އިޒްރޭލު ޣައްޒާ އުދުވާން: ނުކުޅެދޭ 4 ދަރިންނާއެކު ސަލާމަތްވާން ލިބުނީ އެންމެ 15 މިނެޓް!
ފުރޮޅުލީ ގޮނޑިތަކުގައި ތިބި ކުދިން ދުއްވައިދިނީ އެހެން މީހުން، އެވަގުތު ޑްރޯން ހަމަލާ އާއި ވައިގެ މަގުން ދިން ހަމަލާއެއްގައި ގެތައް ބިމާ ހަމަކޮށްލި
ފަލަސްތީނުގެ އިސްލާމިކް ޖިހާދަށް ދެކޮޅަށް ކަމަށް ބުނެ ޣައްޒާގައި، ޔަހޫދީ އިޒްރޭލުން ހިންގާ ކެމްޕޭން އޯގަސްޓް 6 ވަނަ ދުވަހުވެސް ހުއްޓުމެއްނެތި ކުރިއަށް ގެންދިޔަ
ފަލަސްތީނުގެ އިސްލާމިކް ޖިހާދަށް ދެކޮޅަށް ކަމަށް ބުނެ ޣައްޒާގައި، ޔަހޫދީ އިޒްރޭލުން ހިންގާ ކެމްޕޭން އޯގަސްޓް 6 ވަނަ ދުވަހުވެސް ހުއްޓުމެއްނެތި ކުރިއަށް ގެންދިޔައެވެ. އާންމު ރައްޔިތުން ހިމާޔަތް ހޯދަމުން ދިޔަ ގެތަކަށްވެސް ހަމަލާތައް އަމާޒު ކުރިއިރު، ފުރާނަ ސަލާމަތް ކުރުމަށް ރައްކާތެރި ހިސާބުތަކަށް ބަދަލުވާން ދިނީ އެންމެ 15 މިނެޓްގެ ފުރުޞަތެއް ކަމަށް އެ ސަރަހައްދުގެ ރަށްވެހިން ބުނެއެވެ.
އުމުރުން މިހާރު 68 އަހަރު ފުރިފައި ވާ ނާދިޔާ ޝަމަލަޚްއަކީ ޚާއްޞަ އެހީއަށް ބޭނުންވާ 4 ދަރިންގެ މަންމައެކެވެ. އުދުވާނީ ހަމަލާ އަންނަން އުޅޭ ކަމުގެ އިންޒާރާއެކު އަމިއްލަ ގެ ދޫކޮށްލާފައި ނުކުތީ ހުސް އަތާއެވެ.
ޖެހިގެން ހުރީ ނާދިޔާގެ ތިމާގެ މީހަކު ދިރިއުޅެމުން ދިޔަ އިމާރަތެކަށްވާއިރު، އެ އިމާރަތަށް އަމާޒުވި ހަމަލާގައި ނާދިޔާގެ ގެވެސް ބިމާ ހަމަވިއެވެ. އޭނާ މިއަދު އިނީ ބޯހިޔާކޮށްލާނެ ފަދައެއް ނެތި، ދާނެ އިތުރު ތަނެއް ނޭނގިފައެވެ. އޭނާގެ ހާލަތު، މީޑިއާއާ ހިއްސާ ކުރަމުން ދިޔައީ ވެއްޓިފައިވާ ގޭގެ ގާކުނޑިތަކުގެ މަތީގައި އިނދެގެންނެވެ.
ހޮނިހިރު ދުވަހަކީވެސް އިޒްރޭލުގެ އުދުވާންތައް މެދުކެނޑުމެއްނެތި ކުރިއަށް ދިޔަ ދުވަހެކެވެ. މުޅި ޣައްޒާގެ ފަޒާ ކިލަނބު ކޮށްފައި ވަނީ ސުންނާފަތި ވަމުން ދިޔަ ގެތަކުން ބޭރުވަމުން ދިޔަ ގާކުނޑީގެ ހިރަފުހާއި ދުމުންނެވެ. އިސްލާމިކް ޖިހާދުންވެސް ވަނީ އިޒްރޭލަށް ރައްދު ހަމަލާތަކެއް ދީފައެވެ.
