އެސްޓީއޯގެ ރޭޑިއޯގްރަފީ ކޯހުގައި ބައިވެރިވުމުގެ ފުރުސަތު މިމަހުގެ 14އަށް
ޝަރުތު ފުރިހަމަވިނަމަވެސް ކޯހަށް ނަގާނީ އެންޓްރީ އެގްޒާމުން ފާސްވާ މީހުން
އެސްޓީއޯ
ސްޓޭޓް ޓްރޭޑް އޯގަނައިޒޭޝަން (އެސްޓީއޯ)ގެ ޑިޕްލޮމާ ލެވެލްގެ ރޭޑިއޯގްރަފީ ކޯހަށް ކުރިމަތިލުމުގެ ފުރުސަތު މިމަހުގެ 14 ވަނަ ދުވަހަށް ހަމަވާނެކަމަށް އެސްޓީއޯއިން ބުނެފިއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އެސްޓީއޯގެ ޓެލެންޓް ޑިވެލޮޕްމަންޓް މެނޭޖަރ މަރިޔަމް ލުލު ވިދާޅުވީ ޖުލައި 7 ވަނަ ދުވަހު ކޯހަށް ކުރިމަތިލުމަށް ހުޅުވާލާފައިވާއިރު މިހާތަނަށް އައިއިރު ރަނގަޅު ތަރުޚީބެއް ކޯހަށް ލިބިފައިވާކަމަށެވެ. ކޯހުގެ ޝަރުތަކީ ޖީސީއީ އޭ ލެވެލް އިން ސައިންސްޓްރީމް އިން މަދުވެގެން ދެ މާއްދާ އިން ސީ ފާސް ލިބިފައިވުމާއިއެކު އިނގިރޭސި މާއްދާއިން ދަށްވެގެން ސީ ފާސް ލިބިފައިވުމެވެ.
ލުލު ވިދާޅުވީ ޝަރުތު ފުރިހަމަވިނަމަވެސް ކޯހަށް ނަގާނީ އެންޓްރީ އެގްޒާމުން ފާސްވާ މީހުންކަމަށެވެ. ކޯސް ކުރިޔަށްދާނީ އިންޑިޔާގެ ޖީއީ ހެލްތު ކެއަރ އާއި ގުޅިގެންކަމަށާއި މިއީ ދިވެހި ސަރުކާރު ގަބޫލުކުރާ ކޯހެއްކަމަށް ލުލު ވިދާޅުވިއެވެ.
ކޯހުގައި ކިޔަވައިދޭނީ އިންޑިޔާގެ ޖީއީ ހެލްތު ކެއަރ ގެ ޕްރޮފެޝަނަލުންނާއި ރާއްޖޭގެ ބައެއް ލެކްޗަރަރ އިން ކަމަށް ލުލު ވިދާޅުވިއެވެ.
މީގެއިތުރުން މިކޯހަކީ އެސްޓީއޯއިން ފުލް ސްކޮލަރޝިޕް ދޭ ކޯސްތަކެއްކަމަށް ލުލު ވިދާޅުވިއެވެ. ކިޔެވުމަށްދާ ޚަރަދާއި ޓިޔުޝަން ފީގެ އިތުރުން ކޮންމެ މަހަކު 2300 ރުފިޔާ ޕޮކެޓް މަނީގެ ގޮތުގައިދޭނެކަމަށް ލުލު ވިދާޅުވިއެވެ. ދެ އަހަރުގެ މުއްދަތަކަށް ކުރިޔަށްގެންދާ މިކޯހުގައި 6 މަސް ދުވަހުގެ އަމަލީ ތަޖުރިބާ ހޯދަންޖެހޭނެއެވެ. އަމަލީ ތަޖުރިބާ ކުރިޔަށްދާނީ މާލެ ސަރަހައްދުގައި ހުރި ހޮސްޕިޓަލްތަކުގައި ކަމަށް ލުލު ވިދާޅުވިއެވެ.
މީގެއިތުރުން ކޯސް ފުރިހަމަކުރާ ދަރިވަރުންނަށް ރާއްޖޭގެ ހޮސްޕިޓަލް، ކްލިނިކް އަދި ހެލްތު ސެންޓަރުތަކުގެ ރޭޑިއޯގްރަފީ ޑިޕަޓްމަންޓުން ވަޒީފާ ހަމަޖެހިގެންދާނެކަމަށް ލުލު ވިދާޅުވިއެވެ. އެކަމާއި ގުޅޭ އެއްބަސްވުމުގައި ހެލްތު މިނިސްޓްރީ އާއިއެކު ސޮއިކޮށްފައިވާކަމަށް ލުލު ވިދާޅުވިއެވެ.
ކޯހާއި ގުޅޭ މައުލޫމާތުތައް އެސްޓީއޯގެ ސޯޝަލް މީޑިޔާ އެކައުންޓްތަކުން ލިބޭނެކަމަށާއި މީގެއިތުރުން އެސްޓީއޯގެ ޓީމުތައް ކުރިޔަށް އޮތް ހަފުތާގައި އެކިއެކި ރަށްރަށަށް ދަތުރުކުރުމަށް ހަމަޖެހިފައިވާކަމަށް ލުލު ވިދާޅުވިއެވެ.
ވެބްސައިޓް މެދުވެރިކޮށްވެސް ކޯހަށް އެޕްލައިކުރެވޭނެކަމަށް ލުލު ވިދާޅުވިއެވެ.
