ރާއްޖޭގައި ސިޔާސީ މިނިވަންކަން އެބައޮތް، އިސްލާހުކުރަންޖެހޭ ކަންކަން އެބަހުރި – ޝަރީފް
ދިވެހިންގެ މުސްތަގުބަލު ކަނޑައެޅުމުގެ ފުރުސަތު ދިވެހިންނަށް ލިބިފައި އޮތުމަކީ ވަރަށް އުފާވެރިކަމެއް
މަރަދޫ ދާއިރާގެ މެންބަރު އިބްރާހިމް ޝަރީފް ފަލަސުރުޚީ ޕްރޮގްރާމުގައި
ރައްޖޭގައި ސިޔާސީ މިނިވަންކަން އެބައޮތް ކަމަށާއި، އެހެންނަމަވެސް އިސްލާހުކުރަން ޖެހޭ ބައިވަރު ކަންކަން އެބަހުރި ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
މިނިވަންދުވަހުގެ ހާއްސަ ޕްރޮގްރާމުތަކުގެ ތެރެއިން ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޝަރީފް ވިދާޅުވީ ދިވެހިން ގަބޫލުކުރާ ހަމަތަކާއި އުސޫލުތަކާއި އަދި ރާއްޖޭގެ ރައްޔިތުންނަށް އެމީހުންގެ ހާލަތު ކަނޑައަޅާނެ ގޮތުގެ މިނިވަންކަން ފުރިހަމަ ގޮތުގައި ލިބިފައިވާ ކަމަށެވެ. ޝަރީފް ވިދާޅުވީ މިނިވަންކަން ހިމާޔަތްކުރާނަމަ ކުރަންޖެހޭ ވަރަށް ބައިވަރު ކަންތައްތައް އެބަހުރި ކަމަށެވެ.
ގައުމެއްގެ ސިޔާސީ މިނިވަންކަން ދެމެހެއްޓޭނެ އެންމެ މުހިންމު އެއް ކަމަކީ އިގްތިސާދީ މިނިވަންކަން އޮތުން ކަމަށެވެ. ރައްޔިތުންގެ ތަނަވަސްކަމާއި ސިޔާދަތު ދެމެހެއްޓިފައި އޮންނަންޖެހޭ ކަމަށާއި، ރައްޔިތުންގެ ސުލްހަމަސްލަސްކަމާއި އަމާންކަމާއު އުފާ ފާގަތިކަން ނެތްނަމަ ސިޔާސީ މިނިވަންކަމެއް ވެސް އަދި ގާނޫނޫ އަސާސީން ލިބިދޭ މިނިވަންކަމެއްގެ ފޮނިމީރުކަމެއް ނުލިބޭނެ ކަމަށެވެ.
ޝަރީފް ވިދާޅުވީ އަޅުގަނޑުމެންނަކީ ވަރަށް ތަފާތު ގައުމެއް ކަމަށާއި، އަޅުގަނޑުމެންގެ ތެރޭގައި އޮތީ އެއް ނަސްލަކާއި، އެއް ބަހުރުވަޔަކާއި އެއް ދީނެއް ކަމަށެވެ. އަދި ދިވެހިންގެ މުސްތަގުބަލު ކަނޑައެޅުމުގެ ފުރުސަތު ދިވެހިންނަށް ލިބިފައި އޮތުމަކީ ވަރަށް އުފާވެރިކަމެއް ކަމަށެވެ. އެކަމުގެ ސަބަބުން ދިވެހިންގެ އިގްތިސާދީ މިނިވަންކަން ކަނޑައެޅި މި ސަރަހައްދުގައި ފަތުރުވެރިކަމުގެ ގޮތުން އެންމެ ކުރިއަރައި ދިޔަ ގައުމުގެ ގޮތުގައި ރާއްޖެ ވެފައިވާކަމަށެވެ.
ޝަރީފް ވިދާޅުވީ ސިޔާސީ މިނިވަންކަން އޮތުމުގެ ނަތީޖާއެއްގެ ގޮތުން ދިވެހިންނަށް އަމިއްލަ ސިޔާސަތެއް ބައްޓަންކޮށްގެން ދުނިޔެ މިހާރު އޮތް ހާލަތުގެ ނިސްބަތުން ދިވެހިންނަން ކަންކަން ރަނގަޅު ކަމަށެވެ. ޝަރީފް ވިދާޅުވީ ސަބްސިޑީގެ ގޮތުގައި އަދި މަސްވެރިންނަށް ދޭ އެހީތަކާއެކު ކަންކަން ރަނގަޅުވާ ކަމަށާއި، މި ހުރިހާ ކަމަކީ ވެސް އިގްތިސާދީ ފުދުންތެރިކަން ދެމެހެއްޓުމަށްޓަކައި ސަރުކާރުން ކުރަމުން ގެންދާ ކަމެއް ކަމަށެވެ.
ޝަރީފް ވިދާޅުވީ އެހެން ބައެއްގެ ބާރު އޮތްނަމަ މިކަންކަން ކުރުމުގެ ފުރުސަތެއް ސަރުކާރަށް ވެސް ނޯންނާނެ ކަމަށެވެ. އޭނާ ވިދާޅުވީ އިގްތިސާދީ ފުދުންތެރިކަމެއް ދެމެހެއްޓިގެން ނޫނީ ރައްޔިތުންގެ މިނިވަންކަމެއް ދެމެނުހެއްޓޭނެ ކަމަށެވެ.
