މަޝްހޫރު ލަވަކިޔުންތެރިޔާ ޝަކީރާ 14.5 މިލިއަން ޔޫރޯގެ ޓެކްސް ފައިސާއަށް މަކަރު ހެދިކަމުގެ ކުށުގައި 8 އަހަރު ދުވަހުގެ ޖަލު ހުކުމެއް އިއްވުމަށް ސްޕެއިންގެ ޕްރޮސެކިޔުޓަރ އެދިއްޖެއެވެ.

ސްޕެއިންގެ ޕްރޮސެކިޔުޓަރ އޮފީހުގެ ޑޮކިޔުމެންޓަކާއި ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުގައި ޕްރޮސެކިޔުޓަރ ވަނީ 8 އަހަރުގެ ޖަލު ހުކުމަކަށް އެދިފައެވެ.

ކޮލަމްބިއާގެ ލަވަކިޔުންތެރިޔާ ޝަކީރާ ކިޔާފައިވާ ލަވަތަކުގެ 80 މިލިއަން ކޮޕީ ވިކިފައިވާއިރު މަޝްވަރާކޮށްގެން ކޭސް ނިންމުމަށް ދައުލަތުން އެދުނު އެދުމަށް ޝަކީރާ ވަނީ ދެކޮޅު ހަދާފައެވެ.

ޝަކީރާގެ މައްޗަށް ތުހުމަތުކުރަނީ 2012 ވަނަ އަހަރުން ފެށިގެން 2014 ވަނަ އަހަރާ ދެމެދު ޓެކްސް ނުދެއްކިކަމުގެ ތުހުމަތެވެ. އެކަމާއި ގުޅޭގޮތުން ޝަކީރާ ބުނަމުން އަންނަނީ އެމުއްދަތުގެ ތެރޭގައި ސްޕެއިންގައި ނޫޅޭކަމަށެވެ.

ރޮއިޓަރސް އިން ރިޕޯޓްކޮށްފައިވާ ގޮތުގައި ޕްރޮސެކިޔުޓަރ ގެ ޑޮކިޔުމެންޓްގައި ވަނީ 2012 ވަނަ އަހަރާއި 2014 ވަނަ އަހަރާ ދެމެދު ޝަކީރާ އަކީ ސްޕެއިންގައި އުޅުނު އާންމު ރައްޔިތެއް ކަމަށެވެ. އަދި 2012 ވަނަ އަހަރުގެ މެއި މަހު ޝަކިރާ ވަނީ ބާސެލޯނާއިން ގެޔެއް ގަނެފައެވެ.

މިދައުވާ ޝަކީރާގެ މައްޗަށް ސާބިތުވެއްޖެނަމަ 8 އަހަރުގެ ޖަލު ހުކުމެއް އައުމުގެ އިތުރުން 23.5 މިލިއަން ޑޮލަރުން ޖޫރިމަނާ ކުރާނެއެވެ. ދައުވާގެ އަޑުއެހުން ކުރިޔަށް ގެންދާނެ ތާރީޚެއް އަދި ކަނޑައެއްނާޅައެވެ.

މިމައްސަލައިގައި ޝަކީރާގެ ފަރާތުން ވާހަކަދައްކަމުން ބުނެފައިވަނީ މިމައްސަލައިގައި ޝަކީރާގެ އެއްވެސް ކުށެއްނެތްކަމުގެ ފުރިހަމަ އިތުބާރު އެބައޮތް ކަމަށެވެ. އަދި މިއީ އޭނާގެ އިންސާނީ ހައްގަށް އަރައިގަތުންކަމަށް ޝަކީރާ ދެކޭކަމަށް ވަނީ ބުނެފައެވެ.

އުމުރުން 45 އަހަރުގެ ލަވަކިޔުންތެރިޔާ ބުނެފައިވަނީ ސްޕެއިންގެ ޓެކްސް އޮފީހުން ބުނެފައިވާ ގޮތަށް 17.2 މިލިއަން ޔޫރޯ ދައްކާފައިވާކަމަށެވެ. އަދި ޓެކްސް އޮފީހަށް ދައްކަންޖެހޭ އިތުރު އެއްވެސް ފައިސާއެއް ނޯންނާނެކަމަށް ޝަކީރާ ވަނީ ބުނެފައެވެ.