މަންކީ ޕޮކްސް ޖެހިގެން އިންޑިޔާގެ ކެރަލާއިން ފުރަތަމަ މީހާ މަރުވެއްޖެ

މަންކީ ޕޮކްސް ޖެހިގެން އިންޑިޔާގެ ކެރަލާއިން މީހަކު މަރުވެފައިވާކަން އެގައުމުން ކަށަވަރު ކޮށްދީފިއެވެ. މިއީ އިންޑިޔާގައި މިބަލީގައި މަރުވި ފުރަތަމަ މީހާއެވެ.

ކެރަލާގެ ހެލްތު މިނިސްޓަރ ވީނާ ޖޯޖް ވިދާޅުވީ، ކެރަލާއިން މަރުވެފައިވަނީ ޔުނައިޓެޑް އެރެބް އެމިރޭޓްސްއިން ދާދި ފަހުން ދަތުރުކޮށްފައި އައި 22 އަހަރުގެ ފިރިހެނެއް ކަމަށެވެ. އެމީހާ ބޭރުގައި ހުރެ ހެދި ޓެސްޓްތައްވެސް ބައްޔަށް ޕޮޒިޓިވްވެފައިވާކަމަށް ވިދާޅުވިއެވެ. މިއީ އެފްރިކާ ބައްރުން ބޭރުން މިބަލި ޖެހިގެން މަރުވި ހަތަރުވަނަ މީހާއެވެ.

ކެރަލާގައި މަރުވި މީހާއާ ގާތުން ބައްދަލުވެފައިވާ 20 މީހުން ހައިރިސްކް މީހުން ގޮތުގައި ފާހަގަކޮށް، ވަނީ އައިސޮލޭޓްކުރެވިފައެވެ. މީގެ ތެރޭގައި ހިމެނެނީ އޭނާގެ އާއިލާގެ މީހުންނާއި ބައެއް ރައްޓެހިންނެވެ.

ވައިރަސްއަކުން ޖެހޭ މަންކީ ޕޮކްސް ބައްޔަކީ މުޅިދުނިޔެއަށް ކުރިމަތިވެފައިވާ ހެލްތު އިމަޖެންސީއެއްކަމަށް ޑަބްލިއުއެޗްއޯއިންވަނީ ކަނޑައަޅާފައެވެ.