އައު ސީޒަނަށް ތައްޔާރުވުމުގެ ގޮތުން ނުމަންސިއާއާ ދެކޮޅަށް ކުޅުނު މެޗުން އެތުލެޓިކޯ މެޑްރިޑް މޮޅުވެއްޖެއެވެ.

އެތުލެޓިކޯއިން މެޗު ކާމިޔާބުކުރީ 4-0 ންނެވެ. އެ މެޗުގައި އެތުލެޓިކޯގެ ސަޕޯޓަރުން ވަނީ އެ ޓީމަށް ކްރިސްޓިއާނޯ ރޮނާލްޑޯ ގެނައުމާ ދެކޮޅުކަން ހާމަކޮށްފައެވެ. ސަޕޯޓަރުން ތިބީ "ސީއާރު7 ނޮޓް ވެލްކަމް" ޖަހާފައިވާ ބެނާތަކެއް ހިފައިގެންނެވެ. މިއީ އެތުލެޓިކޯއިން ރޮނާލްޑޯ ހޯދުމަށް މަސައްކަތް ކުރާ ކަމަށް މީޑިއާތަކުގައި ރިޕޯޓުކޮށްފައިވާ ދަނޑިވަޅެއްގައި އެ ޓީމުގެ ސަޕޯޓަރުން ކުރި ކަމެކެވެ. މީޑިއާތަކުގެ ވާހަކައާ ގުޅިގެން އެ ޓީމުގެ ރައީސް އެންރީކޭ ސެރޭޒޯ ބުނެފައިވަނީ އެއީ ދޮގު ވާހަކަތަކެއް ކަމަށާއި އެތުލެޓިކޯއިން ރޮނާލްޑޯ ގެންނަން ނޫޅޭ ކަމަށެވެ.

މެޗު ފަށައިގެން އަށްވަނަ މިނެޓުގައި އެތުލެޓިކޯއަށް ލީޑު ނަގައިދިނީ ތޯމަސް ލެމާއެވެ. ފުރަތަމަ ހާފު ނިމުމުގެ ކުރިން އެތުލެޓިކޯއިން ވަނީ އިތުރު ދެ ލަނޑު ޖަހާފައެވެ. އެއީ 32 ވަނަ މިނެޓުގައި އެންހެލް ކޮރެއާ ޖަހައިދިން ލަނޑާއި، 45 ވަނަ މިނެޓުގައި ޖެފްރީ ކޮންޑޮގްބިއާ ޖަހައިދިން ލަނޑެވެ. އެތުލެޓިކޯގެ ހަތަރު ވަނަ ލަނޑު އެ ޓީމުން ޖެހީ ދެވަނަ ހާފުގައެވެ. މަތެއުސް ކުންހާ މި ލަނޑު ޖެހީ 52 ވަނަ މިނެޓުގައެވެ.

އައު ސީޒަނަށް ތައްޔާރުވުމުގެ ގޮތުން އެތުލެޓިކޯއިން އަދި ދެ މެޗު ކުޅޭނެއެވެ. އެއީ މި މަހުގެ 30 ވަނަ ދުވަހު މެންޗެސްޓަރ ޔުނައިޓެޑާ ދެކޮޅަށް ކުޅޭ މެޗާއި، އޮގަސްޓު ހަތް ވަނަ ދުވަހު ޔުވެންޓަސްއާ ދެކޮޅަށް ކުޅޭ މެޗެވެ.