޭޒް ހިމަނާނެކަމުގެ ޔަގީންކަންވެސް ގާޑިއޯލާ ވަނީ ދީފައެވެ.

ޒުވާން ފުޓުބޯޅަ ކުޅުންތެރިޔާއާއި ސިޓީއާއި ދެމެދު މިހާރު ވަނީ އަނގަބަހުން އެއްބަސްވުމަކަށް އާދެވިފައިކަމަށް ރިޕޯޓުތައް ބުނެއެވެ. މީގެ އިތުރުން ރިޕޯޓުތައް ބުނާ ގޮތުން އޭނާ ހޯދުމަށް ސިޓީއިން ގާތް ގަނޑަކަށް 15 މިލިއަން ޔޫރޯ ޚަރަދުކުރާނެއެވެ. 

އުމުރުން 21 އަހަރުގެ ލެފްޓް ބެކް އޭނާގެ ސީނިއަރ ކެރިއަރު ފެށީ 2017 ވަނަ އަހަރުއެވެ. އޭނާ އެންޑާލެޗަށް ބަދަލުވީ 2021 ވަނަ އަހަރުއެވެ. އެ ޓީމަށް ބަދަލުވެ ގޮމޭޒް ވަނީ 40 މެޗު ކުޅެ ހަ ލަނޑު ޖަހާފައެވެ. މީގެ އިތުރުން އޭނާ އަކީ ސްޕެއިންގެ 21 އަހަރުން ދަށުގެ ޤައުމީ ޓީމަށް ކުޅެމުން އަންނަ ކުޅުންތެރިޔެކެވެ.