ވާދަވެރި ރެއާލް މެޑްރިޑަށްވުރެ ބާސެލޯނާ މޮޅު ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ޒަވީ މިހެން ބުނީ އައު ސީޒަނަށް ތައްޔާރުވުމުގެ ގޮތުން ބާސެލޯނާއިން ރެއާލް މެޑްރިޑާ ދެކޮޅަށް ކުޅުނު މެޗު ކާމިޔާބުކުރުމަށްފަހުއެވެ. އެ މެޗުން ބާސެލޯނާ މޮޅުވީ 1-0 ންނެވެ.

ޕްރީ ސީޒަން ކުރިއަށްދާ ގޮތާ ގުޅޭ ގޮތުން ވާހަކަ ދައްކަމުން ޒަވީ ބުނީ، އޭނާ ހުރީ ވަރަށް ހިތްހަމަ ޖެހިގެން ކަމަށެވެ. ޒަވީ ބުނީ އެންމެ މުހިންމީ މޮޅުވުން ކަމަށާއި، ރެއާލް ބަލިކުރުމަކީ ޓީމުގެ ހުރިހާ ކުޅުންތެރިން ލޯބިކުރާ ކަމެއް ކަމަށެވެ. މީގެ އިތުރުން ޒަވީ ބުނީ މެޗުގެ ފުރަތަމަ ހާފު ވަރަށް ރަނގަޅަށް ދިޔަ ނަމަވެސް، ދެ ވަނަ ހާފު ފެނުނީ ފުރަތަމަ ހާފާ އަޅާބަލާއިރު ދައްކޮށް ކަމަށެވެ. އޭނާ ފާހަގަ ކުރި ގޮތުގައި ޓީމުގެ ކުޅުންތެރިންގެ ފިޒިކަލް ފެންނަނީ ވަރަށް ރަނގަޅަށް ކަމަށެވެ. ރަނގަޅު ބާސާއެއް ފެނުނުކަން ފާހަގަކޮށް ޒަވީ ބުނީ ރަނގަޅު ކުރަން ޖެހޭ ކަންކަން އަދިވެސް އެބަ ހުރި ކަމަށެވެ.

ރެއާލާ ދެކޮޅަށް ކުޅުނު މެޗުގެ ނަތީޖާއާ މެދު ހިތްހަމަ ޖެހޭކަން ފާހަގަކޮށް ޒަވީ ބުނީ، ރެއާލަށްވުރެ ބާސާ މޮޅުކަމަށެވެ. މީގެ އިތުރުން އޭނާ ބުނީ މުޅި ބާސާއަށް އެއީ މުހިންމު މޮޅެއް ކަމަށާއި، ރަނގަޅު އުންމީދެއް އައު ކުރެވިއްޖެ ކަމަށެވެ.

ޓްރާންސްފާ މާކެޓުގައި ބާސެލޯނާއިން ވަނީ ވަރުގަދަ ކުޅުންތެރިން ތަކެއް ވެސް ހޯދާފައެވެ. އޭގެ ތެރޭގައި ޕޮލޭންޑުގެ ކެޕްޓަން ރޮބާޓް ލެވަންޑޯސްކީ ހިމެނެވެ. ބާސެލޯނާއަށް ބަދަލުވެ ލެވަންޑޯސްކޯ ބާސެލޯނާއަށް ކުޅުނު ފުރަތަމަ މެޗަކީ ރެއާލާ ދެކޮޅަށް ކުޅުނު މެޗެވެ. އެ މެޗު އޭނާ ފަށާފައިވަނީ ޓީމުގެ ފުރަތަމަ 11 ގައި ހިމެނިގެންނެވެ. ލެވަންޑޯސްކިއާ ގުޅޭ ގޮތުން ވާހަކަ ދައްކަމުން ޒަވީ ބުނީ، އޭނާ އަކީ ދުނިޔޭގެ ފެންވަރުގެ ކުޅުންތެރިއެއް ކަމަށެވެ. ޒަވީ ފާހަގަކުރި ގޮތުގައި ލެވަންޑޯސްކީ ވަނީ އޭނާގެ ކެރިއަރުގައި އެތައް ގޯލެއް ޖަހާފައިކަމަށާއި، ކުރިއަށް އޮތް ތަނުގައި ވެސް އެކަން ތަކުރާރުވާނެ ކަމަށެވެ.

މީގެ އިތުރުން ޒަވީ ބުނީ މަދު ދުވަސްކޮޅެއްގެ ތެރޭގައި ލެވަންޑޯސްކީ ޓީމަށް ފަރިތަވެެއްޖެ ކަމަށެވެ. އަދި އޭނާ ބާސެލޯނާއަށް ގުޅުމަކީ ޓީމުގެ ކުޅުންތެރިންނާ އޮފިޝަލުންގެ އިތުރުން ކޯޗުގެ ހައިސިއްޔަތުން އޭނާއަށް ވެސް އުފާވެރިކަން ލިބުނު ކަމެއް ކަމަށެވެ.

އައު ސީޒަނަށް ތައްޔާރުވުމުގެ ގޮތުން ބާސެލޯނާއިން ދެން ކުޅޭނީ އިޓަލީގެ ޔުވެންޓަސްއާ ދެކޮޅަށެވެ.