އިޒްރޭލުން ގާޒާއަށް ދިން ހަމަލާތަކެއްގައި 10 މީހުން ޝަހީދުކޮށްލައިފި

އިޒްރޭލުން ފަލަސްތީނުގެ ގާޒާއަށް ދިން ވައިގެ ހަމަލާތަކެއްގައި ފަލަސްތީނުގެ 10 މީހަކު ޝަހީދު ކޮށްލައިފިއެވެ.

އިޒްރޭލުން މި ހަމަލާތައް ދޭންފެށީ ހުކުރު ދުވަހުއެވެ. ފަލަސްތީނަށް ދިން ހަމަލާތަކުގައި އެ ގައުމުގެ 10 މީހަކު ޝަހީދުވެފައިވާއިރު މީގެތެރޭގައި 5 އަހަރުގެ ކުޑަކުއްޖަކުވެސް ހިމެނެއެވެ. މި ހަމަލާތަކުގައި 55 އަށްވުރެ ގިނަ މީހުން ވަނީ ޒަޚަމްވެފައެވެ.

އިޒްރޭލުގެ ހަމަލާތަކުގައި ޝަހީދުވެފައިވާ މީހުންގެ ތެރޭގައި އިސްލާމިކް ޖިހާދުގެ އިސް ލީޑަރެއް ކަމުގައިވާ ތައިސީރު އަލްޖާބަރީވެސް ހިމެނެއެވެ. އިޒްރޭލުން މި ހަމަލާތައް ދޭން ފަށާފައިވަނީ، މިދިޔަ އަންގާރަ ދުވަހުން ފެށިގެން ގާޒާއަށް ވަދެ ނިކުމެވޭ ހުރިހާ މަގެއް ބަންދުކޮށްފައި ބޭއްވުމަށްފަހުއެވެ.

ގާޒާ ބަންދުކުރިކަމަށް އިޒްރޭލުން ބުނަނީ، މި މަހުގެ ފުރަތަމަ ދުވަހު އިސްލާމިކް ޖިހާދު ޖަމާއަތުގެ އިސްވެރިއެއް ކަމަށްވާ ބައްސާމް އައްސާދީ ހައްޔަރުކުރުމާގުޅިގެން ފަލަސްތީނުުގެ ޖަމާއަތްތަކުން ހަމަލާތައް ދީފާނެކަމަށް ބަލާފައެވެ.

އިޒްރޭލުން ގާޒާއަށްދިން މިހަމަލާތަކާ ގުޅިގެން އިސްލާމިކް ޖިހާދު ގްރޫޕުން ވަނީ، އެ ހަމަލާތަކުގެ ބަދަލުގައި ރޮކެޓް ހަމަލާ ދީފައެވެ. އެ ގްރޫޕުން ބުނެފައިވާގޮތުގައި އިޒްރޭލުގެ ތެލްއަވީވް ހިމެނޭހެން ގިނަ ސިޓީތަކަށް 100ށްވުރެ ގިނަ ރޮކެޓް ހަމަލާ ވަނީ ދީފައެވެ.

އިޒްރޭލުގެ އެމްބިއުލާންސް ސަރވިސްއާ ހަވާލާދީ ރޮއިޓަރސްގައި ބުނެފައިވާގޮތުގައި، މި ހަމަލާތަކުގައި އިޒްރޭލުން އެއްވެސް މީހަކު މަރުވެފައެއްނުވެއެވެ.

މިއީ އިޒްރޭލާ ހަމާސްއާ ދެމެދު 2021 ވަނަ އަހަރުގެ މެއި މަހު ހިނގި ހަމަނުޖެހުންތަކަށްފަހު މިފަދަ ހަމަލާތަކެއް ބަދަލުކުރި ފުރަތަމަ ފަހަރެވެ. މިދިޔަ އަހަރުގެ މެއިމަހު އިޒްރޭލުން ދިން ހަމަލާތަކުގައި ފަލަސްތީނުގެ 250އެއްހާ މީހުން ވަނީ ޝަހީދުވެފައެވެ.