ކުޅިވަރުގެ ދާއިރާގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ޒައާމަތުގައި ދިވެހިރާއްޖެއިން ހޯދަމުންދާ ކާމިޔާބީތަކަށް ކޮމަންވެލްތުން ތައުރީފުކޮށްފިއެވެ.

މިކަން ހާމަކޮށްފައިވަނީ މިހާރު ކުރިއަށްދާ 10 ވަނަ ކޮމަންވެލްތު ސްޕޯޓްސް މިނިސްޓަރުންގެ ބައްދަލުވުމުގައެވެ. އިނގިރޭސިިވިލާތުގެ ބާމިންހަމްގައި ކުރިއަށްދާ މި ބައްދަލުވުމުގައި ރާއްޖޭގެ ޔޫތު މިނިސްޓަރު އަޙުމަދު މަޚްލޫފް ވަނީ ބައިވެރިވެ ވަޑައިގަންނަވާފައެވެ.

މި ބައްދަލުވުމުގައި ބައިވެރިވެ ވަޑައިގެން މިނިސްޓަރު މަޚްލޫފް ކުރެއްވި ޓުވީޓެއްގައި ވިދާޅުވީ ރައީސް ޞާލިޙުގެ ވެރިަކަމުގައި ކުޅިވަރުގެ ދާއިރާއިން ދިވެހިރާއްޖެ ހޯދަމުންދާ ކާމިޔާބީތަކަށް ކޮމަންވެލްތުގެ ސްޕޯޓްސް މިނިސްޓަރުންނާއި، ކޮމަންވެލްތުގެ ސެކްރެޓަރީ ޖެނަރަލް ޕެޓްރީސިއާ ތައުރީފުކޮށްފައިވާ ކަމަށެވެ. މީގެ އިތުރުން ރާއްޖެއިން ސްޕެޝަލް އޮލިމްޕިކް މޯލްޑިވްސް އާއި މޯލްޑިވްސް ޕެރަލިމްޕިކް ކޮމެޓީ އެކުލަވާލާފައިވާ ގޮތާއި އަދި ކުޅިވަރުގައި އޮންނަ ޖިންސުގެ ތަފާތު ކުރުން ނައްތާލާފައިވާތީ ކޮމަންވެލްތުން މަރުޙަބާ ކިޔާފައިވާ ކަމަށެވެ.

މިއަހަރު ބާމިންހަމްގައި ކުރިއަށްދާ ކޮމަންވެލްތު ގޭމްސްގައި ދިވެހިރާއްޖެއިން ވާދަކުރާނެއެވެ. މިއީ މެދު ކެނޑުމަކަށްފަހު ދިވެހިރާއްޖެއިން ކޮމަންވެލްތު ގޭމްްސްގައި ބައިވެރިވާ އަހަރެކެވެ. އެންމެ ފަހުން ރާއްޖެއިން ކޮމަންވެލްތު ގޭމްސްގައި ބައިވެރިވީ 2014 ވަނަ އަހަރުއެވެ. ނަމަވެސް އޭގެ ފަހުން ކުރީގެ ރައީސް ޢަބްދުﷲ ޔާމީންގެ ސަރުކާރުން ކޮމަންވެލްތުން ވަކިވާން 2016 ވަނަ އަހަރު ނިންމުމާއެކު، ރާއްޖެއަށް ފުރުސަތު ގެއްލުނެވެ. އެގޮތަށް ނިންމުމުގެ ސަބަބުން 2018 ވަނަ އަހަރު އޮސްޓްރޭލިއާގެ ގޯލްޑް ކޯސްޓުގައި ބޭއްވި ކޮމަންވެލްތު ގޭމްސްގައި ރާއްޖެއަށް ބައިވެރިއެއް ނުވެވުނެވެ. އަލުން އަނބުރާ ކޮމަންވެލްތާ ގުޅުމަކީ އަދުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ރިޔާސީ ވައުދުފުޅެކެވެ. ރައީސްގެ ވެރިކަމުގެ ފުރަތަމަ 100 ދުވަހުގެ ތެރޭގައި ކޮމަންވެލްތާ ގުޅެން މަޖިލީހަށް ހުށަހަޅައި، އެކަން ފާސްކުރިއެވެ. އެއާއެކު ކޮމަންވެލްތު ގޭމްސްގައި ބައިވެރިވުމުގެ ފުރުސަތު ރާއްޖެއަށް ލިބުނުކަން ހާމަކުރީ 2020 ވަނަ އަހަރުއެވެ.

ރައީސް ޞާލިޙުގެ ސަރުކާރުގައި ކުޅިވަރުގެ ދާއިރާގައި ހޯދާ ކާމިޔާބީތަކަށް މީގެ ކުރިން ވެސް ބޭރު ޤައުމުތަކުގެ ތައުރީފު ވަނީ ލިބިފައެވެ. ދާދި ފަހުން ރާއްޖޭގައި ބޭއްވި އޭޝިއަން ބޮޑީބިލްޑިން އެންޑް ފިޒިކް ސްޕޯޓްސް ޗެމްޕިއަންޝިޕް ބާއްވާފައިވަނީ ވަރަށް ފުރިހަމަކޮށް ކަމަށާއި، ބޮޑީ ބިލްޑިން ވޯލްޑް ޗެމްޕިއަންޝިޕް ރާއްޖޭގައި ބޭއްވުމަށް މަސައްކަތް ކޮށްދެއްވާނެ ކަމަށް އޭޝިއާގެ ބޮޑީ ބިލްޑިން ފެޑެރޭޝަން (އޭބީބީއެފް) ގެ ރައީސް ދާތުކް ޕޯލް ޗުއާ ވަނީ ވިދާޅުވެފައެވެ.

ރާއްޖެއިން މިއަހަރުގެ ތެރޭގައި ބައިނަލްއަޤުވާމީ ގިނަ މުބާރާތްތަކެއް ބާއްވާނެއެވެ.