ރައީސް މައުމޫނަށް ސެކިއުރިޓީ ހަމަޖައްސައިފި
14 ޖޫން 2017 | ބުދަ 19:16އިންޑިއާއަށް ވަޑައިގަތީ ހަށިފާރަވެރިން ނެތި
ރައީސް މައުމޫން އަދި އެ މަނިކުފާނުގެ ހަށިފާރަވެރިޔާ (ކ): އެ މަނިކުފާނު ރާއްޖެ ވަޑައިގަތުމުން އެ މަނިކުފަނަށް އެމްއެންޑީއެފުން ވަނީ ސެކިއުރިޓީ ހަމަޖައްސާފައި
ކުރީގެ ރައީސް މައުމޫން އަބްދުލް ގައްޔޫމަށް ސެކިއުރިޓީ ނުދޭތާ ތިން މަހަށް ވުރެ ގިނަ ދުވަހަށް ފަހުން، އެ މަނިކުފާނު އެނބުރި މާލެ ވަޑައިގަތުމާއެކު ހަށިފާރަވެރިންނާއި ކާރުކޮޅު ހަމަޖައްސައިފި އެވެ.
އެމްއެންޑީއެފުން ރައީސް މައުމޫނަށް ހަމަޖައްސަވާފައި ހުރި ދެ ހަށިފާރަވެރިން އަނބުރާ ގެންދެވީ، އެ މަނިކުފާނު މާޗް 8، 2017 ވަނަ ދުވަހު އިންޑިއާއަށް ފުރާވަޑައިގަތުމަށް އެއާޕޯޓްގައި ހުންނަވަނިކޮށެވެ. ރައީސް މައުމޫނާއެކު އިންޑިއާއަށް ވަޑައިގަތުން ދެ ހަށިފާރަވެރިން ޗެކިން ވެސް ހެދި އެވެ. ނަމަވެސް އެމްއެންޑީއެފުން އެނގުމުން އެ ދެ އޮފިސަރުން ވަނީ ރައީސް މައުމޫން ގޮނިކަންޏާ ދޫކުރައްވައި ގޮސްފަ އެވެ.
ތިން މަހަށް ވުރެ ގިނަ ދުވަހު ބޭރުގައި އުޅުއްވުމަށް ފަހު އެ މަނިކުފާނު ބުދަ ދުވަހުގެ ރޭ ރާއްޖެ ވަޑައިގެންނެވިއިރު، ހަށިފާރަވެރިންނާއި ދަތުރުފަތުރު ކުރެއްވުމަށް ލޯންޗްކޮޅާއި ކާރުކޮޅު އޮތީ ހަމަޖައްސަވައިފަ އެވެ.
މިކަން އެ މަނިކުފާނުގެ ފެކްޝަނަށް ނިސްބަތްވާ އައިމިނަތު ނާދިރާ ރާއްޖެއެމްވީއަށް ކަށަވަރުކޮށް ދެއްވި އެވެ.
ދައުލަތުން ރައީސް މައުމޫނަށް ހަމަޖައްސާފައި އޮތް ސެކިއުރިޓީ ނެގުމުން އިދިކޮޅު ފަރާތްތަކުން ސަރުކާރަށް ވަރަށް ބޮޑަށް ފާޑު ކީކަން ފާހަގަ ކުރެވެއެވެ. ނަމަވެސް އެކަމަށް ސަރުކާރުން ރައްދެއް ދީފައެއް ނެތެވެ.
އެމްއެންޑީއެފުގެ ތަރުޖަމާނު އިބްރާހިމް އާޒިމް ވިދާޅުވީ "ރައީސް މައުމޫނަށް ދެއްވާ ސެކިއުރިޓީ ކުރިއަށް ގެންދަވާނެ" ކަމަށެވެ. އިތުރު ވާހަކައެއް އޭނާ ވިދާޅެއް ނުވި އެވެ.
