މި ދުވަސްވަރަކީ ކެއިންބުއިމުގެ އާދަތަކަށްވެސް އިންގިލާބީ ބަދަލުތަކެއް އަންނަމުންދާ ދުވަސްވަރެކެވެ. ވަކިން ޚާއްސަކޮށް، ކޮވިޑް-19ގެ ފުރަބަންދާއެކު ޒާތްޒާތުގެ ކާބޯތަކެތި ތައާރަފުވާ މިންވަރު އިތުރުވެގެންދިޔައެވެ. މީގެ ކުރިން ހީވެސްނުކުރާފަދަ ތަފާތު އެތައް ރަހަތަކެއް ލިބެން ހުރިނަމަވެސް، ބޭކްޑް ބީންސްއިން އައިސްކްރީމް ތައްޔާރު ކޮށްފައިވެސް އެބަހުއްޓޭ ދެންނެވުމުން، ގަބޫލުކުރަން މާ ފަސޭހަނުވެދާނެއެވެ.
މި ދުވަސްވަރަކީ ވިލާތުގެ އެކި ސަރަހައްދުތަކަށް އާދަޔާ ޚިލާފަށް ހޫނުގަދަވަމުން ދާ ދުވަސްވަރެއް ކަމުން، ކޮންމެ މީހަކުވެސް ބަލަމުން ދަނީ އެމީހަކަށް ވީ ވަރަކުން ކޮންމެވެސް ކަހަލަ ފިނި ކެއުމަކަށް، ނުވަތަ ބުއިމަކަށް އިންސާފު ކުރެވޭތޯއެވެ. އެގޮތުން އައިސްކްރީމަކީ އާދަޔާ ޚިލާފު ގަދަ ހޫނުގެ ދިލަގަނޑަށް އެންމެ އެކަށީގެންވާ އެއްޗެއް ކަމަށް ގިނަ ބަޔަކަށް އިއްތިފާގުވެއެވެ.
ގަދަ ހޫނުގެ ތެރޭގައި ފިނި ބުއިމެއްގެ އިންތިޒާރުގައި ތިބި ލަންޑަންގެ ރަށްވެހިންނަށް މިފަހަރު މަރުހަބާކީ، ފޮނި އައިސްކްރީމް އެކަންޏެއް ނޫނެވެ. ތަފާތު އެކި ރަހަތަކުގެ އައިސްކްރީމެވެ. އޭގެ ތެރޭގައި އޯޓްސް ބަތްޕެން އައިސްކްރީމާއި ތަފާތު އެކި ބާވަތްތަކުގެ ސޯސްތަކުން ތައްޔާރުކޮށްފައި ހުރި އައިސްކްރީމް ފްލޭވަރތައްވެސް ހިމެނެއެވެ.
ކޮންމެ ފްލޭވަރއަކީވެސް ކަސްޓަމަރުންގެ މެދުގައި އިންތިހާއަށް މަގުބޫލު ފްލޭވަރއަކަށްވެސް ވަނީ ވެފައެވެ.
އަހަރަމެން މިތަނަށް އައީ މިއަދު ވަރަށް ހެނދުނާ. މި ހުރިހާ ރަހައެއް ތަޖުރިބާ ކޮށްލަން ވަރަށް އެކްސައިޓް ވެފަ މި ތިބެނީ މުޅި ދުވަހުވެސް. ވަރަށް ކަމުދޭ. ވަރަށް މަޖާ. އާނ! ކުދިންނަށްވެސް ވަރަށް މަޖާ. އަހަރަމެން ވަރަށް ގަޔާވޭ... ނޫންތަ؟އޭޑްރިއަން ކޮންވައިޒާ؛ ކަސްޓަމަރެއް
އާނ... ވަރަށް އާދަޔާ ޚިލާފު ފްލޭވަރތައް އެބަހުރި. ބައިވަރު ފްލޭވަރތައް ތަޖުރިބާ ކުރަން ދައްތައާ އަހަރެންވެސް ވަރަށް އެކްސައިޓަޑް. މިހާރު ގިނަ ރަހަތައް ބަލާލެވިއްޖެ. އެންމެ އާދަޔާޚިލާފު ވައްތަރަކަށް ފެނުނީ ކެޗަޕްއާއި ބޭކްޑް ބީންސް. އެއީ މީހަކު ކާނެ އެންމެ އާދަޔާޚިލާފު އެތިއިޒީ ކޮންވައިޒާ؛ އުމުރުން 9 އަހަރުގެ ކަސްޓަމަރެއް
އާދަޔާޚިލާފު އައިސްކްރީމް ފްލޭވަރތައް ވަނީ ޓިކްޓޮކްފަދަ ސޯޝަލް މީޑިއާ އެޕްލިކޭޝަންތައްވެސް ފަތަހަ ކޮށްފައެވެ. ކަން މިހެން އޮތްނަމަވެސް އައިސްކްރީމްގެ އާދަޔާ ޚިލާފު ފްލޭވަރތަކަކީ އެންމެނަށް މާ ގާޔާވާ އެއްޗަކަށްވެސް ނުވެއެވެ.
