ފައިސާއަށް ޚިޔާނާތްތެރިވުމާއި ރިޝަވަތުގެ ކުށް ސާބިތުވެގެން 2017 ވަނަ އަހަރުން ފެށިގެން ޖަލު ހުކުމެއް ތަންފީޒު ކުރަމުން އައި ދެކުނު ކޮރެޔާގެ ސެމްސަންގ ކުންފުނީގެ ވެރިޔާ ލީ ޖެއި ޔޮންގ ރިޔާސީ ޚާއްސަ މައާފެއްގެ ދަށުން ޖަލު ހުކުމުން މިނިވަންކޮށްފިއެވެ.
ލީ އަކީ އެންމެ ބާރުގަދަ މުއްސަނދިންގެ ތެރެއިން ކުށް ސާބިތުވެ ޖަލަށް ހުކުމްކުރެވުނު އެއްފަރާތެވެ. އޭނާގެ މައްޗަށް ވަނީ އެކި ބިޑުތައް ހޯދުމަށް އޭރުގެ ރައީސްއަށް ރިޝްވަތު ދިންކަމަށް ކުށް ސާބިތުވެ ޖަލަށްލުމަށް ދެފަހަރު ހުކުމްކޮށްފައެވެ.
ލީ ޖެއި ޔޮންގ ޖަލުހުކުމުން މިނިވަން ކުރި ސަބަބު ދިފާއުކޮށް، ދެކުނު ކޮރެޔާ ސަރުކާރުން ބުނެފައިވަނީ ކޮވިޑް19 އަށް ފަހު އިގްތިސާދީ ގޮތުން ގައުމު ހަމަޔަކަށް އެޅުވުމަށް ކުރެވެމުން ދާ މަސައްކަތުގައި އެހީތެރިވުމަށް ގައުމުގެ އެންމެ ބޮޑު ކުންފުނި ސެމްސަންގގެ ވެރިޔާގެ މަދަދު ބޭނުންވާތީ އޭނަ މިނިވަން ކުރެވުނީ ކަމުގައެވެ.
ދެކުނު ކޮރެޔާގައި 2013 ވަނަ އަހަރުން 2017 ވަނަ އަހަރަށް ރައީސްކަން ކުރެއްވި ޕާކް ގެއުން ހައިގެ މައްޗަށް ވެސް މަގާމުގެ ނުފޫޒު ނަހަމަ ގޮތުގައި ބޭނުން ކުރެއްވުމާއި ކޮރަޕްޝަން އާއި ފަސާދައިގެ ކުށް ސާބިތުވެ ޖަލަށް ލެވިފައިވާއިރު ސެމްސަންގ ކުންފުނީގެ ވެރިޔާ ލީ ޖެއި ޔޮންގގެ މައްޗަށް ވެސް އޭރު ވަނީ ރައީސްއަށް މަދަދުވެރިވެ ކޮރަޕްޝަންގެ އެކި އަމަލުތަކުގައި ބައިވެރިވެފައިވާ ކަމަށް ކުށް ސާބިތުވެފައެވެ. ރައީސް ޕާކް އަކީ ދެކުނު ކޮރެޔާގައި މަގާމުގައި ހުންނަވަނިކޮން ކޮރަޕްޝަންގެ ދައުވާއަށް ހުށައެޅުނު ފުރަތަމަ ރައީސް އެވެ. މިމައްސަލައިގައި ރައީސް ޕާކްއަށް ފުރަތަމަ ތިރީސް އަހަރުގެ ޖަލު ހުކުމަކާއެކު 17 މިލިއަން ޔޫއެސް ޑޮލަރުގެ ޖޫރިމަނާގެ ހުކުމެއް އިއްވުނެވެ. ނަމަވެސް އެހުކުމުގެ މުއްދަތު ފަހުން ވަނީ 20 އަހަރަށް މަދު ކޮށްފައެވެ. އެއީ ކޮރަޕްޝަނަށް 15 އަހަރު އަދި މަގާމުގެ ނުފޫޒު ނަހަމަ ގޮތުގައި ބޭނުން ކުރެއްވުމަށް ފަސް އަހަރެވެ.
ޕާކްއަށް ފަހު ވަޑައިގެންނެވި ރައިސް މޫން ޖެއި އިންގެ ވެރިކަމުގެ ފަހު ދުވަސްކޮޅު ޚާއްސަ ރިޔާސީ މައާފްއެއް ދެއްވާ 2021 ވަނަ އަހަރުގެ ޑިސެމްބަރު މަހު ވަނީ ރައީސް ޕާކް މިނިވަން ކުރައްވާފައެވެ. މިއަދު ސެމްސަންގ ކުންފުނީގެ ވެރިޔާއަށް ވެސް މިވަނީ ހަމަ އެފަދަ މައާފްއެއް ލިބިފައެވެ.
ދެކުނު ކޮރެޔާގައި އިގްތިސާދުގެ ބޮޑުބައި ހިފަހައްޓަނީ ބިޔަ ވިޔަފާރި ކުންފުނިތަކުންނެވެ. މިގޮތުން އިގުތިސާދުގެ 80 އިންސައްތަ ހިއްސާ ކުރަނީ އެންމެ ބޮޑު ދިހަ ކުންފުނި ކަމަށް ވެއެވެ. މިދިހަ ކުންފުނީގެ ތެރެއިންވެސް އެންމެ ބޮޑު ކުންފުންޏަކީ ސެމްސަންގ އެވެ.
ސްމާޓް ފޯނު އުފައްދާ ދުނިޔޭގެ އެންމެ ބޮޑު ކުންފުނި ސެމްސަންގ، ދެކުނު ކޮރެޔާގެ އެތެރޭގައި މާގިނަ ކަންތައް ކުރެއެވެ. މިގޮތުން އެކުންފުނިން ހޮސްޕިޓަލްތައް ހިންގުން، ހޮޓަލް ވިޔަފާރި، އިންޝުއަރެންސް ޚިދުމަތް ދިނުން، ޝިޕް ޔާޑުތައް އަދި ތީމް ޕާކުތައް ހިންގުން ފަދަ ކަންކަމުގައި އިސް ދައުރެއް އަދާކުރެއެވެ.
