ރަހަ ތަފާތުކޮށްލަން، ބޭކްޑް ބީންސްއާއި ސޯއީ ސޯސް އައިސްކްރީމް ކިހިނެއްވާނެ؟

މި ދުވަސްވަރަކީ ކެއިންބުއިމުގެ އާދަތަކަށްވެސް އިންގިލާބީ ބަދަލުތަކެއް އަންނަމުންދާ ދުވަސްވަރެކެވެ. ވަކިން ޚާއްސަކޮށް، ކޮވިޑް-19ގެ ފުރަބަންދާއެކު ޒާތްޒާތުގެ ކާބޯތަކެތި ތައާރަފުވާ މިންވަރު އިތުރުވެގެންދިޔައެވެ. މީގެ ކުރިން ހީވެސްނުކުރާފަދަ ތަފާތު އެތައް ރަހަތަކެއް ލިބެން ހުރިނަމަވެސް، ބޭކްޑް ބީންސްއިން އައިސްކްރީމް ތައްޔާރު ކޮށްފައިވެސް އެބަހުއްޓޭ ދެންނެވުމުން، ގަބޫލުކުރަން މާ ފަސޭހަނުވެދާނެއެވެ.

މި ދުވަސްވަރަކީ ވިލާތުގެ އެކި ސަރަހައްދުތަކަށް އާދަޔާ ޚިލާފަށް ހޫނުގަދަވަމުން ދާ ދުވަސްވަރެއް ކަމުން، ކޮންމެ މީހަކުވެސް ބަލަމުން ދަނީ އެމީހަކަށް ވީ ވަރަކުން ކޮންމެވެސް ކަހަލަ ފިނި ކެއުމަކަށް، ނުވަތަ ބުއިމަކަށް އިންސާފު ކުރެވޭތޯއެވެ. އެގޮތުން އައިސްކްރީމަކީ އާދަޔާ ޚިލާފު ގަދަ ހޫނުގެ ދިލަގަނޑަށް އެންމެ އެކަށީގެންވާ އެއްޗެއް ކަމަށް ގިނަ ބަޔަކަށް އިއްތިފާގުވެއެވެ.

ގަދަ ހޫނުގެ ތެރޭގައި ފިނި ބުއިމެއްގެ އިންތިޒާރުގައި ތިބި ލަންޑަންގެ ރަށްވެހިންނަށް މިފަހަރު މަރުހަބާކީ، ފޮނި އައިސްކްރީމް އެކަންޏެއް ނޫނެވެ. ތަފާތު އެކި ރަހަތަކުގެ އައިސްކްރީމެވެ. އޭގެ ތެރޭގައި އޯޓްސް ބަތްޕެން އައިސްކްރީމާއި ތަފާތު އެކި ބާވަތްތަކުގެ ސޯސްތަކުން ތައްޔާރުކޮށްފައި ހުރި އައިސްކްރީމް ފްލޭވަރތައްވެސް ހިމެނެއެވެ.

ކޮންމެ ފްލޭވަރއަކީވެސް ކަސްޓަމަރުންގެ މެދުގައި އިންތިހާއަށް މަގުބޫލު ފްލޭވަރއަކަށްވެސް ވަނީ ވެފައެވެ.

އާދަޔާޚިލާފު އައިސްކްރީމް ފްލޭވަރތައް ވަނީ ޓިކްޓޮކްފަދަ ސޯޝަލް މީޑިއާ އެޕްލިކޭޝަންތައްވެސް ފަތަހަ ކޮށްފައެވެ. ކަން މިހެން އޮތްނަމަވެސް އައިސްކްރީމްގެ އާދަޔާ ޚިލާފު ފްލޭވަރތަކަކީ އެންމެނަށް މާ ގާޔާވާ އެއްޗަކަށްވެސް ނުވެއެވެ.

ލަންޑަންގައި ހިންގާ އަންޔާ ހައިންޑްމާޗްގެ މުވައްޒަފެއްކަމަށްވާ ހަނާ ވަރން ބުނީ، އައިސްކްރީމް ޕްރޮޖެކްޓަކީ، އިނގިރޭސިވިލާތުގެ ބަދިގެ ކަބަޑްތަކުން ލިބެން ހުރި ބާވަތްތަކުގެ ތަފާތު ރަހައެއް، ކަސްޓަމަރުންނަށް ހޯދައިދޭ މަޝްރޫއެއްކަމަށެވެ. އަދި އެއީ ވަރަށް "ހިޓް" ނުވަތަ ކާމިޔާބު މަޝްރޫއެއްކަމަށެވެ.

ހަނާ ބުނިގޮތުގައި މީގެ ކުރިން 6 ހަފުތާއިން ވިއްކާލެވޭހާ އައިސްކްރީމް، އެންމެ 4 ދުވަހުގެ ތެރޭގައި ވަނީ ވިކިފައެވެ. އަދި ބައެއް ކަސްޓަމަރުންނަކީ ކޮންމެ ދުވަހަކުވެސް އެކި ރަހަތައް ތަޖުރިބާކުރަން ޒިޔާރަތްކުރާ، ރެގިއުލާރ ކަސްޓަމަރުންކަންވެސް ހަނާ ވަނީ އުފަލާއެކު ފާހަގަކޮށްފައެވެ.

އާދަޔާ ޚިލާފު، ތަފާތު ރަހަތަކެއް ތަޖުރިބާކޮށްލުމުގެ ފުރުސަތު ފަހިކޮށްދޭ އައިސްކްރީމް ޕްރޮޖެކްޓް، އޯގަސްޓް 28 ވަނަ ދުވަހުގެ ނިޔަލަށް ލަންޑަންގައި ކުރިއަށް ގެންދިއުމަށް ވަނީ ހަމަޖެހިފައެވެ.