ރޮނާލްޑޯ ރެއާލް ދޫކޮށްލުމުން އެންމެ އުހަށް ދިޔުމަށް ބެންޒެމާއަށް ފަސޭހަވި

ކްރިސްޓިއާނޯ ރޮނާލްޑޯ ރެއާލް މެޑްރިޑު ދޫކޮށްލުމުން އޭނާއަށް ކުރިއަށްދާން ފަސޭހަވިކަމަށް އެ ޓީމުގެ މިހާރުގެ ކެޕްޓަން ކަރީމް ބެންޒެމާ ބުނެފިއެވެ.

ނިމުނު ސީޒަނުގައި ބެންޒެމާ ވަނީ ރެއާލަށް 44 ލަނޑު ޖަހައިދީފައެވެ. މީގެ އިތުރުން އޭނާ ވަނީ އެ ޓީމާއެކު ސްޕެނިޝް ލީގާއި، ސްޕެނިޝް ސުޕަ ކަޕާއި، ޔުއެފާ ޗެމްޕިއަންސް ލީގު ކާމިޔާބުކޮށްފައެވެ. މީގެ ތެރެއިން ވެސް ޚާއްސަކޮށް ޗެމްޕިއަންސް ލީގު ފާހަގަކޮށްލެވެއެވެ. ރެއާލުން 13 ވަނަ ފަހަރަށް ޗެމްޕިއަންސް ލީގު ކާމިޔާބުކުރުމުގައި ބެންޒެމާގެ ދައުރު ވަރަށް ބޮޑެވެ.

ރޮނާލްޑޯ އާއި ބެންޒެމާ ވަނީ ރެއާލްގަައި ދެ ކުޅުންތެރިން އެކުގައި ނުވަ އަހަރު ހޭދަކޮށްފައެވެ. ޔުއެފާ ސުޕަ ކަޕްގެ ފައިނަލްގެ ކުރިން އޮތް ޕްރެސް ކޮންފަރެންސްގައި އެކަމާ ގުޅޭ ގޮތުން ސުވާލުކުރުމުން ބެންޒެމާ ބުނީ، ރޮނާލްޑޯ ރެއާލް ދޫކޮށްލުމުން އޭނާއަށް ކަންކަން ވަރަށް ބޮޑަށް ބަދަލުވި ކަމަށެވެ. އޭނާ ބުނީ މިދިޔަ ސީޒަނުގައި އޭނާއަށް ބައިވަރު ލަނޑު ޖެހުނު ކަމަށާއި، ރޮނާލްޑޯ ރެއާލްގައި ހުރިއިރު ތަފާތު ސްޓައިލަކަށް ކުޅޭ ކަމަށެވެ. ބެންޒެމާ ބުނީ އޭރު އޭނާ ގިނައިން އެސިސްޓު ކުރާ ކަމަށެވެ. ނަމަވެސް ދަނޑު މަތީގައްޔާއި ދަނޑުން ބޭރުގައި ރޮނާލްޑޯ އޭނާއަށް އެހީތެރިވެދޭ ކަމަށް ބެންޒެމާ ބުންޏެވެ.

ބެންޒެމާ ބުނީ ރޮނާލްޑޯ ރެއާލް ދޫކޮށްލުމުން އޭނާގެ ގޭމާއި، އެމްބިޝަން ބަދަލުކުރިކަމަށާއި، އެކަން މިވަގުތު ވަރަށް ރަނގަޅަށް އޭނާއަށް ކުރެވޭ ކަމަށެވެ. ރެއާލްގައި ބެންޒެމާ ތަފާތު މޮޅު ކުޅުމެއް މިހާރު ދައްކަމުން އަންނައިރު، އެ ޓީމުގެ ކޯޗު ކާލޯ އަންޗެލޮޓީ ވަނީ ބެންޒެމާގެ ކުޅުމަށް ތައުރީފު ވެސް ކޮށްފައެވެ. އަންޗެލޮޓީ ވަނީ ބެންޒެމާ އަކީ އޭނާގެ ޕްލޭންގައި ހިމެނޭ ވަރަށް މުހިންމު ކުޅުންތެރިޔެއް ކަމަށް ވެސް ބުނެފައެވެ.

ޔުއެފާ ސުޕަ ކަޕްގެ ފައިނަލްގައި ރެއާލް ނިކުންނާނީ އެއިންޓްރަކްޔް ފްރޭކްފާޓާ ދެކޮޅަށެވެ.