އަންހެން ކުއްޖަކު މިތަނަށް އައިސް އުޅޭ ޓިކްޓޮކް ވީޑިއޯ ފެނުނީ... އެހެންވެ މިތަނަށް އަންނަން ނިންމީ. ފުރަތަމަ އައީ މިދިޔަ ހަފުތާ ބަންދުގަ. އެކަމަކު މީހުން ގިނަ ކަމުން، ދެން އަނެއްކާވެސް މިއަދު މި އައީ. އަދި މިހާހިސާބަށް ރަހަ ބަލާލެވުނީ މެޔޮނައިޒްއާ ކެޗަޕް ފްލޭވަރ. މެޔޮނައިޒް ފްލޭވަރ އެހާ ކަމަކުނުދޭ. ކެޗަޕް ފްލޭވަރ ކޮންމެވެސް ވަރަކަށް ރަނގަޅު. އެކަމަކު، މަށަކީ ވަރަށް ފޮނި އެއްޗެއްސަށް ލޯބި ކުރާ މީހަކަށް ވެފަ، ކެޗަޕް އައިސްކްރީމް އެހާ ފޮނި ނޫންވީމަ، މާ ބޮޑަކަށް ކަމަކުނުދޭކަސްޓަމަރެއް
ލަންޑަންގައި ހިންގާ އަންޔާ ހައިންޑްމާޗްގެ މުވައްޒަފެއްކަމަށްވާ ހަނާ ވަރން ބުނީ، އައިސްކްރީމް ޕްރޮޖެކްޓަކީ، އިނގިރޭސިވިލާތުގެ ބަދިގެ ކަބަޑްތަކުން ލިބެން ހުރި ބާވަތްތަކުގެ ތަފާތު ރަހައެއް، ކަސްޓަމަރުންނަށް ހޯދައިދޭ މަޝްރޫއެއްކަމަށެވެ. އަދި އެއީ ވަރަށް "ހިޓް" ނުވަތަ ކާމިޔާބު މަޝްރޫއެއްކަމަށެވެ.
އަހަރެން އެއްކުރަން ބޭނުން މައިގަނޑު 3 ފްލޭވަރއެއް އުޅެނީ. އޭގެ ތެރޭގަ ސޯއީ ސޯސް އަދި ރޯލްޑް އޯޓްސް ފަދަ ހެނދުނުގެ ނާސްތާއިން ފެންނަ ބާވަތްތައް ހިމެނޭ. އެންމެ ހިނގަނީ ފްރޮސްޓީޒްއާ ކޮކޯޕޮޕްސް. ވަކިން ޚާއްސަކޮށް ކުޑަކުދިންގެ މެދުގަ. ބޮޑެތި މީހުންގެ މެދުގަ އެންމެ ހިނގަނީ ސޯއީ ސޯސް. ދެން ސެލަޑް ކްރީމް... މަދު ބަޔަކު އެއަށް ގަޔާވޭ. އެކަމަކު، އެންމެ ގިނަ ބަޔަކު އޯޑަރު ދެނީވެސް އެއަށް.ހަނާ ވަރން - މުވައްޒަފެއް
ހަނާ ބުނިގޮތުގައި މީގެ ކުރިން 6 ހަފުތާއިން ވިއްކާލެވޭހާ އައިސްކްރީމް، އެންމެ 4 ދުވަހުގެ ތެރޭގައި ވަނީ ވިކިފައެވެ. އަދި ބައެއް ކަސްޓަމަރުންނަކީ ކޮންމެ ދުވަހަކުވެސް އެކި ރަހަތައް ތަޖުރިބާކުރަން ޒިޔާރަތްކުރާ، ރެގިއުލާރ ކަސްޓަމަރުންކަންވެސް ހަނާ ވަނީ އުފަލާއެކު ފާހަގަކޮށްފައެވެ.
އާދަޔާ ޚިލާފު، ތަފާތު ރަހަތަކެއް ތަޖުރިބާކޮށްލުމުގެ ފުރުސަތު ފަހިކޮށްދޭ އައިސްކްރީމް ޕްރޮޖެކްޓް، އޯގަސްޓް 28 ވަނަ ދުވަހުގެ ނިޔަލަށް ލަންޑަންގައި ކުރިއަށް ގެންދިއުމަށް ވަނީ ހަމަޖެހިފައެވެ.
