އުތުރު ކޮރެޔާއިން ކޮވިޑް19 ބަލި އެއްކޮށް ފިލުވާލެވިއްޖެ ކަމަށް ހުކުރު ދުވަހު އެގައުމުން އިއުލާންކޮށްފިއެވެ.

އުތުރު ކޮރެޔާއަށް ފުރަތަމަ ކޮވިޑް ދިޔަ ކަމަށް ވެސް އެގައުމުން ބުނަނީ މި އަހަރުގެ މެއި މަހުކަމަށެވެ. އެގައުމުގައި ކޮވިޑް19 އަށް ކިޔަނީ ވެސް ހުމެވެ. އެއީ ކޮވިޑަށް ޓެސްޓް ކުރާނެ ގޮތް އެހާފުޅާކޮށް ފަހިވެފައި ނެތުމުން ކަމަށް އެގައުމުން ބުނެއެވެ.

ހުކުރު ދުވަހު އުތުރު ކޮރެޔާގެ ސްޓޭޓް މީޑިޔާއިން ރިޕޯޓްކޮށްފައިވާ ގޮތުގައި "ހުން" ޖެހިގެން މީހަކު ރިޕޯޓްކޮށްފައިނުވާތާ ހަތްދުވަސް ވެއްޖެއެވެ. އަދި ކުރިން ހުން ޖެހުނު އެންމެންވެސް މިހާރު ރަނގަޅުވެފައިވާކަމަށް ބުނެފައިވެއެވެ.

މެއި މަހު ފުރަތަމަ ކޮވިޑް ކޭސްތައް ރިޕޯޓް ކުރުމަށް ފަހުވެސް ނަމްބަރުތައް މަދުވަމުން އަންނަކަމަށް އެގައުމުން އައީ ރިޕޯޓްކުރަމުންނެވެ. ނަމަވެސް އެގައުމުން ދޭ އަދަދުތައް ގަބޫލު ނުކުރެވޭ ކަމަށް ގިނަ ބަޔަކު ބުނެއެވެ. ޚާއްސަކޮށް މަރުވި މީހުންގެ އަދަދެވެ.  

ކޮވިޑަށް ޕޮޒިޓިވް ވީ ޖުމްލަ ކިތައް މީހުންތޯ އެގައުމުން ހާމަކޮށްފައެއް ނުވެއެވެ. އެގައުމުގެ ސްޓޭޓް މީޑިޔާއިން ހަމަ އެކަނި ބުނެފައިވަނީ 4.77 މިލިއަން މީހުންނަށް ހުންޖެހި ރަނގަޅުވެފައިވާ ކަމުގައެވެ. މީގެ ތެރެއިން މަރުވެފައިވަނީ އެންމެ 74 މީހުން ކަމަށް އެގައުމުން ބުނެއެވެ. މިއީ މުޅި ދުނިޔޭގައިވެސް ކޮވިޑް ޖެހިގެން އެންމެ މަދުން މީހުން މަރުވި ވަރެވެ.

ސިއްހީ މާހިރުން ވިދާޅުވާ ގޮތުގައި މިއީ ބުއްދި ގަބޫލު ކުރެވޭ އަދަދުތަކެއް ނޫނެވެ. އުތުރު ކޮރެޔާގެ ސިއްހީ ނިޒާމަކީ ފުރިހަމަ ނޫން ވަރަށް ދަށް ފެންވަރުގެ ނިޒާމަކަށް ވާއިރު، ކޮވިޑަށް ދޭނެ ބޭހެއް އަދި ވެކްސިނެއް ވެސް އެގައުމުން ލިބޭކަށް ނުހުރެއެވެ.

މިއާ ޚިލާފަށް އަވަށްޓެރި ދެކުނު ކޮރެޔާގެ ސިއްހީ ނިޒާމަކީ ވަރަށް ފުރިހަމަ ޒަމާނީ ކުރެވިފައިވާ ނިޒާމަކަށް ވާއިރު، އެގައުމުގެ އާބާދީގެ ބޮޑުބަޔަކަށް ވަނީ ވެކްސިން ދެވިފައެވެ. އެހެން ކަމާއެކުވެސް ދެކުނު ކޮރެޔާގައި 20.3 މިލިއަން މީހުންނަށް ކޮވިޑް19 ޖެހުނެވެ. އަދި 25 ހާސް މީހުން ބަލީގައި މަރުވެފައިވެއެވެ.

ދެކުނު ކޮރެއާގެ ވެރިރަށް ސޯލްގެ މެޑިކަލް ސްކޫލެއްގެ ޕްރޮފެސަރަކު ރޮއިޓަރސްއަށް ވިދާޅުވި ގޮތުގައި އަވަށްޓެރި އުތުރު ކޮރެޔާއިން އަދަދުތައް ސިއްރުކޮށްފައިވާކަމަށާއި ކޮވިޑް ޖެހިގެން 50 ހާހެއްހާ މީހުން އެގައުމުން މަރުވެފަވުމަކީ ވަރަށް އެކަށީގެންވާ ކަމެއް ކަމުގައި ވިދާޅުވެފައިވެއެވެ.