ޗައިނާގެ އިންޒާރުތަކާއެކުވެސް އެމެރިކާގެ ހައުސް އޮފް ރެޕްރެޒެންޓެޓިވްސްގެ ސްޕީކަރ ނެންސީ ޕެލޯސީ ޓައިވާނަށް ވަޑައިގަންނަވައިފިއެވެ.
ޕެލޯސީ އޭޝިޔާއަށް ކުރައްވަމުން ގެންދަވާ ދަތުރުފުޅުގައި ޓައިވާނަށް ވަޑައިގަންނަވައިފިނަމަ, ޗައިނާއާއި އެމެރިކާގެ ގޯސްވަމުން އަންނަ ގުޅުން އިތުރަށް ގޯސްވާނެކަމުގެ އިންޒާރު ޗައިނާއިން ދިޔައީ ކެނޑިނޭޅި ދެމުންނެވެ. ޕެލޯސީ ވަޑައިގަންނަވާފައިވަނީ އަންގާރަ ދުވަހުގެ ރޭގެ ވަގުތެއްގައެވެ.
ޗައިނާއިން ދައުވާކުރަމުން އަންނަނީ ޓައިވާނަކީ އެގައުގެ ތަނެއްކަމަށެވެ. ނަމަވެސް އެކަމާ އެމެރިކާއިން ދެކޮޅު ހަދައެވެ. އަދި ޓައިވާނަކީ ވަކި ދައުލަތެއްގެ ގޮތުގައި އޮތުމަށް އެމެރިކާއިން އަންނަނީ ޓައިވާނަށް ސީދާ ގޮތުންނާއި ނުސީދާ ގޮތުން އެހީތެރިކަން ފޯރުކޮށްދެމުންނެވެ.
ޗައިނާއިން ގަބޫލުކުރާގޮތުގައި ޕެލޯސީގެ ދަތުރުފުޅާ ގުޅިގެން އެމެރިކާގެ އަސްކަރިއްޔާގެ ހަރަކާތްތައް ޗައިނާ ސަރަހައްދުގެ ތެރޭގައި ހިންގުމަކީ އެއްގޮތަކަށްވެސް ބަލައިގަނެވޭ ކަމެއް ނޫނެވެ. ޕެލޯސީގެ ދަތުރުފުޅުގައި ސަލާމަތީ ކަންކަން ބަލަހައްޓަނީ އެމެރިކާއިންނެވެ.
އެހެންކަމުން މިއީ ޗައިނާގެ ސަލާމަތަށާއި އަދި ޗައިނާގެ އަމިއްލަވަންތަކަމާއި ސަރަހައްދުގެ ސަލާމަތާއި ރައްކާތެރިކަމަށް އޮތް ނުރައްކަލެއްކަމަށް ޗައިނާއިން ދެކެއެވެ. އަދި އެމެރިކާއިން އެފަދަ ކަމެއްކޮށްފިނަމަ މަޑުން ނުތިބޭނެކަމަށް ޗައިނާއިން ވަނީ ބުނެފައެވެ.
ނޫސްވެރިންނާ ވާހަކަދައްކަވަމުން ޗައިނާގެ ފޮރިން މިނިސްޓްރީގެ ސްޕޯކްސްމަން ޒާއޯ ލިޖިއަން ވިދާޅުވީ، އަދިވެސް އެއްފަހަރު އެމެރިކާއަށް ހަނދާންކޮށްދެއްވަން ބޭނުންފުޅުވަނީ; ޗައިނާގެ ރައްޔިތުންނާއި ޗައިނާގެ މިނިވަންކަމުގެ ދިފާއުގައި ޗައިނާގެ އަސްކަރިއްޔާ އޮތީ ތައްޔާރަށްކަމަށާއި، އެފަދަ ކަމެއް ހިނގައިފިނަމަ ޗައިނާގެ އަސްކަރިއްޔާ މަޑުން ނޯންނާނެކަންކަމަށެވެ. އަދި ޗައިނާ ސަރަހައްދުގެ ސަލާމަތާއި ރައްކާތެރިކަމާއި ޗައިނާގެ އަމިއްލަވަންތަކަމުގެ ދިފާއުގައި ވަރުގަދަ ފިޔަވަޅުތަކެއް ޗައިނާއިން އަޅާނެކަމަށް ސްޕޯކްސްމަން ވިދާޅުވިއެވެ.
ޕެލޯސީ ޓައިވާނަށް ވަޑައިގަންނަވާނެކަން ހޯމަ ދުވަހުގެ ރޭ މީޑިޔާތަކުން ވަނީ ރިޕޯޓްކޮށްފައެވެ. އަންގާރަ ދުވަހުގެ ހެނދުނުން ފެށިގެން ޗައިނާގެ ހަނގުރާމަމަތީ ބޯޓުތައް ޓައިވާނާ ޗައިނާއާ ދެމެދު އެތައް ފަހަރަކު ދަތުރުކުރަމުންދިޔަކަމަށް ރިޕޯޓްތައް ބުނެއެވެ.
ޕެލޯސީގެ ދަތުރުފުޅާ ގުޅިގެން އެމެރިކާގެ ހަތަރު ނޭވީ ޝިޕާއި އެއަރކްރާފްޓެއް ވަނީ ޓައިވާނުގެ އިރުމަތީ ސަރަހައްދުގައި ހަރަކާތްތެރިވާންފަށާފައެވެ.
ޕެލޯސީ ޓައިވާނަށް ކުރައްވާ މިދަތުރުފުޅަކީ 25 އަހަރުތެރޭގައި އެމެރިކާގެ އިސް އޮފިޝަލަކު ޓައިވާނަށް ކުރައްވާ ފުރަތަމަ ދަތުރުފުޅެވެ.
