އެމެރިކާގެ ހައުސް އޮފް ރެޕްރެޒެންޓެޓިވްސްގެ ސްޕީކަރ ނެންސީ ޕެލޯސީ އޭޝިޔާގެ ބައެއްގައުމުތަކަށް ކުރައްވާ ދަތުރުފުޅުގައި ޓައިވާނަށް ވަޑައިގަންނަވާނެކަމަށް އެމެރިކާ އާއި ޓައިވާންގެ އިސް އޮފިޝަލުންތަކެއް ވިދާޅުވެއްޖެއެވެ.
ޕެލޯސީގެ އޮފީހުން އާދީއްތަ ދުވަހު ނެރުނު ބަޔާނެއްގައި ބުނެފައިވަނީ، މިދަތުރުގައި އެކަމަނާ ވަޑައިގަތުމަށް އަދި ހަމަ ޖެހިފައިވަނީ ސިންގަޕޯރ، މެލޭޝިޔާ، ދެކުނު ކޮރެޔާ، އަދި ޖަޕާނަށްކަމަށެވެ. ނަމަވެސް ޓައިވާނާއި އެމެރިކާގެ އިސް އޮފިޝަލުންތަކަކާ ހަވާލާދީ ސީއެންއެންގައި ރިޕޯޓްކޮށްފައިވަނީ ޕެލޯސީ ޓައިވާނަށް ވަޑައިގަންނަވާނެކަމަށް ބެލެވޭކަމަށެވެ.
ޕެލޯސީ ޓައިވާނަށް ވަޑައިގަތުމަކީ ހީނަރުވެފައިވާ ޗައިނާ އާއި އެމެރިކާގެ ގުޅުން އިތުރަށް ގޯސްވެ ހާލަތު މުޅިން ގޯސްވެގެން ހިނގައިދާނެކަމެއްކަމަށް ބެލެވޭތީ އެމެރިކާ ސަރުކާރުގެ އޮފިޝަލުންވެސް ވަނީ ޕެލޯސީ ޓައިވާނަށް ވަޑައިގަތުމާމެދު ކަންބޮޑުވުން ފާޅުކުރައްވާފައެވެ.
ޕެލޯސީ ޓައިވާނަށް ވަޑައިގަންނަވައިފިނަމަ އެދަތުރުފުޅުވެގެންދާނީ 25 އަހަރުތެރޭ އެމެރިކާގެ އިސް އޮފިޝަލަކު ޓައިވާނަށް ކުރައްވާ ފުރަތަމަ ދަތުރުފުޅަށެވެ.
ޓައިވާންގެ އޮފިޝަލުން ވިދާޅުވާ ގޮތުގައި ޕެލޯސީ ޓައިވާންގައި މަޑުކުރައްވާނީ އެއް ރެޔެވެ. ނަމަވެސް ޕެލޯސީ ޓައިވާނަށް ވަޑައިގަންނަވާނީ ކޮންއިރަކު ކަމެއް އަދި ސާފެއްނުވެއެވެ.
އެމެރިކާގެ އޮފިޝަލަކާ ހަވާލާދީ ސީއެންއެންގައި ރިޕޯޓް ކޮށްފައިވަނީ އެމެރިކާގެ ޑިފެންސު ޑިޕާޓްމެންޓުން ގެންދަނީ ޕެލޯސީގެ ދަތުރުފުޅާ ގުޅިގެން އެސަރަހައްދުގައި ޗައިނާގެ ހަރަކާތްތައް ވަރަށް ކައިރިން ބަލަމުންނެވެ. އަދި ޕެލޯސީއަށް ރައްކާތެރިކަން ދެވެން ހުރި ހުރިހާ ގޮތްތަކެއް ގެންދަނީ ބަލަމުންނެވެ.
ޗައިނާގެ ފޮރިން މިނިސްޓްރީން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ޕެލޯސީގެ ދަތުރުފުޅާ ގުޅިގެން އިންޒާރުދީފައެވެ. ޗައިނާއިން ދައުވާކުރަމުން އަންނަނީ ޓައިވާނަކީ އެގައުގެ ތަނެއްކަމަށެވެ. ނަމަވެސް އެކަމާ އެމެރިކާއިން ދެކޮޅު ހަދައެވެ. އަދި ޓައިވާނަކީ ވަކި ދައުލަތެއްގެ ގޮތުގައި އޮތުމަށް އެމެރިކާއިން އަންނަނީ ޓައިވާނަށް ސީދާ ގޮތުންނާއި ނުސީދާ ގޮތުން އެހީތެރިކަން ފޯރުކޮށްދެމުންނެވެ.
