ޕެލޯސީ ޓައިވާނަށް ވަޑައިގެންފާނެތީ ޗައިނާ ކަންބޮޑުވަނީ ކީއްވެ؟

އެމެރިކާގެ ހައުސް އޮފް ރެޕްރެޒެންޓަޓިވްސްގެ ސްޕީކަރ ނެންސީ ޕެލޯސީ ޗައިނާއަށް ދަތުރުފުޅެއް ކުރައްވައިފިނަމަ އެކަމުގެ ނަތީޖާއެއްގެ ގޮތުން ވެދާނެ ކަމެއް ޒިންމާ ނަގަން ޖެހޭނީ އެމެރިކާއިން ކަމަށް ޗައިނާއިން ބުނެފިއެވެ.

ޕެލޯސީ ޓައިވާނަށް އެޕްރިލް މަހު ކުރައްވަން އޮތް ދަތުރުފުޅު ކޮވިޑްއަށް ޕޮޒިޓިވްވުމުން ކެންސަލް ކުރެއްވުމަށްފަހު، އަލުން ދަތުރުފުޅެއްގައި ޓައިވާނަށް ވަޑައިގަތުމަށް ދަނީ ވިސްނަވަމުންނެވެ.   

އަނެއްކޮޅުން އެމެރިކާގެ ރައީސް ޖޯ ބައިޑަން އާއި ޗައިނާގެ ރައީސް ޝީ ޖިންޕިން ވެސް ޓައިވާންގެ މައްސަލައިގައި ވަނީ އިންޒާރު ބަދަލުކުރައްވާފައެވެ. ބުރާސްފަތި ދުވަހު ދެބޭފުޅުން ކުރެއްވި ދެގަޑިއެއްހާއިރުގެ ވީޑިއޯ ކޯލެއްގައި ޓައިވާންގެ މައްސަލައިގައި ދެބޭޅުންވެސް ވަނީ ވަރަށް ހަރުކަށި އިބާރާތް ބޭނުން ކުރައްވާފައެވެ. ޗައިނާއިން އެކަނި ގޮތް ނިންމައިގެން ޓައިވާނުގެ މިނިވަން ސްޓޭޓަސް ބަދަލުކޮށްލުމާއި އެމެރިކާއިން ވަރަށް ބޮޑަށް ދެކޮޅުކަން ބައިޑަން ހާމަކުރެއްވި އިރު، ޝީ ވަނީ އަލިފާނާ ކުޅެފިނަމަ ފިހޭނެ ކަމަށް ވިދާޅުވެފައެވެ.

ޓައިވާންގެ މައްސަލައިގައި އެމެރިކާ އާއި ޗައިނާއާ ދެމެދު މަސްރަހު ހޫނުވެގެން މި އުޅެނީ ޕެލޯސީގެ ދަތުރުފުޅު އަލުން އިއުލާންކުރެއްވި ހަމައިންނެވެ. ޗައިނާއިން ވަނީ މި ދަތުރުފުޅު ކުރިޔަށް ގެންދަވައިފިނަމަ ސީރިއަސް ކަންތައްތަކެއް ހިނގާނެ ކަމުގެ އިންޒާރު ދީފައެވެ.

ނެންސީ ޕެލޯސީއަކީ އެމެރިކާގެ ވެރިކަމުގެ ބާރު އޮންނަ ފަރާތްތަކުގެ ގޮތުން ތިންވަނައަށް އެންމެ އިސް ބޭފުޅާއެވެ. އެއީ ރައީސް ޖޯ ބައިޑަން އާއި ނާއިބު ރައީސް ކަމަލާ ހެރިސްއަށް ފަހުއެވެ. އެހެން ކަމުން ޕެލޯސީ ވެގެން ދާނީ 1997 އަށް ފަހު ޗައިނާއަށް ދަތުރު ކުރައްވާނެ އެމެރިކާގެ އެންމެ އިސް ލީޑަރަށެވެ.

