ޝަކީރާ 8 އަހަރަށް ޖަލަށް ދާން ޖެހިދާނެތަ؟
2 އޯގަސްޓު 2022 | އަންގާރަ 10:44ސްޕެއިންގެ ޕްރޮސެކިއުޓަރުން ދައުވާކުރަނީ 15 މިލިއަން ޑޮލަރު ހޯދުމަށް
މަޝްހޫރު ޕޮޕް ލަވަކިއުންތެރިޔާ ޝަކީރާ
2010 ވަނަ އަހަރު ސައުތު އެފްރިކާގެ ޖޮނަސްބަރގައި އޮތް ވަރލްޑްކަޕް ފުޓްބޯޅަ މުބާރާތް ލޯންޗްކުރުމަށް ނެރުނު ރީތި ލަވަ "ވައްކާ ވައްކާ"އިން މަޝްހޫރުވެގެންދިޔަ ކޮލަމްބިޔާގެ ލަވަކިއުންތެރިޔާ ޝަކީރާ، ޓެކްސްއަށް މަކަރުހެދިކަމުގެ ކުށުގައި 8 އަހަރަށް ޖަލަށް ދާންޖެހިދާނެކަމަށް ބުނާ ޚަބަރުތަކާ ގުޅިގެން އޭނާގެ ސަޕޯޓަރުން ވަނީ މާޔޫސްވެފައެވެ. ޝަކީރާގެ މައްޗަށް ދައުވާކުރަނީ ސްޕެއިންގެ ޕްރޮސެކިއުޓަރުންނެވެ. އެއީ އޭނާ 2012އާ 2014އާ ދެމެދު ސްޕެއިންނުން ގެއެއް ގަނެފައިވާއިރު، އެގައުމުގެ ސަރުކާރަށް ދައްކަން ޖެހޭ ޓެކްސް ދައްކާފައިނުވާކަމަށް ބުނެއެވެ. ނަމަވެސް ޝަކީރާ ބުނަމުން އަންނަނީ ބުނެވުނު މުއްދަތުގައި އޭނާ ސްޕެއިންގައި ދިރިއުޅެފައި ނުވާނެކަމަށެވެ.
މިކަމުގައި ސްޕެއިންގެ ޕްރޮސެކިއުޓަރުން ހުށަހެޅިގޮތަށް 15 މިލިއަން ޑޮލަރު، އަދި ޖޫރިމަނާގެ ގޮތުގައި 24 މިލިއަން ޑޮލަރު ދައްކަން ޝަކީރާ އެއްބަސް ނުވުމުންނާއި، ކޯޓުން ބޭރުން ގޮތެއް ނިންމުމަށް އެއްބަސްނުވުމުން މިހާރު މައްސަލަ ވަނީ ކޯޓަށް ވައްދާފައެވެ. ނަމަވެސް ޝަރީއަތް ކުރިއަށްދާނެ ތާރީޚެއް އަދި ނޭނގެއެވެ.
ޝަކީރާގެ ވަކީލުން ބުނާގޮތުން މިހާރު ބަލަންޖެހެނީ، ސްޕެއިންގެ ގާނޫނު ބުނާގޮތުން އެގައުމުން ގެއެއްގަނެ އެގައުމުގެ ރައްޔިތަކަށް ވަނީ ކިހާ ދުވަހަކު އެގައުމުގައި ދިރިއުޅުމުންތޯއެވެ. ގެއެއް ގަނެ އެތަނުގައި އެންމެ ދުވަހަކު ނޫޅުނަސް ޓެކްސް ދައްކަންޖެހޭ "ރައްޔިތަކަށް" ވެދާނެތޯއެވެ. ޝަކީރާގެ ވަކީލުން ބުނަނީ ޓެކްސްގެ މައްސަލަ އެކި ގައުމުގައި އޮންނަނީ އެކި ގޮތަށް ކަމަށާއި، ސްޕެއިންގެ ޕްރޮސެކިއުޓަރުން އެކަމާބެހޭ މައުލޫމާތު ރަގަޅަށް ހޯދާފައި ނުވާކަމަށެވެ. އަދި އެމީހުން އެކުރާކަމަކީ ޖަލަށް ފޮނުވާނެ ކަމަށް ބުނެ ބިރުދައްކައިގެން ނެގެޓިވް ޕަބްލިސިޓީ ހޯދައިގެން ފައިސާ ދައްކަން ޝަކީރާއަށް ޕްރެޝަރކުރުންކަމަށެވެ. ނަމަވެސް އޭނަގެ ވަކީލުންނަށް ފުރިހަމައަށް އިތުބާރުކުރުމާއެކު، މި ކޭސް ކާމިޔާބުވާނެކަމުގެ ޔަގީންކަން ޝަކީރާއަށް އެބައޮތްކަމަށް ވަކީލުން ބުނެފައިވެއެވެ.
2012ން 2014ށް ޝަކީރާ އުޅުނީ ބަހާމާސްގައިކަމަށް، އޭނާ ޓެކްސްގެ ބޭނުންތަކަށް މައުލޫމާތުދީފައިވެއެވެ. ނަމަވެސް ސްޕެއިން ސަރުކާރުން ބުނަނީ އެމުއްދަތުގައި އޭނާ އުޅުނީ މިހާރު ވަރިވެފައިވާ ފިރިމީހާ ޖެރާޑް ޕީކޭއާއެކު ސްޕެއިންގައިކަމަށެވެ.
2018 އަހަރުވެސް ހަމަ މިމައްސަލައިގައި ޝަކީރާ ކޯޓަށް ގެންދަން މަސައްކަތް ކޮށްފައި ވެއެވެ. ނަމަވެސް އޭރުވެސް ފަޑިޔާރެއްގެ ކުރިމަތީގައި ހުވާކޮށް ޝަކީރާ ބުނެފައިވަނީ، ޓެކްސްއަށް މަކަރުނުހަދާ ކަމަށާއި، ދައްކަންޖެހޭ އެއްޗެއް ޖޫރިމަނާއާއެކު ދައްކާފައިވާނެކަމަށެވެ.
