މިއަހަރުގެ އިސްލާމިކް ސޮލިޑަރިޓީ ގޭމްސްގައި ދިވެހި ދިދަ އުފުލުމުގެ ޝަރަފު ރާއްޖޭގެ އަންހެން ދުވުންތެރިޔާ ހިމްނާ ހަސަން އާއި ބާސްކެޓުބޯޅަ ކުޅުންތެރިޔާ އިސްމާއިލް ވިލްދާންއަށް ދީފިއެވެ.

ތުރުކީވިލާތުގެ ކޮންޏާގައި އަންގާރަ ދުވަހުގެ ރޭ ބާއްވާ އިސްލާމިކް ސޮލިޑަރިޓީ ގޭމްސްގެ ފެށުމުގެ ރަސްމިއްޔާތުގައި ދިދަ އުފުލުމަށް، މި ދެ އެތުލީޓުންނާއި ދިދަ ހަވާލުކޮށްދެއްވީ ޔޫތު މިނިސްޓަރު އަޙުމަދު މަޚްލޫފްއާއި، މޯލްޑިވްސް އޮލިމްޕިކް ކޮމެޓީގެ ރައީސް މުޙައްމަދު އަބްދުއް ސައްތާރު (ޗަމްޕީ)އެވެ.

އިސްލާމިކް ސޮލިޑަރިޓީ ގޭމްސްގައި ރާއްޖެއިން ހަތަރު ކުޅިވެރެއްގައި ބައިވެރިވާނެއެވެ. އެއީ ޓޭބަލް ޓެނިސް ، ފެތުން، އެތުލެޓިކްސް އަދި ބާސްކެޓުބޯޅައެވެ.

ދިދަ ހަވާލުކުރުމުގެ ރަސްމިއްޔާތުގައި މިނިސްޓަރު މަޚްލޫފް އާއި، ޗަމްޕީގެ އިތުރުން ދިވެހި ކޮންޓިންޖެންޓްގެ ޗެފް ޑި މިޝަން އައިޝަތު ޝިފާނާ ވަޖީހު ވަނީ ދިވެހި އެތުލީޓުންނަށް ހިތްވަރު ދެއްވައި، ކާމިޔާބަށް އެދިލައްވާފައެވެ. މީގެ އިތުރުން ކޮންމެ ކުޅުންތެރިޔަކު ވެސް އެ ކުޅުންތެރިޔަކަށް ކުރެވުނު އެންމެ ބުރަ މަސައްކަތްކޮށް، ކާމިޔާބާއި ހަމައަށް ވާސިލްވުމަށް ވެސް ވަނީ އެދިލައްވާފައެވެ.

މިއަހަރުގެ ގޭމްސްގައި ރާއްޖޭގެ ފަރާތުން 51 އެތުލީޓުންނާއި އޮފިޝަލުން ބައިވެރިވާނެއެވެ.