ކޭންއާ ގުޅޭގޮތުން ނާގަލްސްމަން ވާހަކަދެއްކުމުން ކޮންޓޭ ހިތްހަމަނުޖެހިއްޖެ

ޓޮޓެންހަމްގެ އިންގްލޭންޑް ފޯވާޑް ހެރީ ކޭންއާ ގުޅޭ ގޮތުން ބަޔާން މިއުނިކްގެ ކޯޗު ހޫލިއަން ނާގަލްސްމަން ވާހަކަ ދެއްކުމުން ޓޮޓެންހަމްގެ ކޯޗު އެންޓޯނިއޯ ކޮންޓޭ ހިތްހަަމަނުޖެހުން ފާޅުކޮށްފިއެވެ.

ކޭންއާ ގުޅޭ ގޮތުން ނާގަލްސްމަން ބުނީ އޭނާއަކީ އަގުބޮޑު ކުޅުންތެރިއެއް ކަމަށެވެ. ކޭންއަކީ ބޯޅައިގައި ވަރުގަދަ ކުޅުންތެރިއެއް ކަމަށާއި، ހަށިގަނޑު ވަރުގަދަ ކުޅުންތެރިއެއްކަން ފާހަގަކޮށް ނާގަލްސްމަން ބުނީ ކޭންގެ އަގަކީ އުނދަގޫ އަގެއް ކަމަށެވެ. އިތުރަށް ނާގަލްސްމަން ބުނީ ކުރިއަށް އޮތް ތަނުގައި ވާނެ ގޮތެއް ޖެހޭނީ ބަލަން ކަމަށެވެ. ކޭންއާ ގުޅޭ ގޮތުން ނާގަލްސްމަން މިފަދަ ގޮތަކަށް ވާހަކަދައްކާފައިވާއިރު، އޭނާ ހޯދަން ބަޔާން މިއުނިކުން މަސައްކަތް ކުރާ ކަމަށް މީޑިއާ ރިޕޯޓުތައް ބުނެއެވެ.

އެކުވެރިކަމުގެ މެޗެއްގައި ރޭންޖަރސް ބަލިކުރި މެޗަށްފަހު އެކަމާ ގުޅޭ ގޮތުން ސުވާލުކުރުމުން ކޮންޓޭ ބުނީ، އޭނާ ވެސް އެހެން ޓީމެއްގައި ހުންނަ ކުޅުންތެރިޔަކާ ގުޅޭ ގޮތުން ވާހަކަ ނުދައްކާ ކަމަށެވެ. އެހެންކަމުން ނާގަލްސްމަން ކޭންއާ ގުޅޭ ގޮތުން ވާހަކަ ދެއްކި ސަބަބެއް ނޭނގޭ ކަން ފާހަގަކުރަމުން ކޮންޓޭ ބުނީ، އޭނާގެ ނަޒަރުގައި ނާގަލްސްމަންގެ އަމަލަކީ އިހުތިރާމް ކުޑަ އަމަލެއް ކަމަށެވެ. ކޭންއަކީ ޓޮޓެންހަމަށް މުހިންމު ކުޅުންތެރިޔެއްކަން ފާހަގަކޮށް، ކޮންޓޭ ބުނީ ޓޮޓެންހަމުން ކޭން ދޫކުރަން ބޭނުންނުވާ ކަމަށެވެ.

ޓޮޓެންހަމްގައި މުހިންމު ދައުރެއް އަދާކުރަމުން އަންނަ ކޭން ވަނީ، އެ ޓީމުން ރޭންޖަރަސްއާ ދެކޮޅަށް ކުޅުނު މެޗުގައި ދެ ލަނޑު ޖަހައި ޓީމު މޮޅު ކޮށްދީފައެވެ.