މެމްބަރު ޝަރީފް ސިޔާސީ މަސައްކަތާއި އެއްކޮށް ދުރަށް
ސަރުކާރުތައް ޖަވާބުދާރީކުރުމުގައި ވެސް ގިނަ މަސައްކަތްތަކެއް ޝަރީފް ކުރެއްވި
ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް
މަރަދޫ ދާއިރާގެ މެމްބަރު އިބްރާހިމް ޝަރީފް ސިޔާސީ މަސައްކަތާއި އެއްކޮށް ދުރަށް ވަޑައިގަންނަވަން ނިންމަވައިފިއެވެ
އެފަދަ ނިންމެވުމެއް ނިންމެވިކަން އޭނާ ވަނީ އެމްޑީޕީގެ ޕީޖީ ގްރޫޕްގެ މެމްބަރުން ތިއްބަވާ ވަޓްސްއެޕް ގްރޫޕެއްގައި ހިއްސާކުރައްވާފައެވެ.
އެކަމާއި ގުޅޭގޮތުން މައުލޫމާތު ހޯދުމަށް ގުޅާލުމުން ޝަރީފް ވަނީ އޭނާ ސިޔާސީ ދާއިރާ ދޫކޮށްލަން ނިންމަވާފައިވާ ކަަމަށް ވިދާޅުވެފައެވެ. ޝަރީފް ވިދާޅުވީ ސިޔާސީ މައިދާއނުގައި އިތުރަށް މަސައްކަތް ކުރުމުގެ ޝައުގެއް މިވަގުތު އޭނާގެ ނެތް ކަމަށެވެ. އަދި އެތައް ދުވަހަކު މަސައްކަތް ކުރެވުނު އިރު ވެސް ރަނގަޅު މަސައްކަތްތަކެއް ކުރެވުނުކަމަށް ބަލައިނުގަންނަކަމުގެ ކަންބޮޑުވުން އޭނާ ހިއްސާކުރެއްވިއެވެ. ޝަރީފް ވަނީ ސިޔާސީ ދާއިރާ ދޫކޮށްލައްވާ، ކުރިއަށް އޮތް މަޖިލިސް އިންތިޚާބަށް ވެސް ވާދަ ނުކުރައްވަން ނިންމަވާފައިވާ ކަމަށް ވިދާޅުވެފައެވެ. އެހެންނަމަވެސް އޭނާ ދެން ފެނިގެންދާނީ ކޮން ދާއިރާއަކުންކަން އަދި ކުރައްވާނީ ކޮން މަސައްކަތެއްކަން ހާމައެއް ނުކުރައްވައެވެ. އަދި ޕާޓީވެސް ދޫކޮށްލައްވާނީތޯ ނުވަތަ ނޫންތޯ އަދި ސާފުކޮށް ދަންނަވަން ނޭނގޭކަމަށް އޭނާ ވިދާޅުވިއެވެ.
ޝަރީފް އަކީ ސިޔާސީ ދާއިރާގައި ގިނަ ދުވަސްތަކެއްވަންދެން ޚިދުމަތްކުރައްވާފައިވާ އެއް ބޭފުޅާއެވެ. އޭނާ ވަނީ ރައްޔިތުންގެ މަޖިލީހުގައި ވެސް ގިނަ އަހަރު ތަކެއް ވަންދެން މަސައްކަތްކުރައްވާފައެވެ. އެގޮތުން ވިއްސަކަށް އަހަރު ދުވަހު މަޖިލީހުގައި ޝަރީފް ވަނީ ޚިދުމަތްކުރައްވާފައެވެ. އަދި ޚާއްސަ މަޖިލީހުގައި ވެސް ޚިދުމަތްކުރައްވާފައިވާ ޝަރީފަކީ ފެހި ޤާނޫނު އަސާސީ އެކުލަވާލުމުގެ މަސައްކަތުގައި ވެސް ޝާމިލްވެވަޑައިގެންނެވި ބޭފުޅެކެވެ. ޝަރީފަކީ މަޖިލީހުގެ ކޮމިޓީތަކުގައި އާއި މަޖިލީހުގެ ތަޅުމުގައި ބިލްތަކަށް ވާހަކަދެއްކެވުމާއި، ސަރުކާރުތައް ޖަވާބުދާރީކުރުމުގައި ވެސް ގިނަ މަސައްކަތްތަކެއް ކުރައްވާފައިވާ ބޭފުޅެކެވެ.
