އިސްލާމީ ޝަރީއަތުގައި ކަނޑައަޅާފައިވާ އުގޫބާތްތައް ދިނުމަށް ގޮވާލައްވައި، ޖާބިރުގެ ކުއްލި މައްސަލައެއް
7 އޯގަސްޓު 2022 | އާދީއްތަ 16:19މިއީ އެއްޖިންސުން ގުޅުން ހިންގުންފަދަ ކުށްތައް އިތުރުވަމުންދާތީ ހުށަހެޅުއްވި މައްސަލައެއް
އަބްދުﷲ ޖާބިރު
އިސްލާމީ ޝަރީއަތުގައި ކަނޑައަޅާފައިވާ އުގޫބާތްތައް ވަގުތުން ވަގުތަށް ދިނުމަށް ގޮވާލައްވައި، ކ. ކާށިދޫ ދާއިރާގެ މެމްބަރު އަބްދުﷲ ޖާބިރު ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.
މިއީ ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ ދަށުން ހުށަހަޅާ ކުއްލި މައްސަލައެކެވެ.
ޖާބިރު ވިދާޅުވީ، މި ކުއްލި މައްސަލައަކީ، ފަހަކަށް އައިސް މި ދިވެހިރާއްޖޭގައި ﷲ ތައާލާ ނަހީކުރައްވާފައިވާ ބޮޑެތި ފާފަތަކަށް އެއްވެސް ޖެހިލުމެއްނެތި އަރައިގަންނަމުންދާ މީހުންގެ އަދަދު އިތުރުވަމުންދިއުމާއި، އޭގެތެރޭގައި ކީރިތި ޤުރުއާނުގެ ނަސްޚުން ހައްދު ކަނޑައެޅިފައިވާ ބޮޑެތި ފާހިޝް އަމަލުތައްކަމުގައިވާ; ލިވާތުކުރުމާއި، ސިހާގުކުރުމާއި، އިންސާނުން ގަތުލުކުރުންފަދަ ބޮޑެތި ޖަރީމާތައް ހިނގުން އިތުރުވަމުންދާތީ ހުށަހަޅުއްވާފައިވާ މައްސަލައެއްކަމަށެވެ. އަދި މިއީ މަޖިލީހުގައި ކުއްލި ބަހުސެއްކޮށް، މި އަބާއްޖަވެރިކަމުން ދިވެހި ގައުމާއި ރައްޔިތުން ދުރުކުރާނެ ގޮތްތަކުގެ މައްޗަށް އިހުނަށްވުރެ ބޮޑަށް ސާބިތުވެ ތިބެ، އިސްލާމީ ޝަރީއަތުގައި މިފަދަ ކަންކަމަށް ކަނޑައަޅާފައިވާ އުގޫބާތްތައް ވަގުތުން ވަގުތަށް ދިނުމަށް ގޮވާލުމަށްޓަކައި ހުށަހަޅުއްވާފައިވާ ކުއްލި މައްސަލައެއްކަމަށް އޭނާ ވިދާޅުވިއެވެ.
ދުވަހަކުވެސް ދިވެހިން އަޑުއަހާފައިނުވާ މިންވަރަށް އެއްޖިންސުން ގުޅުން ހިންގުމުގެ އޮއިވަރެއް ދިވެހީންގެ ތެރެއަށް މިއަދު މިވަނީ ފާވެފައި ކަމަށާއި، ރައްޔިތުންގެ މަޖިލީހުން ފާސްކޮށް އަމަލުކުރުމުންދާ ޖިންސީ ކުށުގެ ގާނޫނުގައި މި ކުށަށް އަދަބު ކަނޑައެޅިފައިވާކަމަށް ކުއްލި މައްސަލައިގައި ބުނެފައިވެއެވެ. ޖާބިރު ވަނީ، ޖިންސީ ކުށުގެ ގާނޫނުގައި މި ކުށަށް އަދަބު ކަނޑައެޅިފައިވާގޮތް ތަފްސީލުކޮށްދެއްވާފައެވެ. ނަމަވެސް އިސްލާމީ ޝަރީއަތުގައި މިކަމަށް އޮތް އުގޫބަތަކީ ކޮބައިކަން ދިރާސާކޮށް، ބަހުސްކޮށް، ވަޟައީ ގާނޫނުތަކުގައި އިންސާނުން ރުއްސަން ދީފައިވާ ލުއިތައް އަނބުރާ ގެނެސް، އިސްލާމީ ޝަރީއަތް، މިފަދަ ބޮޑެތި ޖަރީމާތައް ހުއްޓުވުމަށްޓަކައި ތަންފީޒުކުރަން ޖެހޭކަމަށް ޖާބިރުގެ ކުއްލި މައްސަލައިގައި ބުނެފައިވެއެވެ.
މާލިކީ މަޒުހަބާއި ހަންބަލީ މަޒުހަބުގެ އިލްމުވެރިން ދެކެވަޑައިގަންނަވާގޮތުގައި، ލިވާތުކުރާމީހާގެ އަދަބަކީ ރަޖްމުކުރުން ކަމުގައި، ކުއްލި މައްސަލައިގައި ބަޔާންކޮށްފައިވެއެވެ. ޒިނޭ ހަރާމްކުރެއްވިފަދައިން ލިވާތުވެސް ވަނީ ހަރާމްކުރައްވައިފައި ކަމަށާއި، އިލްމުވެރިން ވިދާޅުވާގޮތުގައި އެއީ ޒިނޭކުރުމަށްވުރެވެސް ނުބައިކަންބޮޑު އަމަލެއްކަމަށް، ކުއްލި މައްސަލައިގައި ބުނެފައިވެއެވެ.
