ޗައިނާގައި ހަލުވިކަމާއެކު ކޮވިޑް ފެތުރެމުންދާތީ އާންމުން ވެކްސިން ޖެހުމަށް ހިތްވަރު ދިނުމުގެ ގޮތުން އެގައުމުގެ ރައީސް ޝީ ޖިންޕިން ކޮވިޑް ވެކްސިން ޖައްސަވައިފިއެވެ.
ޗައިނާގެ އިދާރާތަކާއި ހަވާލާދީ ބީބީސީގައި ބުނެފައިވަނީ ޝީ ވެކްސިން ޖައްސަވާފައިވަނީ އެގައުމުގައި މިހާރު ކުރިއަށްގެންދާ ވެކްސިންގެ ބޫސްޓަރ ޑޯޒް ޖެހުމުގެ ކެމްޕޭނަށް މީހުން އަހުލުވެރިކޮށް ވެކްސިން ޖެހުމަށް ހިތްވަރުދިނުމަށްޓަކައި ކަމަށެވެ.
ޗައިނާގެ ނެޝަނަލް ހެލްތު ކޮމިޝަންގެ ޑެޕިއުޓީ ހެޑް ޒެންގ ޔިޒިން ވިދާޅުވީ ރައީސް ޝީ އަދި ސަރުކާރުގެ އިސްވެރިން ވެކްސިން ޖެއްސުވުމަކީ ޗައިނާއިން އުފައްދާފައިވާ ވެކްސިންގެ އިތުބާރު އޮތްކަން ދައްކުވައިދޭނެ ހެތްކެއް ކަމަށެވެ. އަދި އާންމުގޮތެއްގައި ގައުމުގެ އިސްވެރިންގެ ސިއްހީ މިފަދަ މައުލޫމާތު ޗައިނާއިން އާންމު ނުކުރާނެއެވެ.
ޗައިނާގެ ކަމާއި ބެހޭ ފަރާތްތަކުން ބުނެފައިވަނީ ގައުމު އަލުން ހުޅުވާލުމަށްޓަކައި ވެކްސިންގެ ރޯލްއައުޓްގެ ސްޕީޑް ދަށް ކަމަށެވެ. ކޮވިޑްގެ ކޭސްތައް އެގައުމުގައި އިތުރުވެފައިވާއިރު، ޒީރޯ ކޮވިޑްގެ ސިޔާސަތުގެ ދަށުން ޓެސްޓުކުރުމުގެ ބޮޑު ހަރަކާތެއްގެ އިތުރުން ހަރުކަށި ފިޔަވަޅުތަކެއް ވަނީ އަޅާފައެވެ. މީގެ ތެރޭގައި އައިސޮލޭޓްވުމާއި ލޮކްޑައުން ކުރުމުގެ ފިޔަވަޅުތައް ހިމެނެއެވެ.
މިހާތަނަށް އައި އިރު ޗައިނާއިން 2.1 މިލިއަން ކޮވިޑް ކޭސް ފެނިފައިވެއެވެ. އަދި މިހާތަނަށް އައި އިރު އެޤައުމުގެ 14 ހާހަށްވުރެ ގިނަ މީހުން ވަނީ މަރުވެފައެވެ.
