ޗައިނާގެ މިސައިލްތަކުން ޖަޕާނުގެ ސަލާމަތަށް ނުރައްކާ އެބައޮތް: ޖަޕާނުގެ ޕްރައިމް މިނިސްޓަރު

ޗައިނާ އިން ޓައިވާން ސަރަހައްދުގައި ބެލިސްޓިކް މިސައިލްތައް އުދުއްސަމުން ގެންދިއުމަކީ ޖަޕާނުގެ ސަލާމަތާއި ރައްކާތެރިކަމަށް އޮތް ސީރިއަސް މައްސަލައެއް ކަމަށް އެ ޤައުމުން ބުނެފިއެވެ.

ޖަަޕާނުގެ ބޮޑުވަޒީރު ފުމިއޯ ކިޝިޑާ ވަނީ ޗައިނާގެ އެ އަމަލަކީ ޖަޕާނުގެ ރައްޔިތުން ނުރައްކަލަކަށް ހުށަހެޅޭ ކަމެއް ކަމަށް ވިދާޅުވެފައެވެ. ޗައިނާ އިން ޓައިވާން ސަރަހައްދުގައި ބެލިސްޓިކް މިސައިލްތައް ޓެސްޓުކޮށްފައި ވަނީ އަސްކަރިއްޔާގެ ޑްރިލްއެއްގެ ތެރެއިން ކަމަށް އެ ގައުމުން ވަނީ ބުނެފައެވެ. އޭގެ ތެރެއިން 5 މިސައިލް ޖަޕާނުގެ އިގްތިޞާދީ ސަރަހައްދަށް ވެއްޓިފައިވާ ކަން ފާހަގަކޮށް ޖަޕާނުން ވަނީ ޗައިނާގެ އެ އަމަލު ކުށްވެރިވެސް ކޮށްފައެވެ. ޖަޕާނުން ވަނީ ޗައިނާގެ މިލިޓަރީ ޑްރިލްތައް ހުއްޓާލުމަށް ގޮވާލާފައެވެ.

ޖަޕާނުގެ ބޮޑުވަޒީރު ވަނީ ޗައިނާގެ އަމަލުތަކުގެ ސަބަބުން ސަރަހައްދީ ހަމަޖެހުން ނުރައްކަލަށް ހުށަހެޅޭ ކަމަށް ވެސް ވިދާޅުވެފައެވެ. އޭނާ މިފަދައިން ވިދާޅުވީ އެމެރިކާގެ ޤާނޫނު ހަދާ މަޖިލީހުގެ ރައީސް ނޭންސީ ޕެލޯސީއާ ބައްދަލުކުރެއްވުމަށް ފަހު ނޫސްވެރިންނާއި ވާހަކަދައްކަވަމުންނެވެ. މިހާރު ޗައިނާއިން ކުރިއަށްގެންދާ މިލިޓަރީ ޑްރިލްގައި ފުރަތަމަ ފަހަރަށް ޓައިވާންގެ މަތިން މިސައިލެއް ވަނީ އުދުއްސާފައެވެ. ޗައިނާގެ އަސްކަރީ ޑްރިލް ހުއްޓާލިކަން ނުވަތަ ނޫންކަން ވެސް އެ ޤައުމުން އަދި ހާމަކޮށްފައެއް ނުވެއެވެ.