"ރަސް ވާދަ" އިން ބުނެދިނީ ނިއުރޭޑިއަންޓާއި ވިކްޓްރީ ދިވެހި ފުޓްބޯޅައަށް ބޭނުންވާކަން- ސޮބާ

"ރަސް ވާދަ"އިގެ ގޮތުގައި ޕްރޮމޯޓްކުރި ނިއުރޭޑިއަންޓާއި ވިކްޓްރީގެ މެޗުން ބުނެދިނީ އެދެކްލަބް ދިވެހި ފުޓްބޯޅައަށް ބޭނުންވާ މިންވަރުކަމަށް އެދެ ކްލަބްގެ ކެޕްޓަންކަން ކުރި ސޮބާހު މުޙައްމަދު ބުނެފިއެވެ.

ނިއުރޭޑިއަންޓް ގޮވައިގެން ރަސްވާދައަށް ނުކުތް ކޯޗު ސޮބާ ބުނީ އެމެޗުގައި ސަޕޯޓަރުން ވަދެ ދިން ތަރުހީބުން ބުނެދެނީ ދިވެހި ފުޓްބޯޅަައަށް އެދެކްލަބް މުހިއްމުވާ މިންވަރު ކަމަށެވެ. އޭގެ އިތުރުން ދެވަނަ ޑިވިޝަނުން ފުރަތަމަ ޑިވިޝނަަށް އައި ކްލަބް ވެލެންސިޔާއާވެސް ނުލައި ދިވެހި ފުޓްބޯޅަ ކުރިއަށް ނުދާނެކަމަށެވެ. ސޮބާ ބުނީ އަހަރު ތަކަކަށްފަހު ކްލަބު ފުޓްބޯޅަ މެޗެއްގައި ކުޅުންތެރިންނަށް ސަޕޯޓަރުންގެ މުހިއްމުކަން އިހުސާސްކޮށްދިން މެޗުން ދޭހަކޮށްދެނީ ބޮޑަތި ކްލަބްތައް ފުރަތަމަ ޑިވިޝަންގައި އޮންނަން ބޭނުންވާ މިންވަރު ކަމަށެވެ. އެކްލަބްތަކާ ނުލައި ދިވެހި ފުޓްބޯޅަ ކުރިނާރާނެކަމަށް ޤައުމީ ޓީމްގެ ކުރީގެ ޑިފެންޑަރު ބުންޏެވެ.

ސޮބާ ބުނީ ބޮޑު ދެކްލަބް އަޔަނުދޭން މަސައްކަތްކުރާ މީހުން އެ ނޭދެނީ ފުޓްބޯޅަ ރަނގަޅުވެ, ކުރިއަށްދާންކަމަށެވެ. ފުޓްބޯޅަ އަލުން ކުރިއަށްގެންދަން ބޭނުންނަމަ މިކްލަބްތައް ގެންނަން ޖެހޭކަން ސޮބާ ފާހަގަކުރިއެވެ.

ތިން އަހަރުގެ ސަސްޕެންޝަނަކަށްފަހު ނިއުރޭޑިއަންޓާއި ވިކްޓްރީ އެނބުރި އައިސް މިހާރު ވާދަކުރަމުން ދަނީ ދެވަނަ ޑިވިޝަންގައެވެ. ދެވަނަ ޑިވިޝަންގެ ގްރޫޕް ސްޓޭޖްގައި އާދިއްތަ ދުވަހުގެރޭ ދެޓީމް ވާދަކުރި މެޗު ވެގެންދިޔައީ މިދިޔަ ހަތަރު ފަސް އަހަރެއްގެ ތެރޭގައިވެސް ކްލަބް ފުޓްބޯޅަ މެޗެއް ބަލަން އެންމެ ގިނަ އަދަކަށް މީހުން ވަން މެޗަށެވެ. އަދި ފަސް ވަރަކަށް އަހަރު ތެރޭގައިވެސް ކްލަބް ފުޓްބޯޅަ މެޗެއްގައި ސަޕޯޓަރުންގެ ސަޕޯޓް އެންމެ ބޮޑަށް ލިބުނު އެއް މެޗަށެވެ.

އެމެޗު ބަލަން އެކި ދުވަސްވަރު ފުޓްބޯޅަ ކުޅުނު ކުރީގެ ކުޅުންތެރިންނާއި, ދެކްލަބަށް މަރުދޭ ސަޕޯޓަރުން ވަނެވެ. އޭގެތެރޭގައި އަންހެނުންނާއި ކުދަކުދިންވެސް ހިމެނެއެވެ.