މެމްބަރު ޝަރީފް އެމްޑީޕީން ވަކިވެވަޑައިގެންފި
އެމްޑީޕީން ވަކިވެވަޑައިގެންނެވި އިރު އޭނާ ވަނީ ސިޔާސީ މަސައްކަތާއި ވެސް ދުރަށް ވަޑައިގަންނަވާފައި
މަރަދޫ ދާއިރާގެ މެންބަރު އިބްރާހިމް ޝަރީފް
މެމްބަރު ޝަރީފް އެމްޑީޕީން ވަކިވެވަޑައިގެންފިއެވެ.
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބުނީ މަރަދޫ ދާއިރާގެ މެމްބަރު އިބްރާހިމް ޝަރީފް އެ ޕާޓިން ވަކިވެވަޑައިގެންފައިވާ ކަމަށެވެ. އަދި ޕާޓީއަށް ކޮށްދެއްވާފައިވާ ހިދުމަތަށް އެ ޕާޓީން ވަނީ ޝަރީފަށް މަރުހަބާ އަދި ޝުކުރު ދަންނަވާފައެވެ.
މަރަދޫ ދާއިރާގެ މެމްބަރު އިބްރާހިމް ޝަރީފް އެމްޑީޕީން ވަކިވެވަޑައިގެންފައިވަނީ، ސިޔާސީ މަސައްކަތާއި އެއްކޮށް ދުރަށް ވަޑައިގަންނަވަން ނިންމާ އެކަން އެމްޑީޕީގެ ޕީޖީ ގްރޫޕްގެ މެމްބަރުން ތިއްބަވާ ވަޓްސްއެޕް ގްރޫޕެއްގައި ހިއްސާކުރައްވާފައިވަނިކޮށެވެ.
ސިޔާސީ ދާއިރާ ދޫކޮށްލަން ނިންމަވާފައިވާ ކަން ހާމަކުރައްވާ ޝަރީފް ވިދާޅުވެފައިވަނީ ސިޔާސީ މައިދާނުގައި އިތުރަށް މަސައްކަތް ކުރުމުގެ ޝައުގެއް މިވަގުތު އޭނާގެ ނެތް ކަމަށެވެ. އަދި އެތައް ދުވަހަކު މަސައްކަތް ކުރެވުނު އިރު ވެސް ރަނގަޅު މަސައްކަތްތަކެއް ކުރެވުނުކަމަށް ބަލައިނުގަންނަކަމުގެ ކަންބޮޑުވުން އޭނާ ހިއްސާކުރެއްވިއެވެ. ޝަރީފް ވަނީ ސިޔާސީ ދާއިރާ ދޫކޮށްލައްވާ، ކުރިއަށް އޮތް މަޖިލިސް އިންތިޚާބުގައި ވެސް ވާދަ ނުކުރައްވަން ނިންމަވާފައިވާ ކަމަށް ވިދާޅުވެފައެވެ. އެހެންނަމަވެސް އޭނާ ދެން ފެނިގެންދާނީ ކޮން ދާއިރާއަކުންކަން އަދި ކުރައްވާނީ ކޮން މަސައްކަތެއްކަން ހާމައެއް ނުކުރައްވައެވެ.
ޝަރީފް އަކީ ސިޔާސީ ދާއިރާގައި ގިނަ ދުވަސްތަކެއްވަންދެން ޚިދުމަތްކުރައްވާފައިވާ އެއް ބޭފުޅާއެވެ. އޭނާ ވަނީ ރައްޔިތުންގެ މަޖިލީހުގައި ވެސް ގިނަ އަހަރު ތަކެއް ވަންދެން މަސައްކަތްކުރައްވާފައެވެ. އެގޮތުން ވިއްސަކަށް އަހަރު ދުވަހު މަޖިލީހުގައި ޝަރީފް ވަނީ ޚިދުމަތްކުރައްވާފައެވެ. އަދި ޚާއްސަ މަޖިލީހުގައި ވެސް ޚިދުމަތްކުރައްވާފައިވާ ޝަރީފަކީ ފެހި ޤާނޫނު އަސާސީ އެކުލަވާލުމުގެ މަސައްކަތުގައި ވެސް ޝާމިލްވެވަޑައިގެންނެވި ބޭފުޅެކެވެ. ޝަރީފަކީ މަޖިލީހުގެ ކޮމިޓީތަކުގައި އާއި މަޖިލީހުގެ ތަޅުމުގައި ބިލްތަކަށް ވާހަކަދެއްކެވުމާއި، ސަރުކާރުތައް ޖަވާބުދާރީކުރުމުގައި ވެސް ގިނަ މަސައްކަތްތަކެއް ކުރައްވާފައިވާ ބޭފުޅެކެވެ.