ޗައިނާއިން ގަބޫލުކުރާ ގޮތުގައި ޕެލޯސީގެ ދަތުރުފުޅާ ގުޅިގެން އެމެރިކާގެ އަސްކަރިއްޔާގެ ހަރަކާތްތައް ޗައިނާ ސަރަހައްދުގެ ތެރޭގައި ހިންގުމަކީ އެއްގޮތަކަށްވެސް ބަލައިގަނެވޭ ކަމެއް ނޫނެވެ. އަދި އަދި ޗައިނާގެ އަމިއްލަ ވަންތަކަމާއި ސަރަހައްދުގެ ސަލާމަތާއި ރައްކާތެރިކަމަށް އޮތް ނުރައްކަލެއްކަމަށް ޗައިނާއިން ދެކެއެވެ. އަދި އެމެރިކާއިން އެފަދަ ކަމެއްކޮށްފިނަމަ މަޑުން ނުތިބޭނެކަމަށް ޗައިނާއިން ވަނީ ބުނެފައެވެ.
ނޫސްވެރިންނާ ވާހަކަދައްކަވަމުން ޗައިނާގެ ފޮރިން މިނިސްޓްރީގެ ސްޕޯކްސްމަން ޒާއޯ ލިޖިއަން ވިދާޅުވީ އަދިވެސް އެއް ފަހަރު އެމެރިކާއަށް ހަނދާން ކޮށްދޭން ބޭނުންވަނީ ޗައިނާގެ ރައްޔިތުންނާއި ޗައިނާގެ މިނިވަންކަމުގެ ދިފާއުގައި ޗައިނާގެ އަސްކަރިއްޔާ އޮތީ ތައްޔާރަށްކަމަށާއި އެފަދަ ކަމެއް ހިނގައިފިނަމަ ޗައިނާގެ އަސްކަރިއްޔާ މަޑުން ނުއޮންނާނެ ކަމަށެވެ. އަދި ޗައިނާގެ ސަރަހައްދުގެ ސަލާމަތާއި ރައްކާތެރިކަމާއި ޗައިނާގެ އަމިއްލަވަންތަކަމުގެ ދިފާއުގައި ވަރުގަދަ ފިޔަވަޅުތަކެއް ޗައިނާއިން އަޅާނެކަމަށް ސްޕޯކްސްމަން ވިދާޅުވިއެވެ.
އަޅާނެ ފިޔަވަޅުތަކާއި ގުޅޭގޮތުން ސްޕޯކްސްމަން ވިދާޅުވީ ޕެލޯސީ ޓައިވާނަށް ވަޑައިގެންފިނަމަ ދެން ކަންތައްވާނެ ގޮތް ބަލަން ތިބުމަށެވެ.
ޗައިނާގެ އިރުމަތީ ކޮމާންޑުން ޕޯސްޓްކޮށްފައިވާ ވީޑިއޯއެއްގައި ވަނީ ޓައިވާންގެ ނަން ނުބުނެ ދުޝްމަނުން ވަޅުލާނެކަމަށް ބުނެފައެވެ. އަދި އެސަރަހައްދުގައި ގެންގުޅޭ އަސްކަރީ ހަތިޔާރާއި ހަނގުރާމައިގެ އުކުޅުތައް ވަނީ ދައްކާލާފައެވެ. ވީޑިއޯ އާއެކު ކޮށްފައިވާ ޕޯސްޓްގައި ބުނެފައިވަނީ ދުޝްމަނުންނާ ހަނގުރާމަ ކުރުމަށް ތައްޔާރަށް ތިބިކަމަށާއި ދުޝްމަނުން ވަޅުލާނެކަމަށެވެ.
އެމެރިކާގެ ސެކެރެޓަރީ އޮފް ސްޓޭޓް އެންތޮނީ ބްލިންކަން ވިދާޅުވީ ޕެލޯސީ ކުރައްވާ ދަތުރުުފުޅާ ގުޅޭގޮތުން ކަންކަން ނިންމަވާނީ ޕެލޯސީކަމަށެވެ. ކޮންގްރެސް އަކީ މިނިވަން ތަނެއްކަމަށާއި އެތަނުން ނިންމާ ނިންމުންތަކަކީ އަމިއްލަ ނިންމުންތަކެއްކަމަށެވެ.
ޕެލޯސީ އެޕްރީލް މަހު ޓައިވާނަށް ދަތުރުފުޅެއް ކުރައްވަން މަސައްކަތްޕުޅުކުރެއްވިއެވެ. ނަމަވެސް ކޮވިޑަށް ޕޮޒިޓިވްވުމުގެ ސަބަބުން އެދަތުރުފުޅު ކެންސަލްކުރެއްވީއެވެ.
