ފަހަތުން އަރައި ހިރިލަންދޫއިން ތިމަރަފުށި ބަލިކޮށްފި

އޭކޭއައިއެލްއެފް ޔޫތު ޗެމްޕިއަންޝިޕައި ފަހަތުން އަރައި ތިމަރަށު ބަލިކޮށް ހިރަލަންދޫން ސީދާ ފައިނަލްގެ ޖާގައެއް ހޯދުމާ ގާތަށް ޖެހިލައިފިއެވެ.

މުބާރާތުގެ ފުރަތަމަ މެޗުގައި ތިމަރަފުށިން ވަނީ ވިލުފުށި ބަލިކޮށްފައެވެ. އެހެންކަމުން މިއަދުގެ މެޗުގައި ހިރިލަންދޫ ބަލިކޮށްގެން، ފައިނަލްގެ ޖާގަ ހޯދުމުގެ ފުރުސަތު ތިމަރަފުއްޓަށް އޮތެވެ. ނަމަވެސް މެޗުގައި ހިރިލަންދޫން ވަނީ 4-3 ން ތިމަރަފުށި ބަލިކޮށްފައެވެ.

މެޗު ފަށައިގެން ކުރީކޮޅު ހިރިލަންދޫން ވަނީ ދެ ލަނޑު ޖަހައި ލީޑު ނަގާފައެވެ. މެޗުގެ ދެ ވަނަ މިނެޓުގައި ހިރިލަންދޫއަށް ލީޑު ނަގައިދިނީ ޒައިދާން އީސާއެވެ. އޭގެ ހަތަރު މިނެޓު ފަހުން ހިރިލަންދޫއަށް ނަތީޖާ ފުޅާކޮށްދިނީ އަޙުމަދު ޝާމިންއެވެ. ލީޑުގައި އޮވެ ހިރިލަންދޫން ކުޅެމުން ދިޔަ ނަމަވެސް، ތިމަރަފުށިން ވަނީ ފަހަތުން އަރައި އެއްވަރުކޮށް، ލީޑު ވެސް ހޯދާފައެވެ. އެއީ މެޗުގެ 16 ވަނަ މިނެޓުގައި އަޝްފާގު އަޙުމަދު ޖެހި ލަނޑާއި، 39 ވަނަ މިނެޓުގައި އަޙުމަދު އަފްލާޒް ޖެހި ލަނޑުގެ އިތުރުން 73 ވަނަ މިނެޓުގައި އަޙުމަދު ޙައިލަމް ޖެހި ލަނޑުންނެވެ.

ތިމަރަފުށިން ލީޑު ނަގާފައި ވަނިކޮށް، ހިރިލަންދޫން ވަނީ ފަހު ވަގުތު ދެ ގޯލު ޖަހާފައެވެ. މެޗުގެ 86 ވަނަ މިނެޓުގައި ޢަބްދުﷲ އިޝާން ހިރިލަންދޫއަށް ނަތީޖާ ހަމަހަމަކޮށްދިންއިރު، ފުރިހަމަ ވަގުތު ހަމަވެ އިތުރަށް ދެއްކި ތިން މިނެޓުގެ ތެރޭގައި މުޙައްމަދު ޝަމްހާން ވަނީ ހިރިލަންދޫ މޮޅުވި ލަނޑު ޖަހައިދީފައެވެ. މެޗުގެ މޮޅު ކުޅުންތެރިޔަކަށް ހޮވުނީ ހިރިލަންދޫގެ އިޝާންއެވެ.

ތިން ޓީމު ވާދަކުރާ މި މުބާރާތުގެ ފައިނަލުގެ ފުރަތަަމަ ޖާގަ ލިބޭނީ އެންމެ ގިނަ ޕޮއިންޓު ހޯދާ ޓީމަށެވެ. ދެ ވަނަ ޖާގަ ހޯދުމަށް، ދެ ވަނަ ޓީމާއި ތިން ވަނަ ޓީމު ސެމީ ފައިނަލެެއް ކުޅެން ޖެހެއެވެ. މުބާރާތުގެ ލީގު ބުރުގެ ފަހު މެޗުގައި ހޯމަ ދުވަހު ވިލުފުށި ބަލިކޮށްގެން ސީދާ ފައިނަލްގެ ޖާގަ ހޯދުމުގެ ފުރުސަތު ހިރިލަންދޫއަށް އެބަ އޮތެވެ.

މި މުބާރާތަކީ ރައިސިން ސްޓަރސް ފޯ ވިލުފުށި ރެކްރިއޭޝަން (އާރުއެސްވީއާރު)ގެ ފަރާތުން އިންތިޒާމުކޮށްގެން ތ.އަތޮޅަށް ހުޅުވާލައިގެން ކުރިއަށްދާ މުބާރާތެކެވެ. މިއީ އާރުއެސްވީއާރުގެ ފަރާތުން 2021 ވަނަ އަހަރު ބާއްވަން ފެށި މުބާރާތެވެ. އެއަހަރު މުބާރާތް ކާމިޔާބުކުރީ ހިިރިލަންދޫ އިންނެވެ.