ވިލުފުށި ބަލިކޮށް ހިރިލަންދޫ ފައިނަލަށް

އޭކޭއައިއެލްއެފް ޔޫތު ޗެމްޕިއަންޝިޕްގައި ވިލުފުށި ބަލިކޮށް ހިރިލަންދޫ ސީދާ ފައިނަލްގެ ޖާގަ ހޯދައިފިއެވެ.

ފައިނަލްގެ ޖާގަ ހިރިލަންދޫ ހޯދީ ކުޅުނު ދެ މެޗުން މޮޅުވެ ލިބުނު ތިން ޕޮއިންޓާއެކުއެވެ. ދެ ވަނަ މަގާމުގައި އޮތީ އެއް މެޗުން މޮޅުވެ ތިމަރަފުއްޓެވެ. ދެ މެޗުން ވެސް ބަލިވެ ތިންވަނަ މަގާމުގައި އޮތީ ވިލުފުށިއެވެ. މުބާރާތުގައި ތިން ޓީމު ވާދަކުރާއިރު، މުބާރާތް ކުރިއަށް ދަނީ ކޮންމެ ޓީމެއް ކޮންމެ ޓީމަކާ ވާދަކޮށް، އެންމެ ގިނަ ޕޮއިންޓު ލިބޭ ޓީމު ފައިނަލަށް ދާ ގޮތަށެވެ. ދެ ވަނަ ޓީމާއި ތިން ވަނަ ޓީމުގެ ދެމެދު ކުޅެވޭނީ ސެމީ ފައިނަލެކެވެ.

ހޯމަ ދުވަހު ވިލުފުއްޓާ ދެކޮޅަށް ކުޅުނު މެޗު ހިރިލަންދޫ ކާމިޔާބުކުރީ 3-0ންނެވެ. ހިރިލަންދޫގެ ފުރަތަމަ ލަނޑު އެ ޓީމުން ފުރަތަމަ ހާފުގައި ޖެހިއިރު، ފަހު ދެ ލަނޑު ޖެހީ ދެ ވަނަ ހާފުގައެވެ. މެޗު ފަށައިގެން ތިން ވަނަ މިނެޓުގައި ހިރިލަންދޫއަށް ލީޑު ނަގައިދިނީ ނިޝާދުއެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ފަސް މިނެޓުގެ ތެރޭގައި ހިރިލަންދޫ އިން ވަނީ ދެ ލަނޑު ޖަހާފައެވެ. އެއީ ފުރަތަަމަ ލަނޑު ޖަހައިދިން ނިޝާދުގެ ލަނޑަކާއި، އަހުމަދު ޝިފާންގެ ލަނޑެކެވެ. މެޗުގެ މޮޅު ކުޅުންތެރިޔަކަށް ހޮވުނީވެސް ނިޝާދުއެވެ.

މުބާރާތުގެ ސެމީގައި ތިމަރަފުއްޓާއި ވިލުފުށި ބައްދަލުކުރާ މެޗު އޮންނަނީ ބުދަ ދުވަހުއެވެ. ފައިނަލް މެޗު ކުޅުމަށް ހަމަޖެހިފައިވަނީ ހުކުރު ދުވަހުއެވެ.

މި މުބާރާތަކީ ރައިސިން ސްޓަރސް ފޯރ ވިލުފުށި ރެކްރިއޭޝަން (އާރުއެސްވީއާރު)ގެ ފަރާތުން އިންތިޒާމުކޮށްގެން، ތ. އަތޮޅަށް ހުޅުވާލައިގެން ކުރިއަށްދާ މުބާރާތެކެވެ. މިއީ އާރުއެސްވީއާރުގެ ފަރާތުން 2021 ވަނަ އަހަރު ބާއްވަންފެށި މުބާރާތެވެ. އެއަހަރު މުބާރާތް ކާމިޔާބުކުރީ ހިިރިލަންދޫއިންނެވެ.