ޖުޑީޝަލް ސަރވިސް ކޮމިޝަން (ޖޭއެސްސީ) އެންމެ ބޮޑަށް ސިޔާސީ ވަނީ މަޖިލީހުގެ ރައީސް އެތާ ހުންނަވާތީ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ސަރުކާރުގެ ފަރާތުން، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ހުށަހަޅުއްވާފައިވާ، ޤާނޫނު ނަންބަރު 10/2008 (ޖުޑީޝަލް ސަރވިސް ކޮމިޝަނުގެ ޤާނޫނު) އަށް އިޞްލާޙު ގެނައުމުގެ ބިލުގެ އިބްތިދާއީ ބަހުސްގައި ވާހަކަފުޅުދައްކަވަމުން މެންބަރު ޝަރީފް ވިދާޅުވީ ޖޭއެސްސީއަށް ސިޔާސީ ނުފޫޒު ވަދެފައި އޮންނަ ވާހަކަ ފާއިތުވި 5 އަހަރު ދެކެވުނު ކަމަށާއި، ސިޔާސީ ނުފޫޒުގެ އެންމެ ބޮޑު މައި ނާރެހަކީ މަޖިލީހުގެ ރައީސް ކޮމިޝަންގެ މެންބަރެއްގެ ގޮތުގައި އިންނެވުން ކަމަށެވެ.
ޝަރީފް ވިދާޅުވީ އޭގެ އިތުރުން ސިވިލް ސަރވިސް ކޮމިޝަނުގެ ރައީސާއި، ރައްޔިތުންގެ މަޖިލީހުގެ މެންބަރެއް ޖޭއެސްސީގައި ހުންނެވުމަކީ ވެސް އެތަން ސިޔާސީ ވާކަމެއްކަމަށެވެ.
މިކަންކަން ބަދަލުކުރުމަށްޓަކައި، ޖޫން 19 ގައި ހުށަހެޅިގެން ދިޔާއީމާ އޮކްޓޯބަރު މަހުގެ 11 ވަނަ ދުވަހު ބަހުސްކުރަންޖެހުުމަކީ ވިސްނާލަންޖެހޭ ކަމެއް. މިއީ މަޖިލީހުގެ ރިޔާސަތުން ޖުޑީޝަރީ އިސްލާހުކުރުމަށް ފުރުސަތު ނުދިނުމަށް ކުރާ ކަމެއް.މަރަދޫ ދާއިރާގެ މެންބަރު އިބްރާހިމް ޝަރީފް
މަޖިލީހުގެ ރައީސާއި ސިވިލް ސަރވިސް ކޮމިޝަންގެ ރައީސާއި ރައީސުލްޖުމްހުރިއްޔާ އައްޔަންކުރައްވާ މެންބަރު ޖޭއެސްސީގައި ނުހިމަނަން އިސްލާހެއް ވަނީ ހުށަހަޅާފައެވެ.
މި ބިލުން އިސްލާހު ގެނެވެނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 7 ވަނަ ބާބުގެ 158 ވަނަ މާއްދާ ކަމުގައިވާ ޖުޑީޝަލް ސަރވިސް ކޮމިޝަން އެކުލެވިގެންވާގޮތަށެވެ. މި އިސްލާހުގައި 3 ހައިސިއްޔަތަކުން އެކޮމިޝަނުގައި ހިމެނިފައިވާ ބޭފުޅުން އުނިކުރުމަށް ވަނީ ހިމަނާފައެވެ.
އެގޮތުން 158 ވަނަ މާއްދާގެ (ހ) ހިމެނިފައިވާ ރައްޔިތުންގެ މަޖިލީހުގެ ރައީސް، ޖުޑީޝަލް ސަރވިސް ކޮމިޝަނުގައި ހިމެނިވަޑައި ނުގަންނަވާ ގޮތަށް އިސްލާހު ހުށަހެޅިފައިވެއެވެ. އަދި 158 ވަނަ މާއްދާގެ (ކ) ގައި ހިމެނިފައިވާ ސިވިލް ސަރވިސް ކޮމިޝަންގެ ރައީސް ވެސް އިންނަވާ ކަމަށާއި، އިސްލާހުގައިވަނީ ސިވިލް ސަރވިސް ކޮމިޝަނުގެ ރައީސް ޖޭއެސްސީގައި ނުހިމެނޭ ގޮތަށް އިސްލާހު ހުށަހަޅާފައިވެއެވެ.
158 ވަނަ މާއްދާގެ (އ) ގައި ހިމެނިފައިވާ ރައީސުލްޖުމްހޫރިއްޔާ ކަނޑައަޅުއްވާ މެންބަރުވެސް ނުހިމެނޭ ގޮތަށް ވަނީ އިސްލާހު ހުށަހަޅާފައެވެ.
