އެއްޖިންސުން ގުޅުން ހިންގި މައްސަލައިގައި ހިމެނޭ މީހުން ހައްޔަރުކުރަން ފަށައިފިއެވެ.
ރާއްޖެ.އެމްވީއަށް މައުލޫމާތު ލިބިފައިވާ ގޮތުގައި, މި މައްސަލައިގައި ހިމެނޭ މީހުން ހައްޔަރުކުރުމަށް ފުލުހުން ވަނީ ކްރިމިނަލް ކޯޓުން އަމުރުވެސް ހޯދާފައެވެ. މި މައްސަލައިގައި ސަރުކާރުގައި ހިމެނޭ ފަރާތްތަކާއި، އާންމުންނާއި، ސިޔާސީ ބައެއް ފަރާތްތައް ހިމެނެއެވެ. މި މައްސަލައާ ގުޅިގެން، މިކަމުގައި އިސްކޮށް ހިމެނޭ ބަންގްލަދޭޝްގެ ރައްޔިތެއް ކަމުގައިވާ އަލަމްގީރް ވަނީ ހައްޔަރުކޮށްފައެވެ.
އެއް ޖިންސުން ގުޅުން ހިންގި މައްސަލައިގައި ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރ މުހައްމަދު ނަޝީދު (ކާނަލް)ވެސް ވަނީ މިއަދުގެ ވަގުތެއްގައި ހައްޔަރުކޮށްފައެވެ.
އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯތަކެއް ލީކުވުމާއި ގުޅިގެން ފުލުހުން ބަލަމުންދާ މައްސަލަތަކެއްގެ ދަށުން، ނާޒިމް ސައްތާރުއާއި، މުހައްމަދު ނަޝީދު (ކާނަލް)ގެ އިތުރުން، ބަންގްލަދޭޝްގެ އަލަމްގީރް ފުރުން މަނާކޮށްފައިވާކަމަށް ފުލުހުން މީގެ ކުރިން ބުނެފައިވެއެވެެ.
ކޯޓު އަމުރެއްގެ ދަށުން އެމީހުންގެ ޕާސްޕޯޓު ހިފަހައްޓައި ފުރުން މަނާކޮށްފައިވާއިރު، އެމީހުންގެ މައްޗަށް ތަހުގީގު ހިންގަމުންދާކަމަށް ފުލުހުންގެ މީޑިއާ އޮފިޝަލު ވިދާޅުވެފައިވެއެވެ. އެކަމާ ގުޅިގެން ފުލުހުން މީގެ ކުރިން ބުނެފައިވަނީ، ސޯޝަލް މީޑިއާގައި ދައުރުވަމުންދާ ވީޑިއޯގައި ހިމެނޭ މީހުންގެ މައްސަލަތައް ތަހުގީގުކުރަމުންދާކަމަށެވެ. ހަމައެއާއެކު، ފުލުހުންނަށް ހުށައެޅިފައިވާ ބްލެކްމެއިލިންގގެ މައްސަލައެއްވެސް ތަހުގީގު ކުރަމުންދާކަން ވަނީ ފާހަގަކޮށްފައެވެ.
މި މައްސަލައިގައި ހިމެނޭ މީހުން މީގެ ކުރިން ހައްޔަރުކޮށްފައި ނުވަނީ ބައެއް ފަރާތްތަކުން އެޑިޓްކޮށްގެން ފޮޓޯތައް ދައުރުކުރަމުން ގޮސްފައިވާތީ، އިތުރަށް ބަލަންޖެހޭ ކަންކަން ހުރުމުން ކަމަށްވެސް ފުލުހުން ބުނެފައިވެއެވެ.
