ފުރަތަމަ 11ގައި ރޮނާލްޑޯ ނުހިމެނި ސަބަބު ޓެން ހާގް ސާފުކޮށްދީފި
ފަރިތަކުރުންތަކުގައި ރޮނާލްޑޯ ބައިވެރިވާން ފެށިތާ ގާތްގަނޑަކަށް ވާނީ 10 ދުވަސް، 90 މިނެޓުގެ މެޗެއް ކުޅެން ބަލާއިރު، އެއީ މަދު ފަރިތަކުރުންތަކެއް
ޔުނައިޓެޑުގެ ޕްރެސްގެ ތެރެއިން ޓެން ހާގް
އައު ސީޒަންގެ ޕްރިމިއަރ ލީގުގައި މެންޗެސްޓަރ ޔުނައިޓެޑުން ކުޅުނު ފުރަތަމަ މެޗުގައި އެ ޓީމުގެ ތަރި ކްރިސްޓިއާނޯ ރޮނާލްޑޯ ނުހިމެނި ސަބަބު ކޯޗު ޓެން ހާގް ސާފުކޮށްދީފިއެވެ.
ބްރައިޓަންއާ ދެކޮޅަށް ކުޅުނު މެޗުގެ ފުރަތަމަ 11 ގައި ރޮނާލްޑޯ ނުހިމެނި ނަމަވެސް ދެ ވަނަ ހާފު ފަށައިގެން 53 ވަނަ މިނެޓުގައި ފްރެޑްގެ ބަދަލުގައި ޓެން ހާގް ވަނީ ރޮނާލްޑޯ އަރުވާފައެވެ. އަމިއްލަ ދަނޑުގައި ޔުނައިޓެޑު ވަނީ ބްރައިޓަން އަތުން 2-1 އިން ބަލިވެފައެވެ.
މެޗަށްފަހު ވާހަކަ ދައްކަމުން ޓެން ހާގް ބުނީ، ޓީމުގެ ފަރިތަކުރުންތަކުގައި ރޮނާލްޑޯ ބައިވެރިވާން ފެށިތާ ގާތްގަނޑަކަށް ވަނީ 10 ވަރަަކަށް ދުވަސް ކަމަށެވެ. އޭނާ ބުނީ 90 މިނެޓުގެ މެޗެއް ކުޅެން ބަލާއިރު، އެއީ މަދު ފަރިތަކުރުންތަކެއް ކަމަށެވެ. ޓެން ހާގް ބުނީ މެޗުގެ ފުރަތަމަ 11 ގައި ރޮނާލްޑޯ ނުހިމެނީ އެ ސަބަބަކަށްޓަކައި ކަމަށެވެ.
އިތުރަށް ވާހަކަ ދައްކަމުން ޓެން ހާގް ބުނީ، އޭނާއަށް ފެންނަ ގޮތުގައި ޔުނައިޓެޑުން މެޗު ފެށީ ރަނގަޅަށް ކަމަށެވެ. ނަމަވެސް ފަހުން ލެވެލް ދައްވީ ކަމަށާއި، އޭގެ ސަބަބުން ގޯސްތަކެއް ހެދުނު ކަމަށެވެ. ޓެން ހާގް ބުނީ ހެދުނު ގޯސްތަކުގެ ފައިދާ ނަގައި ބްރައިޓަން އިން ޔުނައިޓެޑަށް "އަދަބު" ދިނީ ކަމަށެވެ. އޭނާ ފާހަގަ ކުރި ގޮތުގައި ބްރައިޓަން އަކީ ރަނގަޅު ޓީމެކެވެ.
މެޗުގެ ނަތީޖާ އަކީ ގޯސް ނަތީޖާއެއްކަން ފާހަގަ ކުރަމުން ޓެން ހާގް ބުނީ، އޭނާ އަށް ގަބޫލުކުރެވޭ ގޮތުގައި އެއަށްވުރެ ޔުނައިޓެޑު ރަނގަޅުވާން ޖެހޭނެ ކަމަށެވެ. ޕްރީ ސީޒަންގެ މެޗުތައް ރަނގަޅަށް ކުޅެވުނުކަން ފާހަގަކުރަމުން ޓެން ހާގް ބުނީ، ބްރައިޓަން މެޗުގެ ފުރަތަމަ ހާފު ވެސް ދިޔައީ ގޯސްކޮށް ކަމަށެވެ. އޭނާ ބުނީ އެކަމުން ފިލާވަޅު ލިބިގަނެ، އެކަންކަން ރަނގަޅު ކުރަންޖެހޭކަނަށް ސާފުކަމަށެވެ.
ލީގުގައި ޔުނައިޓެޑުގެ ދެ ވަނަ މެޗުގައި އެ ޓީމު ނުކުންނާނީ މި މަހުގެ 13 ވަނަ ދުވަހު ބްރެންޓްފޯޑާ ދެކޮޅަށް ރަށުން ބޭރުގައެވެ.
