މަޖިލީހުގެ ސުލޫކީ ކޮމިޓީއަށް ހުށައެޅުނު އެއްވެސް މައްސަލައެއް ނުބަލަން ފާސްކޮށްފި
މި މައްސަލަ ތަކަކީ 2015 ވަނަ އަހަރުއްސުރެ ހުރި މައްސަލަތައް
މަޖިލީހުގެ ކޮމިޓީ ބައްދަލުވުމެއް ކުރިއަށް ދަނީ
ސުލޫކީ ކޮމިޓީއަށް ހުށައެޅިފައިވާ މަައްސަލަތައް ފުނިޖެހެމުން އައިސް އެންމެ ފަހުން އެ މައްސަލަތައް ނުބަލަން އެ ކޮމެޓީން ފާސްކޮށްފިއެވެ.
އެ ކޮމިޓީއަށް ހުށައެޅިފައި ހުރި މައްސަލަތަކުގެ ތެރޭގައި، 27 މާޗްގައި ބޭއްވި ރައްޔިތުންގެ މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެންބަރު އަހުމަދު މަހުލޫފު އަދި އެ ވަގުތު މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް ހުޅު ހެންވޭރު ދާއިރާގެ މެންބަރު މޫސާ މަނިކު މަޖިލީހުގެ ސިސްޓަމް ބޭނުންކުރައްވައިގެން ވޯޓްލާފައިވާކަމަށާއި، އަދި ބައެއް މެންބަރުންގެ މެޝިން ކާޑުކޮޅުތައް ނެގުމުގެ ސަބަބުން ވޯޓްލުމުގެ ހައްގު ގެއްލިފައިވާކަމަށް ވިދާޅުވެ މެންބަރަކު ފޮނުއްވާފައިވާ މައްސަލަ އޭޕްރީލް 4 ވަނަ ދުވަހު ހުށައަޅާފައިވާއިރު އެ މައްސަލަ 2017 އޭޕްރީލް 15 ވަނަ ދުވަހު ބޭއްވުނު ކޮމިޓީ ބައްދަލުވުމުގައި މަޝްވަރާ ކުރެވުނު ނަމަވެސް ވަނީ ގޮތެއް ނުނިންމި ދިގުލައިގެން ގޮސްފައެެވެ.
އަނެއް މައްސައެއްގެ ގޮތުގައި 30 އޭޕްރީލް 2015ގައި ކޮމިޓީއަށް ހުށައެޅުނު މަޖިލީހުގެ ގަވާއިދުގެ 51 ވަނަ މާއްދާގެ (ހ) އަދި (ށ) އާއި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރުއަހުމަދު މަޚްލޫފް، މާފަންނު ހުޅަނގު ދާއިރާގެ މެންބަރު މުހައްމަދު ފަލާހާއި، ހެންވޭރު ދެކުނު ދާއިރާގެ މެންބަރު މުހައްމަދު އަބުދުލް ކަރީމް ޚިލާފްވެވަޑައިގެންފައިވާކަމަށް ބުނެ މަޖިލީހުގެ ރައީސް ފޮނުވާފައިވާ މައްސަލަ ހިމެނެއެވެ. މިމައްސަލަ ކޮމިޓީއަށް ހުށައެޅިފައިވީ ނަމަވެސް ކުރިއަށް ގެންގޮސްފައެއް ނުވެއެވެ. އެހެންނަމަވެސް 29 އޭޕްރީލް 2015 ގައި ހުށައެޅުނު އެފަދަ އެހެން މައްސަލައެއްކަމަށްވާ މަޖިލީހުގެ ގަވާއިދުގެ 51 ވަނަ މާއްދާގެ (ހ) އަދި (ށ) އާއި ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު މުހައްމަދު އަބުދުލް ކަރީމް ޚިލާފްވެވަޑައިގެންފައިވާކަމަށް ބުނެ މަޖިލީހުގެ ރައީސް ފޮނުވާފައިވާ މައްސަލަ ސުލޫކީ ކޮމިޓީން ބަލަންފަށާ އެމެންބަރަށް ވަކީލަކު އައްޔަން ކުރުމަށް ވަނީ ފުރުސަތުދީފައެވެ.
ދެން ފާހަގަކޮށްލެވޭ އަނެއް މައްސަައަކީ،9 މާޗް 2015 ވަނަ ދުވަހު ބޭއްވުނު މަޖިލީހުގެ ޖަލްސާގައި މެދު ހެންވޭރު ދާއިރާގެ މެންބަރު އަލީ އާޒިމް، ވިލިމާލެ ދާއިރާގެ މެންބަރު އަހުމަދު ނިހާން ހުސެއިން މަނިކުގެ ގައިކޮޅަށް އަތްލައި މާރާމާރީ ހިންގި ކަމަަށް ބުނާ މައްސަލައެކެވެ. އެ މައްސަލަ ސުލޫކީ ކޮމިޓީއަށް 11 މާޗް 2015 ވަނަ ދުވަހު ހުށައެޅުނު ނަމަވެސް މިމައްސަލަ ވެސް އެއްގޮތަކަށްވެސް ބަލާފައެއް ނުވެއެވެ.
މީގެ އިތުރުން ސުލޫކީ ކޮމިޓީން ނުބަލާ ދޫކޮށްލާފައިވާ އަނެއް މައްސަލައަކީ، 2015 ވަނަ އަހަރަށް މަޖިލިސް ހުޅުވުމުގެ ޖަލްސާގައި ގަލޮޅު ދެކުނު ދާއިރާގެ މެންބަރު އަހުމަދު މަޚްލޫފް، ވިލުފުށީ ދާއިރާގެ މެންބަރު ރިޔާޒު ރަޝީދުގެ މޫނު މަތީގައި އަތުން ޖަހައި މާރާމާރީ ހިންގާފައިވާކަމަށް ހުށައެޅިފައިވާ މައްސަލަައެެވެ. އެމައްސަލަ ކޮމިޓީއަށް ހުށައެޅާފައިވަނީ 10 މާޗް 2015 ގައެވެ. މި މައްސަވެސް އެއްވެސް ވަރަކަށް ސުލޫކީ ކޮމިޓީން ކުރިއަށް ގެންގޮސްފައެއް ނުވެއެވެ.
މަޖިލީހާއި ސިދާ ގުޅޭ ދާއިމީ ކޮމިޓީއެއްގެ ގޮތުގައި އޮންނަ ސުލޫކީ ކޮމިޓީއަކީ ރައްޔިތުންގެ މަޖިލީހާއި ގުޅޭ ސުލޫކީ މައްސަލަތައް ބެލުމަށް ހާއްސަކޮމިޓީއެވެ.
އެހެންނަމަވެސް 2015 ވަނަ އަހަރުއްސުރެ ހުރި މި މައްސަލަތައް ނުބެލުމަށް އެ ކޮމިޓީން ފާކުރި ވަކި ސަބަބެއް މަޖިލީހުންވެސް އަދި އެ ކޮމިޓީންވެސް ހާމަކޮށްފައެއް ނުވެއެވެ.
