"ބާސެލޯނާއަށް ބަދަލުވި ފަހުން 8-2 ގެ ވާހަކައެއް ނުދައްކަން!"

ސްޕެއިންގެ ބާސެލޯނާއަށް ބަދަލުވި ފަހުން 8-2 ގެ ވާހަކަ ނުދައްކާ ކަމަށް ޕޮލޭންޑުގެ ފޯވާޑް ރޮބާޓް ލެވަންޑޯސްކީ ބުނެފިއެވެ.

ލެވަންޑޯސްކީ މިގޮތަށް ވާހަކަ ދައްކާފައިވަނީ ބާސެލޯނާއަށް ބަދަލުވިފަހުން އޭނާގެ ފުރަތަމަ ޕްރެސް ކޮންފަރެންސްގައެވެ. އެ ޕްރެސްގައި ލެވަންޑޯސްކީ ވަނީ ބާސެލޯނާއަށް ބަދަލުވެ، ކުރިއަށް ދާން ބޭނުންވާ ގޮތުގެ ބައިވަރު ވާހަކަ ވެސް ދައްކާފައެވެ.

މީގެ ކުރިން 2020 ވަނަ އަހަރު ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ބާސެލޯނާއިން ވަނީ ބަޔާން މިއުނިކާ ބައްދަލުކޮށްފައެވެ. ޕޯޗުގަލްގެ ލިސްބަންގައި ކުޅުނު އެ މެޗު ބަޔާނުން ކާމިޔާބުކުރީ 8-2 ގެ ތަފާތު ބޮޑު ނަތީޖާއަކުންނެވެ. އެއީ 1946 ވަނަ އަހަރުގެ ފަހުން ބައިކޮޅަށް 8 ލަނޑު ވަދެގެން ބާސެލޯނާ ބަލިވި ފުރަތަމަ ފަހަރެވެ. އޭރު ލެވަންޑޯސްކީ އަކީ ބަޔާންގެ ކުޅުންތެރިޔެކެވެ. އެ މެޗުގައި އޭނާ ވަނީ ލަނޑު ވެސް ޖަހާފައެވެ.

އެކަމާ ގުޅޭ ގޮތުން ލެވަންޑޯސްކީއާ ސުވާލުކުރުމުން އޭނާ ބުނީ، އެކަމާ ގުޅޭ ގޮތުން އޭނާ އާއި ބާސެލޯނާގެ ކުޅުންތެރިންނާ ދެމެދު އެއްވެސް ވާހަކައެއް ނުދައްކާ ކަމަށެވެ. މީގެ އިތުރުން އޭނާ ބުނީ އެއީ މާޒީ ކަމަށާއި، އެންމެ ރަނގަޅު ގޮތަކީ ފަހަތަށް ނުބަލައި ކުރިއަށް ދިޔުން ކަމަށެވެ. އަދި އެމީހުންގެ (ބާސެލޯނާގެ) ވިސްނުމަކީ ވެސް އެއީ ކަމަށް ލެވަންޑޯސްކީ ބުންޏެވެ.

އިތުރަށް ވާހަކަ ދައްކަމުން އޭނާ ބުނީ ބާސެލޯނާއަށް ކުޅޭ ކުޅުންތެރިޔަކު ނަމަ، އަބަދުވެސް ވިސްނާނީ ތަށި ކާމިޔާބުކުރަން ކަމަށެވެ. ނަމަވެސް އެކަން ކުރެވޭނީ ހަރުފަތަކަށް ފަހު ހަރުފަތަކުން ކަމަށް އޭނާ ފާހަގަކުރިއެވެ. ލެވަންޑޯސްކީ ބުނީ ބާސެލޯނާގައި އޮތް ހިތްވަރަށް ބަލާއިރު، ކުރިއަށް އޮތް ސީޒަންގައި ރަނގަޅު ފައިޓެއް ދީ، ކުރީ ސީޒަނަށްވުރެ ރަނގަޅު ނަތީޖާއެއް ނެރެވޭނެ ކަމަށެވެ.

ބާސެލޯނާއަށް ބަދަލުވި ފަހުން މިހާތަނަށް އެ ޓީމާއެކު ލެވަންޑޯސްކީ ކުޅުނީ ދެ މެޗެވެ. އެއީ ރެއާލް މެޑްރިޑާ ދެކޮޅަށް ކުޅުނު މެޗާއި، ޔުވެންޓަސްއާ ދެކޮޅަށް ކުޅުނު މެޗެވެ.