ރައީސްގެ އުންމީދަކީ ރާއްޖޭގައި "ބޮސްކާލިސް" ފަދަ ކުންފުނިތަކެއް އުފެއްދުން: އާޒިމް
އެއާޕޯޓުގެ މަސައްކަތް އަންނަ އަހަރަށް ނިންމާލުމަށް މަސައްކަތް ކުރާނަން - ސަރުކާރު
އެމްޓީސީސީގެ ސީއީއޯ އާދަމް އާޒިމް
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ބޭނުންފުޅުވަނީ ރާއްޖޭގެ ކުންފުނިތަކަކީ ބޮސްކާލިސް ފަދަ ވަރުގަދަ ކުންފުނިތަކަކަށް ހަދަން ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވިއެވެ.
އާޒިމް އެފަދައިން ވިދާޅުވީ ފ.މަގޫދޫގެ އެއާޕޯޓް އެޅުމަށް ބޭނުންވާ ބިން ހިއްކުމުގެ މަސައްކަތް އަމަލީގޮތުން ފެއްޓުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ބޮސްކާލިސް އަކީ ނެދަލޭންޑްސްގެ ކޮންސްޓްރަކްޝަން ކުންފުންޏެކެވެ. އެ ކުންފުންޏަކީ އިމާރާތްކުރުމުގެ ދާއިރާގައި ބައިނަލްއަގުވާމީ ގޮތުން މަޝްހޫރު، އިތުބާރު ލިބިފައިވާ ކުންފުންޏެކެވެ.
އެ ރަސްމިއްޔާތުގައި ވާހަކަދައްކަވަމުން އާޒިމް ވަނީ ރައީސް ސާލިހު އަށް ވަރަށް ބޮޑަށް ތައުރީފުކުރައްވާ ވާހަކަދައްކަވާފައެވެ.
އާޒިމް ވަނީ ފ.މަގުދޫ އެއާޕޯޓަށް ބޭނުންވާ ބިންހިއްކުމުގެ މަސައްކަތް އެކަމަށް ކަނޑައެޅި ވަގުތުގައި ނިންމުމަށް ގިނަ މަސައްކަތްތަކެއް ކުރައްވާނެ ކަމަށް އޭނާ ވަނީ ވިދާޅުވެފައެވެ. ރާއްޖޭގެ ކުންފުނިތަކުން ބިން ހިއްކުން ފަދަ އުމްރާނީ މަސައްކަތްތައް ކުރުމަކީ ރާއްޖޭގެ އިގްތިސާދަށް އެންމެ ފައިދާ ހުރި ގޮތްކަން އާޒިމް ވަނީ ފާހަގަކުރައްވާފައެވެ.
ފ.މަގޫދޫގެ އެއާޕޯޓު އެޅުމުގެ މަސައްކަތް އަންނަ އަހަރުގެ މެދުތެރެއަށް ނިންމާ، ޚިދުމަތް ދެވޭ ވަރު ކުރަން މަސައްކަތް ކުރަމުންދާ ކަމަށް ސަރުކާރުން ބުނެއެވެ. މި މަސައްކަތަކީ އެ ސަރަހައްދުގެ އިގްތިސާދަށް ރަނގަޅު ބަދަލުތަކެއް ގެނެސްދޭނެ މަސައްކަތެއް ކަމަށް ވެސް ސަރުކާރުން ބުނެއެވެ. ފ.މަގޫދޫ އެއާޕޯޓަކީ އެ ރަށުގެ އިތުރުން އެ ސަރަހައްދުގެ ގިނަ ރައްޔިތުންގެ އުންމީދާއި ގުޅިފައިވާ މަސައްކަތެކެވެ.
