ޗެލްސީން ކުކުރޭލާ ހޯދުމާ ގާތަށް

އިނގިރޭސިވިލާތުގެ ބްރިޓަންއަށް ކުޅެމުން އަންނަ ކުކުރޭލާ ހޯދުމާ ގާތަށް ޗެލްސީން ޖެހިލައިފިއެވެ.

ކުކުރޭލާ ހޯދުމުގެ މަސައްކަތް ޗެލްސީން ފެށީ އޭނާ ހޯދުމަށް މެންޗެސްޓަރ ސިޓީންވެސް މަސައްކަތްކުރަމުން ދަނިކޮށެވެ. ނަމަވެސް ސިޓީން ބްރިޓަންއަށް ފުރަތަމަ ހުށަހެޅި ބިޑް ބްރިޓަންއިން ވަނީ ރިޖެކްޓްކޮށްފައެވެ. ސިޓީން ކުކުރޭލާ ހޯދުމަށް ބްރިޓަންއަށް ހުށަހެޅީ 40 މިލިއަން ޕައުންޑުގެ ބިޑެކެވެ. އެކްލަބުން އޭނާ ދޫކުރާނެކަމަށް ބުނީ އެންމެ ކުޑަވެގެން 50 މިލިއަން ޕައުންޑަށެވެ.

ނަމަވެސް ޗެލްސީން ވަނީ 68 މިލިއަން ޕައުންޑުގެ ބިޑެއް ކުކުރޭލާ ހޯދުމަށް ބްރިޓަންއަށް ހުށަހަޅާފައެވެ. ޗެލްސީން ކުކުރޭލާ ހޯދުމަށް މަސައްކަތްކުރަނީ 6 އަހަރުގެ މުއްދަތަށެވެ. ޗެލްސީގެ މާކޯސް އަލޯންސޯ ޓީމު ދޫކޮށްލުމުން ކުކުރޭލާގެ ބޭނުން އެޓީމަށް ވަނީ ބޮޑުވެފައެވެ.

އައު އޯނަރު، ޓޮޑް ބޯލީ ޓީމާ ހަވާލުވެ ޗެލްސީން އަމާޒު ހިފާފައިހުރީ ސީޒަން ފެށެން ވާއިރަށް ރަނގަޅު ކުޅުންތެރިންތަކެއް ޓީމަށް ހޯދުމަށެވެ. މިހާތަނަށް އެޓީމުން ވަނީ ރަހީމް ސްޓަރލިން އަދި ކަލީޑޯ ކުލިބަލީ ޓީމަށް ގެންގޮސްފައެވެ. ކުކުރޭލާގެ ސޮއި ޗެލްސީއަށް ހޯދިއްޖެނަމަ އޭނާ ވާނީ މިއަންނަ ސީޒަނަށް ޗެލްސީން ސޮއި ހޯދާ ތިންވަނަ ކުޅުންތެރިޔާއަށެވެ. މި ތިން ކުޅުންތެރިން ހޯދުމަށް ޗެލްސީން 140 މިލިއަން ޔޫރޯއަށްވުރެ ބޮޑު އަދަދެއް ޚަރަދުކުރާނެއެވެ.