ލީގު ނުނިމެނީސް ޖެސިކް މާޒިޔާގެ ކޯޗުކަން ދޫކޮށްލައިފި

މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗުކަމުގެ މަގާމުގައި ހުރި މަޔޮޑްރަގް ޖެސިކް ޓީމު ދޫކޮށްލައިފިއެވެ.

ޖެސިކް މާޒިޔާ ދޫކޮށްލިރު، ލީގުގައި ބާކީ ދެ މެޗު އެބަ އޮތެވެ. ނަމަވެސް މާޒިޔާއިން ވަނީ ލީގުގެ ޗެމްޕިއަންކަން ޖެހިޖެހިގެން ތިން ވަނަ ފަހަރަށް ހޯދާފައެވެ. މާޒިިޔާ ދޫކޮށްލަން ޖެސިކް ނިންމިއިރު، އޭނާއާއެކު މަސައްކަތް ކުރި ފިޓްނަސް ކޯޗު ގޯރާން ގުޒިޖާން ވެސް ވަނީ ޓީމު ދޫކޮށްލާފައެވެ. މާޒިޔާ ދޫކޮށްލުމަށްފަހު ޖެސިކާއި ގޯރާން ބަދަލުވީ ސައުދީގެ އެއް ވަނަ ޑިވިޝަން އަލް ޝޯލާ އެފްސީއަށެވެ.

މިދިޔަ ފެބްރުވަރީ މަހުގެ ތެރޭގައި މާޒިޔާގެ ކޯޗުކަމާ ޖެސިކް ހަވާލުވިފަހުން އެ ޓީމު ކުޅެފައިވަނީ 19 މެޗެވެ. އޭގެ ތެރެއިން މާޒިޔާ ވަނީ 18 މެޗުން މޮޅުވެފައެވެ. އެންމެ މެޗަކުން ބަލިވީއިރު، އެއީ ކުލަބް އީގަލްސް އަތުންވީ ބައްޔެވެ. ލީގުގައި މާޒިޔާއިން ވަނީ ޖުމުލަ 76 ގޯލު ޖަހާފައެވެ. އެ ޓީމުގެ ކޮޅަށް ވެދަފައިވަނީ ފަސް ގޯލެވެ.

ޖެސިކްގެ އިރުޝާދުގެ ދަށުން މާޒިޔާ ވަނީ އޭއެފްސީ ކަޕްގައި ވެސް ވާދަކޮށްފައެވެ. އޭއެފްސީ ކަޕްގައި ކުޅުނު ތިން މެޗުގެ ތެރެއިން މާޒިޔާ ވަނީ އެއް މެޗުން މޮޅުވެފައެވެ. އަނެއް ދެ މެޗުން އެ ޓީމު ވަނީ ބަލިވެފައެވެ.

މާޒިޔާއިން އާންމުކުރި ބަޔާނެއްގައި ވަނީ ޖެސިކާއި ގޯރާން އަށް ޝުކުރު އަަދާކޮށްފައެވެ. އެ ޓީމުން ބުނެފައިވަނީ ފާއިތުވި ހަ މަސް ދުވަހުގެ ތެރޭގައި ޖެސިކްގެ އިރުޝާދުގެ ދަށުން މާޒިޔާއިން ވަނީ ބޮޑެތި ކުރިއެރުންތަކެއް ހޯދާފައިކަމަށެވެ. މީގެ އިތުރުން މާޒިޔާއިން ހާމަކޮށްފައިވާ ގޮތުގައި ޖެސިކާއި ގޯރަން މިހާރު ވަނީ ރާއްޖެ ދޫކޮށް ގޮސްފައެވެ.

ޖެސިކަކީ ފުރަތަމަ ޑިވިޝަނުގައި މާޒިޔާއަށް ކޯޗުކޮށްދިން ބިދޭސީ ތިންވަނަ ކޯޗެވެ. މީގެ ކުރިން މާޒިޔާއަށް ފުރަަތަމަ ޑިވިޝަނުގައި ދެ ފަހަރެއްގެ މަތިން މެސެޑޯނިއާގެ ކޯޗު މަރުޖާން ސެކުލޮސްކީ އިރުޝާދުދިނެވެ. ސާބިއާގެ ރިސްޓޯ ވިޑަކޮވިޗް ވެސް ވަނީ މާޒިޔާއަށް އިރުޝާދު ދީފައެވެ.