ރާއްޖެއިން ވަން-ޗައިނާ ޕޮލިސީ އަށް އިޚުތިރާމްކުރާނެ - ފޮރިން މިނިސްޓްރީ
ރާއްޖެ އާއި ޗައިނާގެ ގާތް ގުޅުން ބަލައިގަންނަން- ސަފީރު
ޗައިނާ ގެ ޚާރިޖީ ވަޒީރު (މެދުގައި) އަދި އެހެން ބައެއް ބޭފުޅުން
ދިވެހި ރާއްޖެއިންވެސް ވަން-ޗައިނާ ޕޮލިސީ އަށް އިޚުތިރާމްކުރާ ކަމަށް ރާއްޖޭގައި ހުންނަ ޗައިނާ އެމްބަސީ އިން ބުނެފި އެވެ. ރާއްޖޭގެ ފޮރިންމިނިސްޓްރީގެ ތަރުޖަމާން ކުރައްވާފައިވާ ޓްވީޓް އެއް ރިޓްވީޓް ކުރަމުން ޗައިނާ އެމަބަސީ އިން ކޮށްފައިވާ ޓްވީޓެއްގައި ބުނީ ޗައިނާގެ ސަރުކާރުގެ ރުހުމާއި ދެކޮޅަށް އެމެރިކާގެ ގާނުނު ހަދާ މަޖިލީހުގެ ސްޕީކަރ ނެންސީ ޕެލޯސީ ޓައިވާނަށް ކުރެއްވި ދަތުރާއި ގުޅިގެން، ވަން-ޗައިނާ ޕޮލިސީ އަށް އިޚުތިރާމްކުރާ ކަމުގެ ޔަޤީންކަން ރާއްޖޭގެ ފޮނިސްޓްރީ އިން ޗައިނާ އަށް ދީފައިވާކަމަށް ޗައިނާ އެމްބަސީން ފާހަގަކުރާކަމަށެވެ.
އެކަމާއި ގުޅިގެން ޗައިނާ އިން ރާއްޖެ އަށް ކަނޑައަޅުއްވާފައިވާ ސަފީރު ވަން ލީޝިން ހުކުރު ދުވަހު ކުރެއްވި ޓްވީޓެއްގައި، ޗައިނާ އާއި މެދު ޒަމާނުއްސުރެ ރާއްޖެއިން ބާއްވަމުން އަންނަ ގާތްގުޅުމަކީ އެ ގައުމުން ބަލައިގަންނަ ކަމެއް ކަމަށް ވިދާޅުވިއެވެ. އަދިޗައިނާ އިން ކުރިއަށް އޮތްތަނުގައި ވެސް ރާއްޖެ އާއި އެކު ގާތް ގުޅުމެއް ބޭއްވުމަށް އުންމީދުކުރާ ކަމަށެވެ. އަދި ފާއިތުވެދިޔަ ތަނުގައި ވެސް ރާއްޖެ އާއި ޗައިނާ އާއި ދެ ޤައުމުން މަސައްކަތްކޮށްފައި ވަނީ އެއް ޤައުމު އަނެއް ޤައުމަށް ދިމާވާ ކަންކަމުގައި އެހީތެރިވެ، ވާގިވެރިވެގެން ކަމަށް ވެސް އޭނާ ވަނީ ވިދާޅުވެފައެވެ.
ޗައިނާ ގަބޫލުކުރާ ގޮތުގައި ޓައިވާން އަކީ އަމިއްލަ އަށް ޚާރިޖީ ގުޅުން ހިންގުމުގެ ފުރުސަތު އޮތް މިނިވަން ދައުލަތެއް ނޫނެވެ. ޗައިނާ އިން ގަބޫލުކުރާ ގޮތުގައި އެއީ ޗައިނާގެ ވަކިން އޮންނަ އަވަށެކެވެ. އެހެންނަމަވެސް ޓައިވާން އިން ދަނީ ޤައުމުތަކާއި އެކު އަމިއްލަ އަށް ޚާރިޖީ ގުޅުން ޤާއިމް ކުރަން މަސައްކަތްކުރަމުންނެވެ.
އެގޮތުން އެމެރިކާގެ ގާނުނު ހަދާ މަޖިލީހުގެ ރައީސް ނެންސީ ޕެލޯސީ ޓައިވާނަށް ވަޑައިގަންނަވާނެކަން އިއުލާން ކުރުމާއި އެކު އެ ދަތުރު ކެންސަލް ކުރުމަށް އެދި ޗައިނާ ވަނީ ތަކުރާރުކޮށް އެމެރިކާގެ ކިބައިން އެދިފައެވެ. އަދި ޗައިނާ އިން ޚާރިޖީ ގުޅުންތައް ބާއްވާނީ ވަން-ޗައިނާ ސިޔާސަތު ޤަބޫލުކުރާ ޤައުމުތަކާއި އެކުގައި ކަމަށް ވެސް އެ ޤައުމުން ވަނީ ބުނެފައެވެ. މީގެ އިތުރުން ޓައިވާން ސަރަހައްދުގައި ޗައިނާ އިން މިސައިލްތައް ބޭނުންކޮށްގެން އަސްކަރީ ތަމްރީންތަކެއް ހިންގާ މައްސަލަ ހޫނުވެ އެ ސަރަހައްދުގެ ސަލާމަތަށް ވެސް މިހާރު ވަނީ ނުރައްކާވެފައެވެ.
އެ ހަރަކާތްތަކުން ޖަޕާނުގެ ސަލާމަތަށް ނުރައްކާވާކަމަށް އެ ޤައުމުން ވެސް ވަނީ ބުނެފައެވެ.