ޓައިވާންގެ މިނިވަން ކަމަށް ބަލާއިރު، ޗައިނާއިން ބުނާގޮތުގައި ޓައިވާން އަކީ ޗައިނާގެ އަމިއްލަ ތަނެކެވެ. އަދި ބާރުގެ ބޭނުން ކޮށްގެން ޓައިވާންގެ ކޮންޓްރޯލް އަތުލާ ވާހަކަވެސް ދޭތެރެ ދޭރެއިން ދައްކައެވެ. އެމެރިކާއިން "ވަން ޗައިނާ ޕޮލިސީ" އަށް ތާއީދު ކޮށްފައިވާއިރު ޓައިވާނު ވަކި ދައުލަތެއްގެ ގޮތުގައި އެމެރިކާއިން ބަލައިގެން ނުވާނެކަމަށް ޗައިނާއިން ބުނެއެވެ. އެހެން ކަމަށް ވިއަސް ޓައިވާންގެ އަމިއްލަ ދިފާއު ވަރުގަދަ ކުރުމަށް ވެދޭ އެހީއެއްކަމަށް ބުނެ، އެމެރިކާއިން ގަވާއިދުން ޓައިވާނަށް ހަތިޔާރު ފޯރުކޮށްދެމުން ދެއެވެ. ވަކި ޤައުމެއްގެ ހައިސިއްޔަތުން ޓައިވާން އާއި ވޮޝިންޓަންއާ ދެމެދު އެއްވެސް ކަހަލަ ގުޅުމެއް ބޭއްވުމަކީ ޗައިނާއިން ގަބޫލު ކަމެއް ނޫނެވެ.

ޕެލޯސީ ދަތުރުފުޅު ކުރައްވާގޮތަށް ފުރަތަމަ އޮތީ އެޕްރިލް މަހުއެވެ. ނަމަވެސް އެފަހަރު ކެންސަލް ކުރުމަށް ފަހު އަދިވެސް ދަތުރުފުޅު ކުރިޔަށް ގެންދަވާފާނެ ކަމަށް ބުނެ ޚަބަރުތައް ފެތުރެން ފެށިހަމައިން، ޗައިނާގެ ޑިފެންސް މިނިސްޓްރީ އިން ވަނީ ހަރުކަށި ބަޔާނެއް ނެރެފަ އެވެ. ދަތުރުފުޅު ކުރިޔަށް ގެންދަވައިފިނަމަ ޓައިވާން ކަޑުއޮޅީގައި ކުރިމަތިލުންތައް އިތުރުވާނެ ކަމަށް ބުނެ އިންޒާރުވެސް ދީފައިވެއެވެ. އަދި މިހާރުވެސް ވަނީ މިލިޓަރީ ހަރަކާތްތައް އިތުރުކޮށްފައެވެ.

ނެންސީ ޕެލޯސީ އެމެރިކާގެ ގާނޫނު ހަދާ މަޖިލީހުގައި އިންނަވާތާ ތިރީސް އަހަރަށް ވުރެ ގިނަ ދުވަސް ވެއްޖެއެވެ. މި މުއްދަތުގައި އެކަމަނާ ޗައިނާއަށް އަބަދުވެސް ވަރަށް ފާޑު ވިދާޅުވާކަން ފާހަގަކުރެވެއެވެ.

1989 ޗައިނާގައި ޑިމޮކްރަސީއަށް ތާއީދުކޮށް ނުކުތް މީހުންނާ ދެކޮޅަށް 1989 ވަނަ އަހަރު ޗައިނާގެ ޓިއަނަންމަން މައިދާނުގައި ހިންގި ލޭއޮހޮރުވުން ކުށްވެރިކުރައްވާ ދިދަ އުފުލުމުގައި ޗައިނާއަށް ވަޑައިގެން ބައިވެރިވެވަޑައިގެންފައިވެއެވެ. އަދި 2019 ވަނަ އަހަރު ހަމަ ޗައިނާއާ ދެކޮޅަށް ހޮންގކޮންގގައިވެސް ޑިމޮކްރަސީއަށް ތާއީދުކޮށް ހިންގި ހަރަކާތުގައިވެސް ބައިވެރިވެވަޑައިގެންފައިވެއެވެ.

