ގޭމް އޮފް ތްރޯންސްގެ ސައުންޑްޓްރެކް، އުތުރު އެފްރިކާގެ ރަހަތަކާއެކު

އެޗްބީއޯގެ މަޤުބޫލު ޓީވީ ސީރީޒް "ގޭމް އޮފް ތްރޯންސް"ގެ ހަތް ވަނަ ސީޒަން ނިމި، 2019 ވަނަ އަހަރު ރިލީޒްކުރާ އެ ޝޯގެ ކުރިއަށް އޮތް ސީޒަންއަށް ޝޯގެ ފޭނުން ވަނީ ދިގު އިންތިޒާރެއް ފަށާފައެވެ. "ގޭމް އޮފް ތްރޯންސް"ގެ އަށް ވަނަ ސީޒަން ވެގެންދާނީ އެ ޝޯގެ ފަހު ސީޒަނަށް ކަން އެޗްބީއޯއިން ހާމަކޮށްފައިވާއިރު، މި ދިގު އިންތިޒާރުގެ މުއްދަތުގައި ޝޯގެ ފޭނުން ދަނީ "ގޭމް އޮފް ތްރޯންސް"އާ ގުޅުވައި އެކިއެކި ކަންކަން ކުރަމުންނެވެ.

މިގޮތުން އެންމެ ފަހުން ފާހަގަވެގެން ދިޔައީ، ނިމިގެންދިޔަ ނޮވެމްބަރު މަހުގެ 29 ވަނަ ދުވަހު މޮރޮކޯގެ ޒުވާނުންތަކެއް ރިލީޒްކުރި "ގޭމް އޮފް ތްރޯންސް"ގެ ސައުންޑްޓްރެކްގެ ކަވަރއެވެ. މި ކަވަރ ރިލީޒްކޮށްފައި ވަނީ އޭ-ވައި-ސިނަމަޓޯގްރަފީގެ ނަމުގައި މޮރޮކޯގެ ޒުވާނެއް ކަމަށްވާ ޔޫސުބް އަބޫޠާލިބް ހިންގާ ޔޫޓިއުބް ޗެނަލެއްގައެވެ.

މި ކަވަރއާ ގުޅޭ ގޮތުން ޔޫސުބް އަބޫޠާލިބް ބުނެފައި ވަނީ، މި ކަވަރގެ މަސައްކަތް ކުރާތާ ގިނަ ދުވަސްތަކެއް ވެފައިވާ ކަމަށާއި، ނަމަވެސް ކަވަރ ރިލީޒްކުރުން މިހާތަނަށް ލަސްކުރީ ބޭނުންވާ ވަރަށް ކަވަރގެ ފެންވަރު ރަނގަޅު ކުރުމަށް ކަމަށެވެ.

އުތުރު އެފްރިކާއަށް ނިސްބަތްވާ އަމާޒިގުންގެ ސަޤާފީ މިއުޒިކްގެ ރަހަޖައްސައިގެން ހަދާފައިވާ މި އިންސްޓްރުމެންޓަލް ކަވަރގައި ބޭސް ގިޓާގެ އިތުރުން އުތުރު އެފްރިކާއަށް ނިސްބަތްވާ މިއުޒިކީ އާލާތްތައް ވެސް ވަނީ ބޭނުންކޮށްފައެވެ. އެގޮތުން މި ކަވަރގައި ރިބާބް ގިޓަރ އާއި ކާމެންޖާ ވަޔަލިންގެ އަޑުތައް ހިމަނާފައިވެއެވެ.

މި ކަވަރއާ އެކު ހިތްގައިމު ވީޑިއޯއެއް ވެސް ރިލީޒް ކޮށްފައިވާއިރު، މި ވީޑިއޯ ކުޅެފައި ވަނީ މޮރޮކޯގެ ދެކުނުގައިވާ އަގާދީރުގެ ރަށްބޭރުގައެވެ.