ޣައްޒާއަށް ދެމުންދާ ހަމަލާތަކުގެ ދިފާއުގައި އިޒްރޭލުން ބުނަމުން ދަނީ، ހަމަލާ އަމާޒު ކުރަނީ އިސްލާމިކް ޖިހާދުން ހަތިޔާރު ގުދަން ކުރަން ބޭނުން ކުރާ ތަންތަނަށް ކަމަށެވެ. ނުވަތަ ކޮމާންޑް ސެންޓަރުތަކަށް ކަމަށެވެ. އެއީ އާންމުންވެސް ދިރިއުޅެމުންދާ ތަންތަނަށް ވާއިރު، ހަމަލާގެ ކުރިން އިންޒާރު ދީފައި ވާނެ ކަމަށްވެސް އިޒްރޭލުން ބުނެއެވެ. ނަމަވެސް ދިނީ އެންމެ 15 މިނެޓްގެ އިންޒާރެއްތޯ ކުރި ސުވާލަށް އިޒްރޭލުން ޖަވާބުދާރީ ވެފައެއް ނުވެއެވެ.
ސިއްހީ އޮފިޝަލުން ވިދާޅުވި ގޮތުގައި އިޒްރޭލުގެ މަތިންދާބޯޓުތަކުން ޣައްޒާގެ 8 ގެއަކަށް ހަމަލާދީ، އެތައް ބަޔަކު ޒަޚަމްކޮށްލިއެވެ. ގިނަ އާއިލާތަކެއް މިއަދު ތިބީ ގެދޮރު ގެއްލިފައިވާ ހާލުގައެވެ. ހުކުރު ދުވަހު ދޭން ފެށި ހަމަލާތަކުގެ ބާރު އިތުރަށް ގަދަ ކުރާ ކަމަށް މައުލޫމާތު ލިބެއެވެ. މި އޮޕަރޭޝަންގައި މިހާތަނަށް 15 މީހެއްގެ ފުރާނަ ގެއްލިފައި ވާ ކަމަށް މައުލޫމާތު ލިބެއެވެ.
ޣައްޒާގެ ނުކުޅެދޭ ރަށްވެއްސެއް ކަމަށްވާ ސަފާ ޝަމަލަޚް އަށް ލިބުނު މެސެޖެއް އޭނާ ކިޔާދިނެވެ.
އިޒްރޭލުން ބުނާ ގޮތުގައި، ހަމަލާ ދޭން ފެށީ، އިސްލާމިކް ޖިހާދުގެ ސަބަބުން އިޒްރޭލުގެ ރައްޔިތުންނަށް އޮތް ނުރައްކަލާ ހެދިއެވެ. ޣައްޒާ ކޮންޓްރޯލް ކުރަމުންދާ ހަމާސް ޖަމާއަތާއި އިސްލާމިކް ޖިހާދުންވެސް ހަތިޔާރު ފޮރުވަމުން ދަނީ އާންމުން ދިރިއުޅޭ ސަރަހައްދުތަކުގައި ކަމަށް އިޒްރޭލުން ތުހުމަތު ކުރެއެވެ.
އިޒްރޭލުގެ ތުހުމަތުތަކަށް އިސްލާމިކް ޖިހާދުން އިންކާރު ކުރެއެވެ. އަދި އިޒްރޭލުން ދައްކަމުންދާ ބަހަނާތަކަކީ، މަދަނީ ފަރުދުންނާ ދެކޮޅަށް ހިންގާ ޖަރީމާތަކުގެ ދިފާއުގައި ދައްކާ ބަހަނާތަކެއް ކަމަށްވެސް އިސްލާމިކް ޖިހާދުން ބުނެއެވެ.
ހުޅަނގުން ސިފަ ކުރާ އިސްލާމިކް ޖިހާދު މޫވްމަންޓް އިން ޕަލަސްޓައިން ނުވަތަ ހަރަކާތު އަލް-ޖިހާދު އަލް ފަލަސްތީނަކީ ދިމިޝްކުގައި މަރުކަޒު ކޮށްގެން 1981 ވަނަ އަހަރުން ހިންގަމުން އަންނަ ޖަމާއަތެކެވެ. އިސްލާމިކް ޖިހާދަކީ، ވަކިވެފައި ވާ މިނިވަން 2 ދައުލަތުގެ ގޮތުގައި އިޒްރޭލާއި ފަލަސްތީނު އުފެދުމުގެ ރައުޔަށް އިންކާރު ކުރާ ޖަމާއަތެކެވެ.