ޕެލޯސީގެ ދަތުރުފުޅަށް ވާދަވެރި ޑިމޮކްރެޓިކް ޕާޓީގެ އެތައް މެމްބަރުންނެއްވެސް ވަނީ ތާއީދު ކުރައްވާކަން ހާމަކުރައްވާފައެވެ.

ޕެލޯސީގެ ދަތުރުފުޅާމެދު ސީދާ އެކަމަނާ އަދި އެއްޗެއް ވިދާޅުވެފައި ނުވި ނަމަވެސް މިދިޔަ ހަފްތާގައި އެކަމަނާ ވަނީ ޓައިވާނަށް އެމެރިކާއިން ސަޕޯޓް ކުރުން މުހިންމު ކަމަށް ވިދާޅުވެފައެވެ.

ޗައިނާއިން ކަންބޮޑުވަނީ ކޮމިޔުނިސްޓް ޕާޓީގެ މިލިޓަރީ ގޮފި ޕީޕަލްސް ލިބަރޭޝަން އާމީގެ އެނިވާސަރީ ފާހަގަކުރުމަށް އޮގަސްޓް އެއްވަނަ ދުވަހު އެގައުމުގައި ބާއްވާ އިހްތިފާލްތަކާ ދިމާކޮށް ޕެލޯސީގެ ދަތުރުފުޅު ކުރިޔަށް ގެންދަވާފާނެ ކަމަށްޓަކައެވެ. އޭގެ ހަމަ ދުވަސްކޮޅެއް ފަހުން ކޮމިޔުނިސްޓް ޕާޓީގެ ވިހިވަނަ ކޮންގްރެސް އޮންނަ އިރު، އެ ކޮންގްރެސްގައި ރައީސް ޝީ ޖިންޕިން އުސޫލު މުގުރާލައްވާ ތިންވަނަ ޓަރމެއްގައި ހުންނެވޭ ގޮތަށް ގާނޫނުތަކަށް ބަދަލު ގެންނާނެއެވެ. މިއާއެކު ގައުމުގެ އެތެރެ ކެކި ގަނެފާނެކަމަށްޓަކައި އެތެރޭގައި މަގްބޫލުކަން ދެމެހެއްޓެވުމަށް ޓައިވާނުގެ މައްޗަށް ބާރުގެ ބޭނުން ކުރައްވާނެ ކަމަށް ދަނީ ބެލެމުންނެވެ. އެދަނޑިވަޅާ ދިމާކޮށް ޕެލޯސީ، ނުވަތަ އެމެރިކާގެ އެފަދަ އިސް ވެރިއަކު ޓައިވާނަށް ވަޑައިގަތުން ޗައިނާއަށް ހަޖަމެއް ނުކުރެވޭނެ އެވެ.

އެނަލިސްޓުން ދެކޭ ގޮތުގައި ޕެލޯސީގެ ދަތުރުފުޅާއި ގުޅިގެން ޗައިނާއިން ސީދާ އެކަމަނާއާ ދެކޮޅަށް ފިޔަވަޅެއް އަޅާފާނެ ކަމަކަށް ނުބެލެވެއެވެ. ނަމަވެސް ޓައިވާން ކަނޑުއޮޅި ސަރަހައްދުގައި "އޮޅިގެން" އެކްސިޑެންޓަތަކާއި އެހެންވެސް ކަންތައްތަކެއް ކުރިޔަށް ގެންގޮސްފާނެ ކަމަށް އެމެރިކާގެ އޮފިޝަލުން ދަނީ ބުނަމުންނެވެ. މިހާރުވެސް ޗައިނާއިން ވަނީ އެސަރަހައްދުގައި މިލިޓަރީ ހަރަކާތްތައް އިތުރުކޮށްފައެވެ. ނަމަވެސް ޓައިވާންގެ ޑިފެންސް މިނިސްޓްރީއިން ބުނި ގޮތުގައި އަމިއްލަ ގައުމު ދިފާއުކުރެވޭނެ ކަމުގެ ކެރިކުޅަދާނަކަމާއި އިތުބާރު އެބައޮތެވެ. އަދި އެމެރިކާގެ ފުރިހަމަ ތާއީދުވެސް ލިބޭނެ ތާއެވެ.