އަލަށް ގުޅުނު ފޯވާޑް، ސާޑިއޯ މާނޭގެ ގޯލަކާއެކު، ޖަރމަން ބުންޑަސް ލީގު ޗެމްޕިއަން ބަޔާން މިއުނިކުން ބޮޑު މޮޅަކުން ފަށައިފިއެވެ.
އެއިންޓްރަކްޔް ފްރޭކްފާޓާ ވާދަކޮށް ބަޔާން ލީގުގެ ފުރަތަމަ މެޗު ކާމިޔާބުކުރީ 6-1ންނެވެ. މެޗު ފަށައިގެން ފަސްވަނަ މިނިޓްގައި ބަޔާންއަށް ކުރި ހޯދައިދިނީ ޔޯސުއާ ކިމިކްއެވެ. އޭގެ ފަސްމިނިޓް ފަހުން ދެވަނަ ގޯލް ޖެހީ ޕަވާޑްއެވެ. މާނޭ ތިންވަނަ ގޯލް ޖެހީ ސާޖް ގްނަބްރީ ތަނަވަސްކޮށްދިން ފުރުސަތެއްގައި، 29 ވަނަ މިނިޓްގައެވެ. މެޗުގައި ގްނަބްރީވެސް ލަނޑެއް ޖެހިއެވެ. އަނެއް ދެ ލަނޑު ޖެހީ މުސިއާލާއެވެ.
ލިވަޕޫލް ދޫކޮށް ބަޔާންއަށް ބަދަލުވި މާނޭ ވަނީ ޖަރމަން ކަޕްގައިވެސް ލަނޑު ޖަހާފައެވެ. ލީގުގެ ފުރަތަމަ މެޗުން ބަލިވި ފްރޭންކްފާޓަކީ ޔޫރޮޕާ ލީގުގެ ޗެމްޕިއަން ޓީމެވެ. އަންނަ ބުދަ ދުވަހު އެޓީމް ވާދަކުރަން ޖެހޭނީ ޗެމްޕިއަންސް ލީގުގެ ޗެމްޕިއަން ރެއާލް މެޑްރިޑާއެވެ. އެއީ ޔުއެފާ ސުޕަރ ކަޕްގައެވެ.
